Enda ku bidi'mo

Enda ku kifunka

Batumoni ba Yehova

Tonga Ludimi Kiluba

“Witubweje’ko Lwitabijo”

“Witubweje’ko Lwitabijo”

“Nkwashe’ko popa ponsakilwa lwitabijo!”​—MAKO 9:24.

ÑIMBO: 81, 135

1. Mwanda waka lwitabijo ludi na mvubu? (Tala kifwatulo ku ngalwilo.)

LELO kashā kodi mwiipangule amba, ‘Lelo Yehova ukampandija ku kyamalwa kikatampe?’ Mutumibwa Polo wānene amba lwitabijo i ngikadilo ya mvubu mpata yotusakilwa pa kupanda. Wāsonekele amba: “Pampikwa lwitabijo kebibwanikapo kusangaja Leza.” (Bahebelu 11:6) Bine kino kimweka bu kintu kipēla, inoko bubine i buno amba “lwitabijo ke kintupo kidi na bantu bonso.” (2 Tesalonika 3:2) Bino bisonekwa bibidi bitukwasha twimvwanije mvubu ya kukomeja lwitabijo lwetu.

2, 3. (a) Mwanda waka lwitabijo ludi na mvubu? (b) Le i bika byotusa kubandaula mu kino kishinte?

2 Mutumibwa Petelo wēsambile pa “kutompibwa” kwa mu lwitabijo. (Tanga 1 Petelo 1:7.) Bine, kyamalwa kikatampe kekidi pa kibelo, po pene potusakilwa kubadilwa mu “boba badi na lwitabijo, lutwala ku kulama muya mūmi.” (Bahebelu 10:39) O mwanda tufwaninwe kwingila bininge pa kuningisha lwitabijo lwetu. Tusakanga kubadilwa mu boba bakapalwa mpalo basokwelwe na Yesu Kidishitu Mulopwe wetu. Pamo bwa mwana-mulume wālombele Yesu amubweje’ko lwitabijo, netu tubwanya kunena amba: “Nkwashe’ko popa ponsakilwa lwitabijo!” (Mako 9:24) Enka pamo bwa batumibwa, kadi netu tubwanya kunena amba: “Witubweje’ko lwitabijo.”​—Luka 17:5.

3 Mu kino kishinte, tusa kubandula’mo myanda pamo bwa ino: muswelo wa kukomeja lwitabijo lwetu, muswelo otukokeja kulombola amba tudi na lwitabijo lukomo ne kine kitukulupija amba  Leza uketulondolola potumulomba etubweje’ko lwitabijo.

LEZA USEPELELANGA POTUKOMEJA LWITABIJO LWETU

4. Lelo i bimfwa’ka bikokeja kwitutonona tuningishe lwitabijo lwetu?

4 Lwitabijo byoludi na mvubu, o mwanda Yehova i mwitupe bimfwa bivule bya mu Bible bya bantu ba lwitabijo. Bino bimfwa “byālembelwe mwanda wa kwitufundija.” (Loma 15:4) Bimfwa bya ba Abalahama, Sala, Izake, Yakoba, Mosesa, Lehaba, Ngideoni, Balake ne bantu bakwabo bavule bikokeja kwitutonona tuningije lwitabijo lwetu. (Bahebelu 11:32-35) Kutentekela pa bimfwa bya pa kala, netu tudi na bimfwa bya kutendelwa bya batutu ne bakaka badi na lwitabijo mu bukata bwetu dyalelo. * (Tala kunshi kwa dyani.)

5. Le Ediya wālombwele namani amba udi na lwitabijo lukomo mudi Yehova ne i kipangujo’ka kyotubwanya kwiipangula?

5 Kimfwa kimo bidi kya mu Bible i kya mupolofeto Ediya. Polangulukila pa kino kimfwa, mona bintu bitano mwine mwaālombwele kikulupiji kikatampe mudi Yehova. (1) Ediya paālombwele Mulopwe Ahaba amba Yehova usa kuleta mulanga, wānene na kikulupiji amba: “Ne Yehova, Leza wa Isalela, o nimananga ku meso, i mūmi, kekukekalapo lumé nansha mvula ino myaka ino’i.” (1 Balopwe 17:1) (2) Ediya wādi ukulupile amba Yehova ukavuija bisakibwa byandi bikwabo mu kitatyi kya mulanga. (1 Balopwe 17:4, 5, 13, 14) (3) Kadi Ediya wādi ukulupile amba Yehova usa kusangula mwanā mwana-mukaji wa kishala. (1 Balopwe 17:21) (4) Katatenepo amba mudilo wa Yehova ukasōka kitapwa kyandi pa Lūlu lwa Kalamela. (1 Balopwe 18:24, 37) (5) Nansha paādi kepamwekele kakintu nansha kamo kalombola amba mvula ukanoka, Ediya wāsapwidile Ahaba na kikulupiji amba: “Taluka udye utome; mwanda kudi mikungulo mingi ya mvula.” (1 Balopwe 18:41) Byotwapwa kubandaula bino bintu, tubwanya kwiipangula amba, ‘Le lwitabijo lwami i lukomokomo bwa lwa Ediya?’

LE I BIKA BYOTUKOKEJA KULONGA PA KUKOMEJA LWITABIJO LWETU?

6. Le i kisakibwa’ka kya Yehova kiketukwasha tukomeje lwitabijo lwetu?

6 Ketubwanyapo kukomeja lwitabijo lwetu batwe bene pampikwa kulomba mushipiditu ujila wa Leza. Mwanda waka? Mwanda lwitabijo i kipindi kya mu kipa kya mushipiditu ujila. (Ngalatea 5:22) I kya tunangu potulondanga madingi a Yesu a kulomba na kininga mushipiditu ujila. Yesu wālaile amba Yehova “ukapāna mushipiditu ujila ku boba bamulomba.”​—Luka 11:13.

7. Lombola muswelo otukokeja kulama lwitabijo lwetu ne kwilukomeja.

7 Bine, tufwaninwe kulama lwitabijo lwetu lukomo mudi Leza. Tubwanya kudingakanya lwitabijo na mudilo. Kitatyi kyotubanza mudilo, lubimbi lwikalanga lukomo. Inoko, shi ketubwejeje’mopo nkuni, ukabula ke buto bonka. Ino shi twela’mo nkuni kyaba ne kyaba keukabulepo. Momwikadile ne lwitabijo lwetu. Shi tutanga nyeke ne kwifunda difuku ne difuku Kinenwa kya Leza, buswe botuswele Bible ne Yehova bukatyita. Byabuyabuya bikalupuka’ko, tukalama lwitabijo ne kwilukomeja.

8. Lelo i bika bikakukwasha ukomeje lwitabijo lobe ne kwilulama?

8 Kokemanina enka pa bintu byowafundijibwe kumeso kwa kubatyijibwa. (Bahebelu 6:1, 2) Kimfwa, kwifunda bupolofeto bwa mu Bible ke bufikidile kala kukakukwasha ukomeje lwitabijo lobe ne kwilulama. Kadi ubwanya kwingidija Kinenwa kya Leza mwanda wa kumona shi lwitabijo lobe i lukomo na bubine.​—Tanga Yakoba 1:25; 2:24, 26.

9, 10. Le i muswelo’ka ukomejibwanga lwitabijo lwetu na (a) balunda bayampe? (b) kutanwa kukupwila kwa pa kipwilo? (c) kusapula?

 9 Mutumibwa Polo wānene amba bene Kidishitu babwanya “kwikankamika momudi, muntu ne muntu ukankamikwa na lwitabijo lwa mukwabo.” (Loma 1:12) Le kino kishintulula bika? Potupityija kitatyi na batutu ne bakaka tukomejanga lwitabijo lwa umo ku mukwabo. Kino i kitatyi kya pa bula kyotupityijanga na boba ke ‘batompibwe’ mu lwitabijo. (Yakoba 1:3) Balunda babi betujimijijanga lwitabijo lwetu, ino bayampe belukomejanga. (1 Kodinda 15:33) O mwanda twi bakankamikwe kutanwa kyaba ne kyaba ku kupwila. Kwine’kwa kuketukwasha ‘twikankamike batwe bene na bene.’ (Tanga Bahebelu 10:24, 25.) Kadi bufundiji botufundijibwanga ku kupwila bukomejanga lwitabijo lwetu. Bible unena amba “lwitabijo lulondanga byobya bivwanwa.” (Loma 10:17) Wiipangule’po bidi amba, ‘Lelo ntanwanga kitatyi ne kitatyi kukupwila kwa bwine Kidishitu?’

10 Kadi tukokeja kuningisha lwitabijo lwetu potusapula ne kufundija myanda miyampe ya mu Bible ku bakwetu. Pamo bwa bene Kidishitu ba mu myaka katwa kabajinji, tukulupile mudi Yehova ne kwisamba pampikwa moyo mu ngikadilo yo-yonso.​—Bilongwa 4:17-20; 13:46.

11. Mwanda waka ba Kalebu ne Yoshua bādi na lwitabijo lukomo ne i muswelo’ka otukokeja kwibeula?

11 Lwitabijo lwetu mudi Yehova lukaninga potumona muswelo waetukwasha ne kulondolola milombelo yetu. Kino kyōkyemwenine ne ba Kalebu ne Yoshua. Baitabije mudi Yehova pobākabelele Ntanda ya Mulao. Mwenda mafuku, lwitabijo lwabo lwaninga kitatyi kyonso kyobādi bamona bukwashi bwa Yehova. O mwanda Yoshua wāsapwidile bene Isalela na kikulupiji kyonso amba: “Nansha kintu kimo kine kyabulwa ku byonso bintu bilumbuluke byesambile Yehova Leza wenu pa mwanda wenu.” Ebiya wābweja’ko amba: “Ino pano nanshi akamwai Yehova, ne kumwingidila aye mu boloke ne binebinepo.” Kadi wānene monka amba: “Ino padi amiwa nanshi ne njibo yami mine, tukamwingidilanga Yehova.” (Yoshua 23:14; 24:14, 15) Shi tukulupile mudi Yehova ne kumona muswelo waetukwasha, lwitabijo lwetu lukaninga. “Ē! bānwe tompai mumone’mba  Yehova i muyampe; keye wa katōkwe kandi, shandi! yewa muntu umukulupile.”​—Ñimbo 34:8.

MWAKULOMBWELA LWITABIJO LWETU

12. Le tulombolanga namani amba tudi na lwitabijo lukomo?

12 Le tulombolanga namani amba tudi na lwitabijo lukomo? Mwanā bwanga Yakoba wānene amba: ‘Nami nkakulombola lwitabijo lwami na mingilo yami.’ (Yakoba 2:18) Bilongwa byetu bilombolanga’mba tudi na lwitabijo lukomo. Muswelo’ka?

Boba balonga byonso byobakokeja kubwanya mu busapudi balombolanga lwitabijo lwabo lukomo (Tala musango 13)

13. Le tukalombola namani lwitabijo lwetu potusapula?

13 Busapudi i muswelo mulumbuluke otulombolanga lwitabijo lwetu. Mwanda waka? Mwanda shi tusapula, tulombolanga’mba tukulupile amba mfulo keidi pa kibelo ne amba ‘keikejepo, mhm.’ (Habakuka 2:3) Shi tusaka kuyuka’mba lwitabijo lwetu i lukomo, twiipangulei amba: ‘Lelo busapudi i bwa kamweno kondi?’ Le noñanga bukomo bwa kusapwila bakwetu myanda ya Leza? Lelo nkimbanga mikenga ya kwingidila Yehova bininge?’ (2 Kodinda 13:5) Tulombolei bukomo bwa lwitabijo lwetu na ‘kunena patōkelela mwanda wa lupandilo,’ ko kunena’mba kusapula myanda miyampe.​—Tanga Loma 10:10.

14, 15. (a) Le i muswelo’ka otukokeja kulombola lwitabijo mu būmi bwetu bwa difuku ne difuku? (b) Sekununa mwanda mumweke ulombola bilongwa bya lwitabijo lukomo.

14 Kadi tukalombola lwitabijo lwetu mudi Yehova potūminina makambakano a mu būmi mu ino ntanda. Shi twi, babemvu, batyumukwe mutyima, batengwe pa mutyima, balanda nansha na makambakano makwabo tufwaninwe kukulupila amba ba Yehova ne Yesu ‘baketukwasha pa kitatyi kifwaninwe.’ (Bahebelu 4:16) Tulombolanga’mba tukulupile Yehova kitatyi kyotumulomba bukwashi. Yesu wānene amba tubwanya kulomba Yehova etupe “bidibwa byetu bya dyalelo mungya bisakibwa bya difuku.” (Luka 11:3) Nsekununi ya mu Bible ilombola’mba Yehova ubwanya kwitupa kintu kyo-kyonso kyotubudilwe. Kimfwa, mu kitatyi kyaikele’ko mulanga mukomo mu Isalela, Yehova wāpele Ediya bidibwa ne mema. Bible unena amba, “binkombe ke bimuletela mukate ne mwita lubanga, mukate ne mwita kyolwa; ino katome ku kamunonga’ka.” (1 Balopwe  17:3-6) Netu tukulupile’mba Yehova uketupa byotubudilwe.

Tulombolanga lwitabijo potūminina makambakano a mu būmi mu ino ntanda (Tala musango 14)

15 Tukulupile’mba shi twingidija misoñanya ya mu Bible, tukabwanya kuvuija bisakibwa bya kyetu kisaka. Rebecca, kaka musongwe wa mu Azia ulombola muswelo aye ne kyandi kisaka obaingidije misoñanya idi mu Mateo 6:33 ne Nkindi 10:4. Unena amba wandi mulume wamwene amba kandi kaji kamuletelanga kyaka na kipwano kyandi na Yehova. Ebiya wekaleka. Ino badi na bana baná bobadi balelele, o mwanda bashilwile kupoteja tubidibwa. Kaji kabo kebakweshe bekale nyeke na kalupeto ka kuvuija nako bisakibwa bya kisaka. Rebecca unena amba: “Tweivwene’mba Yehova ketwelelepo. Ketwabudilwepo difuku nansha dimo kakwela mukanwa.” Lelo nobe kodi mutanwe mu ngikadila iifwene na ino mine yakomeje lwitabijo lobe?

16. Le bikekala namani shi tukulupile mudi Leza?

16 Tufwaninwe kukulupila amba shi tulonde buludiki bwa Yehova, uketukwasha. Polo wāpitulukile mu binenwa bya Habakuka paānene amba: “Moloke ukekalanga mūmi pa mwanda wa lwitabijo.” (Ngalatea 3:11; Habakuka 2:4) Mu uno muswelo tudi na lwitabijo lukomo mu Yewa wa kwitukwasha na bubine. Polo wituvulujanga’mba Leza i “aye, mwendele bukomo bwandi bwingila motudi batwe, ukokeja kulonga byobya bivulevule kupita ne byonso byotulomba ne byotulanga.” (Efisesa 3:20) Bengidi ba Yehova boloñanga bukomo bwabo bonso mwanda wa kulonga kiswa-mutyima kya Leza, ino kadi bayukile amba badi na mikalo. Tufwijanga’ko bininge pa kuyuka’mba Leza udi netu ne amba witweselanga bininge pa bukomo botulonga.

MALONDOLOLO KU BILONGWA BYETU BYA LWITABIJO

17. (a) Lelo Yesu wālondolwele batumibwa namani? (b) Mwanda waka tufwaninwe kutengela amba Yehova ukalondolola ku bilongwa byetu bya lwitabijo?

17 Bino byonso byotwabandaula, biketutonona twiivwane bwa batumibwa po bālombele Yesu amba: “Witubweje’ko lwitabijo.” (Luka 17:5) Yesu wālondolwele batumibwa bandi mu muswelo wa pa bula pa Pentekosa mu mwaka wa 33, pobātambwile mushipiditu ujila ne kwivwanija senene mpango ya Leza. Kino kyākomeje lwitabijo lwabo. Byafula kwepi? Tamba’nka penepa, bashilula mwingilo mukatampe wa busapudi. (Kolose 1:23) Lelo tubwanya netu kutengela malondololo ku bilongwa byetu bya lwitabijo? Yehova i mwitulaye amba tukokeja ‘kumulomba. . . . mwendele kiswa-mutyima kyandi.’​—1 Yoano 5:14.

18. Le Yehova weselanga namani boba bakomeja lwitabijo lwabo?

18 Shi tukulupile bininge mudi Yehova nandi ukasangalanga pamo netu. Ukalondolola bilongwa byetu bya lwitabijo ne lwitabijo lwetu lukekala lukomo, kadi tukekala bu “bantu bafwaninwe Bulopwe bwa Leza.”​—2 Tesalonika 1:3, 5.

^ mus. 4 Tala bimfwa bimo mu nsekununi ya mu būmi ya Lillian Gobitas Klose (Réveillez-vous ! wa mafuku 22 Kweji 7, 1993), Feliks Borys (Réveillez-vous ! wa mafuku 22 Kweji 2, 1994), ne Josephine Elias (Réveillez-vous ! wa Kweji 9, 2009).