Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MUTWE WA MWANDA WA PA KIBALU | LELO LEZA UMWENE MAVITA NAMANI?

Mumwena Leza Mavita Dyalelo

Mumwena Leza Mavita Dyalelo

Dyalelo bantu basusulwanga. Bavule babijanga Leza ebakwashe ino kutupu kumona bukwashi. Lelo Leza wivwananga kubinza kwabo mwanda wa kwibakwasha? Lelo tusa kunena namani pa boba basaka kulwa mavita mwanda wa kupwija masusu? Lelo Leza wibelanga’ko kuboko ku bukomo bobalonga bwa kulwa bulwi boloke?

Amakedona i divita dikapwija mavita onso

Dibajinji bidi, tana busengi mu buno bubinebine bwa amba: Leza umonanga masusu adi pa ino ntanda dyalelo, kadi usa kupwija’o. (Ñimbo 72:13, 14) Leza ulaile mu Bible Kinenwa kyandi amba boba “bamona malwa, Leza ukemupa kukōkolokwa.” Kitatyi’ka? “Pa kusokolwa kwa Mfumwetu Yesu momwa mūlu pamo na bamwikeulu bandi bakomokomo . . . palubwila kinongo boba kebayukilepo Leza ne boba kebakōkelepo myanda miyampe ya Mfumwetu Yesu.” (2 Tesalonika 1:7, 8) Kuno kusokwelwa kwa Yesu kukafikidila pa kyokya kitelwa na Bible bu “divita dya difuku dikatampe dya Leza Mwinē Bukomo Bonso,” kadi kitelwa ne bu Amakedona.​—Kusokwelwa 16:14, 16.

Mu dino divita dīya kumeso Leza kakengidijapo bantu mwanda wa kulwa, ino ukengidija wandi Mwana Yesu Kidishitu pamo ne bipangwa bikwabo bya bukomo bya ku mushipiditu mwanda wa kulwa na babi. Bino bipangwa bya mūlu bya bukomo bikatalula’ko masusu onso.​—Isaya 11:4; Kusokwelwa 19:11-16.

Kufika ne dyalelo mumweno wa Leza pa mavita keushintyilepo. Umonanga mavita bu muswelo muyampe wa kupwija masusu ne bintu bibi. Inoko enka mokilombwelwe mu mānga i Leza mwine utoñanga kitatyi kine kya kulwa divita ne mwine wa kulwa’dyo. Monka motwekimwenanga Leza usa kupwija mavita, bintu bibi ne masusu ku divita  dyandi dīya ku meso kupityila kudi wandi Mwana Yesu Kidishitu. Kino kilombola amba mavita alwibwa dyalelo pano pa ntanda keetabijibwepo na Leza, nansha ke bintu bine bitamba’ko.

Tulete bidi kimfwa: Langa’po bidi ba mwana na mwanabo bekupila shabo patupu’ye. Kupwa abaleka kwikupila kebete shabo ku telefone. Mwana umo kasake bomane monka, ino mukwabo wapele. Abo bonso kebateje binena shabo, na kikulupiji kya amba usa kwibakwasha baleke kumana. Ebiya shabo webadingila baleke kwikupila, ino bamwilaije pasa kujokela ku njibo apwije uno mwanda. Kebamwilaije. Kupwa kadi bashilula kumana. Aye shabo pa kujokela’ye ku njibo kabingijepo mwana nansha umo ino webape bonso mfuto mwanda wa kubulwa kikōkeji.

Dyalelo, mizo ilwa mavita ilombanga divule dine bukwashi kudi Leza. Inoko Leza dyalelo kalemenenangapo ku mutamba kabidye. Ino Kinenwa kyandi Bible kilombola patōkelela amba: “Kemwakyalwijai muntu kibi ku kibi” ne amba “kemwakīlubwilai kinongo banwe bene.” (Loma 12:17, 19) Kadi i munene bantu ‘bamutengele ne mutyima batūkije’ kufika ne kitatyi kyakalonga’po kintu pa Amakedona. (Ñimbo 37:7) Kitatyi kikomenwanga mizo kwilaija Leza alonge’po kintu ne kushilula kulwa, Leza umonanga ano mavita bu bilongwa bya mitatulo bine kebimusangajanga’po. O mwanda pa Amakedona, Leza ukalombola bukomo bwandi na kutalula’ko tuvutakanya twa mizo ne kutukija “mavita ne ku mfulo ya ntanda.” (Ñimbo 46:9; Isaya 34:2) Bine, Amakedona i divita dikapwija mavita onso.

Kupwa kwa mavita onso akekala madyese mavule akaleta Bulopwe bwa Leza. Yesu wēsambile pa uno umbikalo mu milombelo yandi mitumbe ya amba: “Bulopwe bobe bwiye. Kiswa-mutyima kyobe kilongeke, pamo na momwa mūlu, ne pano pa ntanda pene.” (Mateo 6:10) Bulopwe bwa Leza ke bukapwija’po enka mavita ino bukatalula ne kine kilengejanga mavita, ke bintu bibi kadi. * (Ñimbo 37:9, 10, 14, 15) O mwanda balondi ba Yesu batengele na kipyupyu madyese mavule akaleta Bulopwe bwa Leza.​—2 Petelo 3:13.

Lelo tufwaninwe kwilaija Bulopwe bwa Leza bupwije masusu ne bintu bibi byonso? Kufikidila kwa bupolofeto bwa mu Bible kulombola amba tudi mu “mafuku a mfulo”a ino ngikadilo ya bintu. (2 Temote 3:1-5) * Panopano ponka, Bulopwe bwa Leza busa kufudija ano mafuku a mfulo pa divita dya Amakedona.

Monka motwekimwenanga kūlu’ku, boba bakonakanibwa ku dino divita dya mfulo i boba “kebakōkelepo myanda miyampe ya Mfumwetu Yesu.” (2 Tesalonika 1:8) Ino vuluka amba, Leza kasangelangapo lufu lwa muntu nansha umo, kubadila’mo ne mupupakane mwine. (Ezekyele 33:11) Mwanda “kasakilepo muntu koneka” ku dino divita dya mfulo, ino usakanga myanda miyampe ya Mfumwetu Yesu isapulwe “pa ntanda yonso ikelwe na bantu” penepa mfulo keifika. (2 Petelo 3:8, 9; Mateo 24:14; 1 Temote 2:3, 4) Bine, kupityila ku mwingilo wa ntanda yonso wa Batumoni ba Yehova, bantu dyalelo badi na mukenga wa kwifunda kuyuka Leza, kwitabija myanda miyampe ya Yesu ne kukemwena difuku dikajimankana mavita lonso.

^ mus. 9 Kadi Bulopwe bwa Leza bukatalula’ko lufu walwana na bantu. Leza ukasangula bantu bavule, kubadila’mo ne boba bafwile mu mavita.

^ mus. 10 Shi usaka kuyukila’ko bintu bivule bitala mafuku a mfulo, tala shapita wa 9 wa dibuku Lelo I Bika Bine Bifundija Bible? dilupwilwe na Batumoni ba Yehova.