Enda ku bidi'mo

Enda ku kifunka

Batumoni ba Yehova

Tonga Ludimi Kiluba

I Kinengelele Ami Kufwena Kudi Leza

I Kinengelele Ami Kufwena Kudi Leza

PA KUBWANYA myaka kitema, kyadipo kadi na kitama. Dyalelo po nkendi na myaka 43, ngidi na bula bwa metele umo kete. Bambutwile bami po bamwene amba nkikilepapo, baunkakamikile kwingila bininge mwanda wa ndeke kulangulukila pa kimano kyami. Pa kwingila bininge nadi nshikilwa bwimwa tandika bipa kumeso kwa yetu njibo kadi nadi nepakundula kyaba kyonso. Bine, kino kyadi kikoka bampotyi bavule.

Na bubine, kwingila bininge kekwashintyilepo mumwekelo wami. Nadi mwīpi, kadi nadi ndwa na tubintu tutyetutye twa mu būmi, pamo bwa kupulula bintu bidi palampe. Bantu badi bandingakanya na bintu bilongele bantu na kunena amba bula bwami butwela’mo dibidi. Nadi netyepelwa, ino bintu byashintyile po nabwenye myaka 14.

Difuku dimo, bana-bakaji babidi Batumoni ba Yehova baile kupota bipa, ebiya bashilula kwifunda nami Bible. kupwa najingulula’mba kuyuka Yehova ne mpango yandi kyo kintu kya mvubu kutabuka kimano kyami. Kino kyankweshe bininge. Ñimbo 73:28 i kisonekwa kyonelemenanga bininge. Kipindi kibajinji kya uno vese kinena amba: “I kinengelele ami kufwena kudi Leza.”

Mafuku matyetye pa kupita’po, twaviluka mu Côte d’Ivoire twaenda mu Burkina Faso, penepa būmi bwami bwashintyile bininge. Potwadi mu Côte d’Ivoire, bantu badi nkebangibidile kumona ñimene ku bipa. Inoko mu kino kibundi kya bweni, nadi’mo mweni kadi kimano kyami kyadi kimweka bu kyeni ku bantu bavule. Bantu badi bantala. Naanza kushala kwinjibo kitatyi kimo mu mayenga mavule. Penepa nashilula kuvuluka’mba i kya kamweno ami kufwena pabwipi na Yehova. Naandikile bilo ya musambo ya Batumoni ba Yehova, kupwa bauntumina muntu muyampe. Ko kumona Nani, mishonele ukandile pa tukutuku waiya kumfundija.

Mashinda a musenga a kotwadi mwadi musenenda kadi mwadi bitoto mu kitatyi kya buyo. Nani wadi upona na tukutuku misunsa mivule paadi wiya kwifunda nami, inoko kakokelepo. Difuku dimo, waunena twende nandi ku kupwila. Najingulwile’mba kutaluka kwinjibo kutalwa na bantu bilomba kūminina. Kadi, pa kunsela kunyuma kwa tukutuku byadi bibweja’ko bulēmi ne tukutuku keyadipo yenda biyampe. Nansha nabya, nakankamikilwe pa kuvuluka kipindi kya bubidi kya mu kisonekwa kyonelemenanga  kinena amba: “Namwene Mfumwami Leza, ke mumpakala mwami.”

Ami ne Nani kitatyi kimo twadi tupona mu bitoto, mwanda wa kusanswa kotwadi tusenswe kupwila ketwadipo tuta mutyima ku ano makambakano. Kine, batambwile na mimungomungo ya buswe ku Njibo ya Bulopwe kwishila na mwadi muntadila bantu ba mu kibundi! Myeji kitema pa kupita’po nabatyijibwa.

Kipindi kya busatu kya mu kisonekwa kyonelemenanga kinena amba “na’mba nsapule mīngilo yobe yonsololo.” Namwene amba busapudi bukekala bu kyami kikoleja kikatampe. Mvulukanga musunsa wami umbajinji onashilwile kusapula ku njibo ne njibo. Banuke ne batame badi bantala, banonda, ne kwelekeja moñendela. Bine, byadi bintapa ku mutyima, inoko kitatyi kyonadi mvuluka amba nabo basakilwa Paladisa pamo bwa ami, kyadi kimpa bukomo bwa kūminina.

Pa kupēleja bintu, nashilula kunyenga na makasa kakinga ka matonto asatu. Musapudi-nami wadi untonona kunyuma, pa kukanda mukuna ebiya pa kutuka mu matēlo nandi wakidila’ko. Nansha busapudi byobwadi bumweka dibajinji bu kikoleja, inoko bwaumpele nsangaji mwenda mafuku, kutabukidila po naikele pania wa lonso mu 1998.

Naendeje bifundwa bivule bya Bible, ne bantu baná mu bifundwa byami babatyijibwe. Kadi kupityidila banabetu nabo baitabije mu bubine! Pa kwivwana bakwabo bendelela byadi bikankamika divule dine pa kitatyi kifwaninwe. Difuku dimo po natambile mu misongo ya maladia, bauntumina mukanda ku Côte d’Ivoire. Po nadi kendi mushilule kwendeja kifundwa kya Bible kya pa kibelo na mwifundi wa ku inivelesite mu Burkina Faso nashidile’kyo tutu mukwabo. Mwenda mafuku mwifundi’wa wavilukila ku Côte d’Ivoire. Bine, naivwene nsangaji po natelekele amba kifundwa’kya ke musapudi wa kubulwa kubatyijibwa!

Le nadi wa kwikwatakanya namani? Kitango kimo kikwasha babilema kya umfundije kusona. Mwadimu umo wamona muswelo onadi ñingila ebiya wanena amba, “Tufwaninwe kukufundija mwa kulongela bifula.” Kupwa baumfundija. Kupwa nalonga mwa kukendela bisandi ne kobo kakupungila’mo bifula kwinjibo. Bantu badi basenswe byami bifula kadi badi balombela’byo ne bakwabo. Nadi ñenda mpoteja’byo ami mwine na tukutuku wa matonto asatu.

Kya bulanda, mu 2004 naimika mwingilo wa bupania. Mwanda na belele muongo. Inoko nadi tambila kitatyi ne kitatyi mu busapudi.

Bantu badi banena amba tukuyukile bu muntu wa mimungomungo. Nadi na bubinga bwa kusangela ke-pantu i kinengelele ami kufwena kudi Leza.​—I Sarah Maiga unena.