Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MUTWE WA MWANDA WA PA KIBALU

Lelo Leza Umwene Mavita Namani?

Lelo Leza Umwene Mavita Namani?

Le ubwanya kulondolola kino kipangujo namani? Bantu bavule balañanga amba Leza witabije divita. Badi na bubinga bwa amba i aye wāsoñenye batōtyi bandi bamo ba pa kala balwe divita; yemunenena’po ne Bible. Inoko bakwabo banenanga amba Yesu Mwana Leza wāfundije balondi bandi kusanswa balwana nabo. (Mateo 5:43, 44) Balañanga amba mumweno wa Leza pa divita ushintanga kyaba kimo kadi dyalelo ketabijepo mavita.

Le ulanga’po namani? Lelo Leza witabije divita? Shi i amo, le i ani ulengeja mavita dyalelo? Malondololo ku bino bipangujo abwanya kwikala na lupusa lukatampe pa mumweno obe wa mavita. Kimfwa, shi ubayuka amba Leza witabije mavita ne kadi udi ku wenu mutamba, wadi wa kusangala Leza ekale bwenu bukila na kikulupiji kya amba mukanekenya mavita. Ku mutamba mukwabo, le ukeivwana namani shi ubayuka amba Leza ukwatakanyanga bo mulwa nabo mu divita? Mobimwekela wadi wa kushinta mutamba.

Pano padi mwanda. Kuyuka mumweno wa Leza pa divita kubwanya kwikala na lupusa pa muswelo omumona. Shi ubadilwa mu mamidiyo a boba basuswilwe na mavita a bantu, bine ukasaka kutana malondololo ku kino kipangujo, Lelo i Leza usoñanyanga mavita nansha kulengeja bibi bilupuka’ko, nansha amba i musūle boba basusulwa na mavita na mukulupidile bamo?

Ubwanya kusangala pa kuyuka amba malondololo a Bible i meshile kulampe kwine na ino mimweno. Ino, tamba kala kutūla ne ku dyalelo mumweno wa Leza pa mavita keushintyilepo. Nanshi shi ke pano tubandaulei munenena Bible pa mwādi mumwena Leza mavita tamba kala kutūla ne mu myaka katwa kabajinji Yesu paākidi pano pa ntanda. Kino kiketukwasha tumone muswelo Leza wamwene mavita dyalelo ne mavita onso a bantu akaya kumeso.