Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Kiteba kya Mulami  |  Kweji 8 2015

Wiendeje Tamba’nka Pano na Abe Udi mu Ntanda Mipya

Wiendeje Tamba’nka Pano na Abe Udi mu Ntanda Mipya

“Wibasapwile balonge biyampe, . . . amba bakwatyije pototo būmi bwinebwine.”1 TEMOTE 6:18, 19.

ÑIMBO: 125, 40

1, 2. (a) Lelo i bika byotengele mu Paladisa? (Tala kifwatulo ku ngalwilo.) (b) Lelo i kika kiketuletela nsangaji keineneka mu ntanda mipya?

BINE tutengele “būmi bwa nyeke.” Mutumibwa Polo wēbutelele bu “būmi bwinebwine.” (Tanga 1 Temote 6:12, 19.) Kutabukidila, kino kishintulula kukekala na būmi bwa nyeke mu Paladisa pano pa ntanda. I bikomo kufwatakanya mobikekadila kulanguka lubanga lonso na bukomo bwa ngitu buyampe, nsangaji ne maloa. (Isaya 35:5, 6) Langa’po mokikekadila kiyampe kupityija kitatyi na kyobe kisaka ne balunda nobe, kubadila’mo ne boba bakasangulwa. (Yoano 5:28, 29; Bilongwa 24:15) Ukekala na kitatyi kya kwifunda bwino bupya ne kwikala biyampe mu bintu byodi nabyo. Kimfwa, ukefunda bintu bivule bitala sianse. Nansha kwifunda mwa kombela byombanwa bya minjiki nansha mwa kūbakila yobe njibo.

2 Nansha byotutengele bino bintu byonso bilumbuluke, kutōta Yehova ko kuketuletela nsangaji keineneka. Langa’po bidi mukekadila būmi kitatyi bantu bonso pobakamona dijina dya Yehova bu dijila ne kwitabija Yehova bu Muludiki wabo. (Mateo 6:9, 10) Tukasangala pa kumona ntanda miyule bantu babwaninine, monka mwādi musakila’kyo Leza. Kadi fwatakanya’po bidi mobikapēlela kusamba kipwano kya mpwaninine na Yehova bityebitye kufika ne ku bubwaninine!Ñimbo 73:28; Yakoba 4:8.

3. Le tufwaninwe kwiteakanya namani tamba’nka pano?

 3 Tukulupile amba Yehova ukalonga bino bintu byonso bya kutendelwa mwanda “kudi Leza bintu byonso bibwanikanga.” (Mateo 19:25, 26) Shi tusaka kwikala’ko nyeke mu ntanda mipya, kino kyo kitatyi kya ‘kukwatyija pototo’ būmi bwa nyeke. Tuyukile amba mfulo ibafwena pabwipi, o mwanda tufwaninwe kwiendeja mu muswelo ulombola amba tukungile mfulo ibwanya kufika mu kitatyi kyo-kyonso. Tufwaninwe kulonga tamba’nka pano byonso byotubwanya mwanda wa kwiteakanya mwa kukekadila mu ntanda mipya. Tutalei mwa kwiteakenya.

MWA KWITEAKENYA

4. Lelo i muswelo’ka otubwanya kwiteakanya tamba’nka pano mwa kukekadila mu ntanda mipya? Leta kimfwa.

4 Lelo i muswelo’ka otubwanya kwiteakanya tamba’nka pano mwa kukekadila mu ntanda mipya? Shi tukimba kuvilukila mu ntanda ya bweni, kudi bintu byotubwanya kwiteakanya’ko mwa kukekadila mu mine ntanda’ya. Kimfwa, tubwanya kushilula kwifunda ludimi ne bibidiji bya bantu ba mu ntanda’ya. Tubwanya ne kutompa kudya bidibwa byabo bimo. Muswelo umo onka, netu tubwanya kwiteakanya tamba’nka pano mwa kukekadila mu ntanda mipya na kwiendeja na batwe badi’mo kala.Tubandaulei’ko miswelo imoimo ya mwa kwiteakenya.

5, 6. Lelo kukōkela ku buludiki butamba ku bulongolodi bwa Yehova kuketukwasha namani twiteakanye mwa kukekadila mu ntanda mipya?

5 Mu ino ntanda, Satana usakanga bantu bamone amba babwanya kulonga kyonso kyobasaka. Bavule bamonanga amba i biyampe kwikala na bwanapabo ne amba kebasakilwapo kukokela Leza. Ino mwapya tunga? Enka masusu ne kubulwa nsangaji. (Yelemia 10:23) Inoko Yehova i Muludiki wa buswe. Bine, būmi bukekala buyampe kashā mu ntanda mipya kitatyi kikakōkela bantu bonso kudi Leza!

6 Mu ntanda mipya, tukasangela kulonda buludiki butamba ku bulongolodi bwa Yehova bwa kukwasha kwalamuna ino ntanda ke paladisa ya buya bwa dyangi ne kufundija boba bakasangulwa. Yehova uketupa mingilo mivule. Ino le bikekala namani shi boba betutangidile abetulombe kulonga kintu kamukaya kyoketusangedilepo? Le tukakōkela? Lelo tukalonga bukomo bwetu bonso bwa kuvuija ne kusangela mwingilo otupelwe? Pa kwiteakanya ku būmi bwa nyeke mu ntanda mipya, tufwaninwe kukōkekela tamba’nka pano ku buludiki butamba ku bulongolodi bwa Yehova.

7, 8. (a) Mwanda waka tufwaninwe kwingidila pamo na boba betutangidile? (b) Le i kushinta’ka kwalongele bene Kidishitu bamo? (c) Le i bika byotufwaninwe kukulupila bikekala mu ntanda mipya?

 7 Pa kwiteakanya mwa kukekadila mu ntanda mipya, kwitulomba bivule ke enkapo kukōkela ku bulongolodi bwa Yehova. Kadi tufwaninwe kuloelelwa byotudi nabyo ne kwingidila pamo na bakwetu. Kimfwa, shi tubashintwa mwingilo, twiwingilei na mutyima tō pamo na bakwetu kadi na nsangaji ne kuloelelwa. Shi twifunde kwingidila pamo na boba betutangidile tamba’nka pano, nabya mo motukalongela ne mu ntanda mipya. (Tanga Bahebelu 13:17.) Kitatyi kyātwelele bana ba Isalela mu Ntanda ya Mulao, bāpelwe bifuko mwa kwikala. (Umbadilo 26:52-56; Yoshua 14:1, 2) Ketuyukilepo kifuko kikapebwa muntu ne muntu kwa kushikata mu ntanda mipya. Inoko shi twibefunde kwingidila pamo na bakwetu, tukasangela kulonga kiswa-mutyima ko-konso kotukashikata.

8 Langa’po bidi dyese dikekala’ko dya kwingidila mu ntanda mipya ya Leza mu buludiki bwa Bulopwe! Pa kino, tudi na nsangaji ya kwingidila pamo na bulongolodi bwa Yehova tamba’nka pano ne kwingila mwingilo o-onso witupebwa. Kyaba kimo, babwanya kwitushinta mingilo. Kimfwa, bantu bamo ba mu kisaka kya Betele ya mu États-Unis batuminwe mu mwaba. Kadi pa mwanda wa bununu nansha ngikadilo mikwabo, batadi bamo bendakana batuminwe kwingila bu bapania ba pa bula. Badi na nsangaji mu mwingilo wabo mupya, kadi Yehova i mwibesele. Shi tulomba bukwashi bwa Yehova, tulonga byonso byotubwanya mwanda wa kumwingidila ne kwifunda kuloelwa mwingilo o-onso otupebwa, tukekala na nsangaji ne Yehova uketwesela. (Tanga Nkindi 10:22.) Le bikekala namani shi mu ntanda mipya twadi tusaka kwikala ku kifuko kampanda, ino abetulombe kukashikata ku kifuko kikwabo? Mu kino kitatyi, kotukashikata ne byotukengila kebikekalapo na mwanda. Tukafwija’ko’tu bikatampe pa kwikala kotukekala mu ntanda mipya.Nehemia 8:10.

9, 10. (a) Mwanda waka tufwaninwe kukekala na kitūkijetyima mu ntanda mipya? (b) Lelo i muswelo’ka otubwanya kulombola amba tudi na kitūkijetyima tamba’nka pano?

9 Mu ntanda mipya, biketulomba kyaba kimo kwikala na kitūkijetyima. Kimfwa, tubwanya kwivwana amba bantu bamo basangele bininge mwanda babutule babo ne balunda nabo abasangulwa. Inoko, batwe bitulomba kwilaija kusangulwa kwa baswe betu. Shi bidi namino, le tukasangala pamo na bakwetu ne kwikala na kitūkijetyima? (Loma 12:15) Shi twifunde tamba’nka pano kwilaija na kitūkijetyima kufikidila kwa milao ya  Yehova, kiketukwasha tukekale na kitūkijetyima monka.Musapudi 7:8.

10 Tukokeja kadi kwiteakanya mwa kukekadila mu ntanda mipya na kwikala na kitūkijetyima kitatyi kyotutambula bujadiki mu mwivwanino wetu wa bubine bwa mu Bible. Lelo twifundanga myanda mipya ne kwikala na kitūkijetyima shi ketwiivwanijepo senene? Shi tulonga namino, mu ntanda mipya biketupēlela kwikala na kitūkijetyima kitatyi kyonso kitulomba Yehova kulonga bintu bipya byaetusakila.Nkindi 4:18; Yoano 16:12.

11. Mwanda waka tufwaninwe kwifunda kulekela bakwetu tamba’nka pano, ne kino kiketukwasha namani mu ntanda mipya?

11 Muswelo mukwabo wa kwiteakanya mwa kukekadila mu ntanda mipya i kwifunda kulekela bakwetu. Mu bula bwa Buludiki bwa Kidishitu bwa Myaka Kanunu, bikalomba kitatyi pa kunena amba bantu bonso bafikile ku bubwaninine. (Bilongwa 24:15) Lelo tukesanswa ne kwilekela batwe bene na bene? Shi twifunde kulekela bakwetu ne kwikala nabo mu kipwano kilumbuluke tamba’nka pano, biketupēlela ne kulonga namino mu ntanda mipya.Tanga Kolose 3:12-14.

12. Mwanda waka tufwaninwe kwiteakanya tamba’nka pano mwa kukekadila mu ntanda mipya?

12 Mu ntanda mipya, ketukatambulapo nyeke byonso byotusaka, biketulomba padi kwilaija. Biketulomba kwikala na mutyima wa kufwija’ko ne kuloelelwa mu ngikadilo yo-yonso yotukekala’mo. Bine, biketulomba kwikala na ngikadilo imo yonka na ino itufundija Yehova kulombola tamba’nka pano. Nanshi shi twifunde kulombola ino ngikadilo tamba’nka pano, tukalombola amba ntanda mipya i ya bine kotudi ne amba twiteakanyanga mwa kukekadila na būmi bwa nyeke. (Bahebelu 2:5; 11:1) Kadi tukalombola monka amba tusakanga bine kwikala mu ntanda mukekala bantu bonso bakōkele Yehova.

TÁ MUTYIMA KU MWINGILO WA YEHOVA

Sapula myanda miyampe na bupyasakane

13. Lelo i kika kyotukatūla pa kifuko kibajinji mu ntanda mipya?

13 Mu ntanda mipya, tukekala na kintu kyonso kyotusakilwa pa kusangela būmi. Inoko nsangaji yetu mikatampe ikatamba ku kwikala mu kipwano kya pabwipi na Yehova. (Mateo 5:3) Tukavudilwa bya kulonga mu mwingilo wa Yehova ne tukasangela kumwingidila. (Ñimbo 37:4) Nanshi shi tutūle Yehova pa kifuko kibajinji mu būmi bwetu tamba’nka pano, nankyo twiteakanyanga mwa kukekadila mu ntanda mipya.Tanga Mateo 6:19-21.

14. Le i bitungo’ka bibwanya kwitungila bankasampe mu mwingilo wa Yehova?

14 Lelo i muswelo’ka otubwanya kusangela mpata kwingidila Yehova? Muswelo umo bidi i wa kwitungila bitungo. Shi wi nkasampe, langulukila bininge pa muswelo oingidija būmi bobe mwanda wa kwingidila Yehova. Mwene ubwanya kulonga bukimbi mu mabuku etu pa miswelo mishileshile ya mwingilo wa kitatyi kyonso? Ubwanya kwitungila’ko kitungo kimo. * (Tala kunshi kwa dyani.) Wisambe na banabetu kebengidile Yehova myaka mivule mu mwingilo wa kitatyi kyonso. Shi wingidije būmi bobe mu kwingidila Yehova, ukatambula bufundiji bwa kamweno. Buno bufundiji bukakukwasha ukengidile Yehova mu ntanda mipya.

Witungile bitungo mu mwingilo wa Yehova

15. Lelo i bitungo’ka bikwabo byotubwanya kwitungila mu mwingilo wa Yehova?

15 Kudi bitungo bivule byotubwanya kwitungila mu mwingilo wa Yehova. Kimfwa, tukokeja kwitungila kitungo kya kwifunda bwino bupya mu busapudi. Nansha kulonga bukomo bwa kwivwanija senene misoñanya ya mu Bible ne mwa kwiingidijija mu būmi bwetu. Tukokeja kulumbulula butangi bwetu bwa mu kitango kya bantu, mulongelo wetu wa mashikulu ne malondololo etu ku kupwila. Mwanda mwine i uno amba: Shi witungile bitungo mu mwingilo wa Yehova, kino kikakukwasha wikale  na bupyasakane buvule ne kwiteakanya mwa kukekadila mu ntanda mipya.

BŪMI BUYAMPE’PO KASHĀ TAMBA’NKA PANO

Fwija’ko pa bintu byonso bikupele Yehova

16. Mwanda waka kwingidila Yehova kyo kintu kilumbuluke mu būmi?

16 Kitatyi kyotwingidija kitatyi kyetu mwanda wa kwiteakanya mwa kukekadila mu ntanda mipya ya Leza, le tujimijanga būmi buyampe dyalelo? Aa! Kwingidila Yehova bo būmi buyampe’po kashā. Ketumwingidilangapo na kuningilwa na muntu kankenge nansha mwanda’tu wa kukapanda ku kyamalwa kikatampe. Shi tudi mu kipwano kiyampe na Yehova būmi bwetu bwikalanga buyampe kadi bwa nsangaji. Mo mwāetupangidile. Kusanshibwa na Leza ne kuludikwa nandi mu būmi bwetu kyo kintu kilumbuluke kutabuka. (Tanga Ñimbo 63:1-3.) Batwe bonso tubwanya kwikala na nsangaji itamba ku kutōta Yehova na mutyima wetu onso. Bantu bamo bamwingidile mu bula bwa myaka mivule babwanya kunena patōkelela amba buno bo būmi buyampe’po kashā.Ñimbo 1:1-3; Isaya 58:13, 14.

Kimba buludiki mu Bible

17. Lelo bintu bitusangaja ne kwipwija mukose bikekala bya kamweno namani mu Paladisa?

17 Mu Paladisa, tukasangela kupityija kitatyi kampanda pa bintu bitusangaja ne kwipwija mukose. Kadi Yehova ye wētupangile na mutyima wa kwikala na nsangaji, ne i mwitulaye amba ‘ukekutyija mityima ya bintu byonso byumi.’ (Ñimbo 145:16; Musapudi 2:24) Tusakanga kwisangaja ne kukōkolokwa, ino tukebisangela kutabuka shi tutūla kipwano kyetu na Yehova pa kifuko kibajinji. Bikekala muswelo umo onka ne mu ntanda mipya. Nanshi i kya tunangu ‘kukimba bidi nyeke Bulopwe’ ne kuta mutyima ku madyese otutambula mu kwingidila Yehova.Mateo 6:33.

18. Le tukalombola namani amba twi beteakanye mwa kukekadila nyeke mu Paladisa?

18 Mu ntanda mipya, būmi bukekala bulumbuluke kupita’nka ne motwibilangila. Tulombolei kipyupyu kyetu kya kukekala’mo na kwiteakanya ku “būmi bwinebwine” tamba’nka pano. Tulombolei ngikadilo itufundija Yehova kulombola ne kusapula na bupyasakane myanda miyampe. Twimwenei nsangaji idi mu kutūla butōtyi bwa Yehova pa kifuko kibajinji mu bwetu būmi. Tukulupile na mutyima wetu onso amba mu ntanda mipya, Yehova ukalonga kintu kyo-kyonso kyalaile. Shi ke pano twiendejei na batwe badi kala mu ntanda mipya!

^ mus. 14 Tala Les jeunes s’interrogent—Réponses pratiques, volime 2, paje 311-318.