Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MUTWE WA MWANDA WA PA KIBALU | KULOMBELA LE KUDI NA MVUBU?

Milombelo—Kyo Ibwanya Kukulongela

Milombelo—Kyo Ibwanya Kukulongela

Kumeso kwa kulonga kintu kyo-kyonso, ubwanya kwiipangula’mba ‘Le mudi kamweno’ka?’ Le kwipangula namino pa mwanda wa milombelo i kwisakila? Kekidipo’tu na mvubu. Twikalanga tusaka kuyuka shi kintu’ka shi kintu’ka kiyampe. Nansha ke Yoba muntu muyampe wānene amba: “Shi namwityile nandi wanondolola.”​—Yoba 9:16.

Mu bishinte bibadikile, twabandawile’mo bubinga bwa amba milombelo i mishile kulampe na bibidiji bya mitōtelo nansha bundapi bwa mu ñeni. Bine, Leza wa bine utejanga milombelo. Shi tulomba mu muswelo mwendele’mo kadi bintu bipotoloke, uketwivwana. Kadi witwita tufwene kwadi. (Yakoba 4:8) Penepa, le i bika byotukatengela shi milombelo i kintu kya mvubu mu būmi bwetu? Nanshi tubandaulei’ko byabuyabuya bimo.

Ndoe ya mutyima.

Kitatyi kyotanwa na makambakano ne bikoleja bya mu būmi, le ulēmenenwanga na kuzumbija mutyima? Bible witukankamika mu bitatyi pamo bwa bino amba “lombelai kitatyi kyonso” kadi “umbyonso yukijai Leza.” (1 Tesalonika 5:17; Fidipai 4:6) Bible witukulupija amba shi tuvundamukile kudi Leza mu milombelo nabya, “ndoe ya Leza itabukile milangwe yonso ikalama mityima [yetu] ne ñeni [yetu].” (Fidipai 4:7) Tukokeja kadi kutūkijibwa mutyima mu ludingo kampanda na kupungulwila makambakano etu kudi Tata wetu wa mūlu. Na bubine, mu Ñimbo 55:22 witukankamika’mo namino amba: “Ela kiselwa kyobe padi Yehova, nandi ukakulelanga.”

“Ela kiselwa kyobe padi Yehova, nandi ukakulelanga.”​—Ñimbo 55:22

 Bantu bavule mu ino ntanda i bemwene ino ndoe. Hee Ran wa mu Korea wa Kunshi unena amba: “Nansha shi ngidi na makambakano makomo, shi ne atele’tu mu milombelo, neivwananga wa ami watentulwa kiselwa kadi monanga bukomo bwa kūminina.” Cecilia wa mu Filipine, unena amba: “Byondi mbutwile nzumbijanga mutyima bininge pa bami bana bana-bakaji ne mama kakibwanyapo kundyuka. Ino milombelo, i kwashanga ngikale na bukomo bwa kutyepeja’ko makambakano ami a bukile bukya. Bine, nkulupile amba Yehova ukankwasha ne balele.”

Busengi ne bukankamane mu matompo.

Lelo ulwanga na njia mipitepite, pa kwabo na makambakano a mu būmi nansha binkumbulu? Lomba “Leza wa kusenga konso” ubwanya kukukwasha bininge. Bible unenena amba “wituseñanga mu byamalwa byetu byonso.” (2 Kodinda 1:3, 4)  Kimfwa, difuku dimo Yesu paādi na njia mikatampe, “wafukata mu manwi kalombela.” Byafula namani? “Mwikeulu wa mūlu wamumwekela kamukomeja.” (Luka 22:41, 43) Nehemia, mwana-mulume mukwabo wa kikōkeji, wāsuswilwe na bantu babi bādi bakimba kwimika mwingilo wa Leza. Wālombele amba: “Ino pano, a Leza, ukomeja makasa ami.” Binkumenkume byālondele’po bilombola’mba bine Leza wāmukweshe aleke kwikala na moyo ne kuvuija mwingilo wandi. (Nehemia 6:9-16) Reginald wa mu Ghana, ulombola byaemwenine mu milombelo amba: “Po nombelanga, na kampata mu bitatyi byondemenenwe na bikoleja, neivwananga na ami utūdila yami myanda ku muntu ubwanya kunkwasha ne unkulupija amba kokikwatwa moyo.” Bine, Leza ukokeja kwitusenga kitatyi kyotumulomba.

Tunangu twa kwa Leza.

Butyibi bumo botukwata bubwanya kwikala na lupusa potudi mu mafuku mavule ne pa baswe betu. Le i muswelo’ka otukakwata butyibi bwa tunangu? Bible unena amba: “Shi momudi’mo mudi umo ubudilwe tunangu, nankyo alombe’to nyeke kudi Leza, mwanda aye upanga bonso na mutyima tō pampikwa kutopeka; nato tukamupebwa.” (Yakoba 1:5) Shi tulombe tunangu, Leza ukokeja kwitupa mushipiditu ujila wituludike pa kukwata butyibi bwa tunangu. Na bubine, tukokeja kulomba mushipiditu ujila mwanda Yesu witukulupija’mba “Shenu wa mūlu . . . ukapāna mushipiditu ujila ku boba bamulomba!”​—Luka 11:13.

“Nalombele kitatyi kivule kudi Yehova andudike nkwate butyibi boloke.”—Kwabena, Ghana

Nansha ke Yesu mwine wēivwene bu usakilwa bukwashi bwa Shandi wa mūlu pa kukwata butyibi bwa kamweno. Bible witulombola’mba paādi ukimba kutonga bantu 12 bakwingila bu batumibwa bandi, “wakesha bufuku bonso butuntulu ulombela kudi Leza.”​—Luka 6:12.

Pamo bwa Yesu, bantu bavule dyalelo badi na kikulupiji pobamwene mwalondolwedile Leza ku milombelo yabo mwanda wa bakwate butyibi bwa tunangu. Regina wa mu Filipine, wesambile pa makambakano meshileshile amutene, pamo bwa kwikwatakanya aye mwine ne kisaka kyandi, kufwa kwa wandi mulume, kupwa kwa kaji ne makambakano a kulela bana. Le i bika byamukweshe akwate butyibi bwa mvubu? Unena amba: “I Yehova waunkweshe kupityila ku milombelo.” Kwabena, wa mu Ghana, ulombola kine kyaalombele bukwashi kudi Leza amba, “Najimije kaji ka mfutwa miyampe ka lūbako.” Shi tubandaule yandi myanda, unena amba, “Nalombele kitatyi kivule kudi Yehova andudike nkwate butyibi boloke.” Ubweja’ko amba, “Namwene bukomo bwa Yehova bwine bwaunkweshe ntonge mwingilo waunengeje mvuije bisakibwa bya ku mushipiditu ne bya ku ngitu.” Abe nobe ubwanya kwimwena buludiki bwa Leza na kulombela pa bintu bibwanya kona kipwano kyobe nandi.

Bine, tubesambila’tu pa bintu bityetye byokokeja kumwena mu milombelo. (Shi usaka kuyukila’ko bimfwa bivule nankyo tala kapango kanena amba “ Mwena mu Milombelo.”) Ino pa kumona bino byabuyabuya, ufwaninwe bidi kuyuka Leza ne kiswa-mutyima kyandi. Shi usakile, tukukankamika ulombe Batumoni ba Yehova befunde nobe Bible. * Dino dyo ditabula dibajinji dikufwenya kudi yewa “Wivwananga kulombela.”​—Ñimbo 65:2.

^ mus. 14 Shi usaka kuyukila’ko bivule ipangula Batumoni ba Yehova ba mu kyenu kibundi nansha kutwela pa diteba dyetu dya www.jw.org.