Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MUTWE WA MWANDA WA PA KIBALU | LELO BATUMONI BA YEHOVA I BĀNI?

Lelo Batumoni ba Yehova I Bantu ba Muswelo’ka?

Lelo Batumoni ba Yehova I Bantu ba Muswelo’ka?

Tudi mu bulongolodi bwa ntanda yonso kadi ketwikukilangapo na bipwilo bikwabo. Nansha kité kyetu kya ntanda yonso byokidi mu États-Unis, inoko Batumoni ba Yehova bavule badi mu matanda makwabo. Kadi, Batumoni ba Yehova midiyo mwānda bafundijanga bantu Bible mu matanda kintu kya 230, baloñanga namino na kufikidija binenwa bya Yesu bya amba: “Ino myanda miyampe ya Bulopwe ikasapulwa pa ntanda yonso ikelwe na bantu mwanda wa bukamoni ku mizo yonso.”​—Mateo 24:14.

Konso kotudi, tukōkelanga bijila, ne kulonga buninge bwa kuleka kwikuja mu myanda ya ntanda. Mwanda tulondanga bulombodi bwa Yesu ku bene Kidishitu bwa amba ‘kemudipo ba ino ntanda.’ O mwanda ketwielangapo mu myanda ne mu mingilo ya politike nansha kukwatakanya mavita. (Yoano 15:19; 17:16) Na bubine, mu bula bwa Divita II dya Ntanda, Batumoni ba Yehova bakutyilwe ne kususulwa bininge, mwanda wa kupela kobadi bapela kwikuja mu bya ntanda. Eveke umo wa kala mwine Alemanye, walembele amba: “Badi na bubinga bwa kwitela bu ye abo kete bavudile kupela mwanda wa mutyima wabo wa mundamunda mu uno Umbikalo wa Busatu mu Alemanye (IIIème Reich).”

“[Batumoni ba Yehova] badi na būmi butendelwa. Twadi tukokeja kwingidija bano bantu ba kubulwa mushipiditu wa kwisakila pa bitenta bya peulu mu politike​—ino ketwibabwanyapo. . . . Kulēmeka, balēmekele ba lupusa ino bakulupile’mba enka Bulopwe bwa Leza bo bubwanya kupwija makambakano a bantu.”​—Julunale ya Nová Svoboda, Czech Republic.

Inoko, ketwitololangapo. Yesu wālombele kudi Leza pa balondi bandi amba: “Kyonkulomba, ke kwibatalulapo mu ino ntanda.” (Yoano 17:15) O mwanda ubwanya kwitumona twingila, twenda musonko ne ku masomo pamo na bantu bonso.