Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Twingilei Mwanda wa Kulumbulula Paladisa ya ku Mushipiditu

Twingilei Mwanda wa Kulumbulula Paladisa ya ku Mushipiditu

“Nkatumbija kifuko kya maulu ami.”ISAYA 60:13.

ÑIMBO: 102, 75

1, 2. Le mu Bisonekwa bya Kihebelu kishima “kitūlo kya maulu” kifunkila pa bika?

YEHOVA LEZA wānene amba: “Diulu kyo kipona kyami, ne panshi kyo kitūlo kya maulu ami.” (Isaya 66:1) Kadi Leza wēsambīle pa “kitūlo kya maulu” andi paānene amba: “Nkatumbija kifuko kya maulu ami.” (Isaya 60:13) Le i muswelo’ka watumbijanga kitūlo kya maulu andi, nansha kwikilumbulula? Ne kino kidi na kamweno’ka ku boba bashikete pa kitūlo kya maulu andi, pano pa ntanda?

2 Mu Bisonekwa bya Kihebelu, kishima “kitūlo kya maulu” i kingidijibwe kadi mwanda wa kulombola tempelo ya kala ya mu Isalela. (1 Bilongwa 28:2; Ñimbo 132:7) Tempelo yādi milumbuluke ku meso a Yehova mwanda kyo kyādi kitako kya butōtyi bwa bine. Kadi yādi ingidijibwa mwanda wa kutumbija Yehova pano pa ntanda.

3. Le kitako kya butōtyi bwa bine dyalelo i bika, ne kyashile kwikala’ko kitatyi’ka?

3 Le kitako kya butōtyi bwa bine dyalelo i bika? Ke njibopo bwa tempelo. I tempelo ya ku mushipiditu, kadi itumbijanga Yehova bininge kutabuka kyūbakwa kikwabo kyo-kyonso. Le tempelo ya  ku mushipiditu i bika? I mpangiko ya Leza i kwasha bantu bekale balunda nandi ne batōtyi bandi. Ino mpangiko i myendeke kupityila’tu’nka pa kinkūlwa kya Yesu. Ino mpangiko yāshilwile mu mwaka wa 29 kitatyi kyābatyijibwe Yesu ne kushingwa māni bu Kitobo Mukatampe wa tempelo ya ku mushipiditu ya Yehova.—Bahebelu 9:11, 12.

4, 5. (a) Le batōtyi ba bine ba Yehova basakanga kulonga bika kukwatañana na Ñimbo 99? (b) Le i kipangujo’ka kyotufwaninwe kwiipangula?

4 Tufwijanga’ko bininge pangala pa mpangiko ya Leza ya butōtyi bwa bine. Tulombolanga kufwija’ko kwetu na kusapwila bakwetu dijina dya Yehova ne kyabuntu kyandi kya kutendelwa kya kinkūlwa. Bine, tudi na nsangaji pa kuyuka’mba kudi bene Kidishitu ba bine midiyo mwānda ne kupita batumbijanga Yehova difuku ne difuku! Nansha bantu bavule ba mu bipwilo byobalañanga bya bubela amba bakatumbijanga Leza momwa mūlu shi abafu, bengidi ba Yehova abo bajingulwile mvubu ya kumutumbija pano pa ntanda tamba’nka pano.

5 Kitatyi kyotutumbija Yehova, twiulanga kimfwa kya bengidi ba kikōkeji ba Leza kilombwelwe mu Ñimbo 99:1-3, 5. (Tanga.) Bana-balume ba kikōkeji pamo bwa Mosesa, Alone ne Samwele bākwatakenye ne pa mfulo mpangiko ya Leza ya butōtyi bwa bine pa kala. (Ñimbo 99:6, 7) Dyalelo, kumeso kwa bashingwe māni bakidi’ko pano pa ntanda kwingila bu babitobo momwa mūlu, bengidilanga Yehova na kikōkeji mu kipindi kya pano pa ntanda kya tempelo ya ku mushipiditu. “Mikōko mikwabo” midiyo ne midiyo ibakwashanga’ko na kikōkeji. (Yoano 10:16) Bino bibumbo byonso bibidi bitōtanga Yehova mwa kimo. Inoko, umo ne umo ufwaninwe kwiipangula’mba, ‘Lelo nkwatakanyanga ne pa mfulo mpangiko ya Yehova itala butōtyi bwa bine?’

KUYUKANIKA KWA BOBA BENGILA MU TEMPELO YA LEZA YA KU MUSHIPIDITU

6, 7. Le i mwanda’ka wāvudīle’ko mu kipwilo kibajinji kya bwine Kidishitu, ne i bika byalongekele mu 1919?

6 Kubwipi kwa myaka 100 pa kupita’po na pāshimikilwe kipwilo kya bwine Kidishitu, bupondo bwāvudile’ko monka mokyālailwe. (Bilongwa 20:28-30; 2 Tesalonika 2:3, 4) Pa kupwa kwa kino kitatyi, byāikele bikomo bininge kujingulula batōtyi ba bine ba Leza. Papityile myaka tutwa na tutwa kumeso kwa Yehova kwingidija Yesu mwanda wa kuyukanya bene na bubine badi bengidila Leza mu tempelo Yandi ya ku mushipiditu.

 7 Mu 1919, boba baitabijibwe na Leza ne badi bengila mu tempelo yandi ya ku mushipiditu bayukanikile. Balongele bujadiki buvule mwanda wa butōtyi bwabo bwikale bwitabijibwe senene na Yehova. (Isaya 4:2, 3; Malaki 3:1-4) Enka namino kimonwa kyāmwene mutumibwa Polomyaka tutwa na tutwa kunyuma kyashilula kufikidila.

8, 9. Le “paladisa” yāmwene Polo mu kimonwa i bika?

8 Kimonwa kya Polo i kilombolwe mu 2 Kodinda 12:1-4. (Tanga.) Mu kino kimonwa, Yehova wālombwele Polo bintu byādi bya kulongeka mu mafuku a kumeso. Le “paladisa” yāmwene Polo i bika? Dibajinji, ibwanya kufunkila pa Paladisa minemine isa kwikala’ko panopano ponka pano pa ntanda. (Luka 23:43) Dya bubidi, ibwanya kufunkila pa paladisa mibwaninine ya ku mushipiditu ikekala’ko mu ntanda impya. Ne dya busatu, ibwanya kufunkila pa ngikadilo ya kutendelwa ya mūlu mu “paladisa ya Leza.”—Kusokwelwa 2:7.

9 Penepa, mwanda waka Polo wānene amba, “waivwana myanda keineneka kadi keitabijibwepo muntu kwisamba”? Mwanda kekyādipo kitatyi kya kushintulula kamo ne kamo ka bintu bya kutendelwa byaāmwene mu kimonwa. Inoko dyalelo Yehova i mwitupe mukenga wa kusapwila bakwetu madyese adi na bantu bandi tamba’nka pano!

10. Mwanda waka paladisa ya ku mushipiditu ne tempelo ya ku mushipiditu ke kintupo kimo?

10 Divule dine twisambilanga pa paladisa ya ku mushipiditu, le ayo mine i bika? I ngikadilo ya kutendelwa ya ndoe ipēne Leza ku bantu bandi. Nanshi paladisa ya ku mushipiditu ne tempelo ya ku mushipiditu i bishile. Tempelo ya ku mushipiditu i mpangiko ya Leza ya butōtyi bwa bine. Paladisa ya ku mushipiditu ilombola patōka boba betabijibwe na Leza ne bamutōta mu tempelo yandi ya ku mushipiditu.—Malaki 3:18.

11. Le i dyese’ka dyotudi nadyo dyalelo?

11 I kisangaja’po kashā kuyuka’mba tamba 1919, Yehova i muleke bantu bampikwa kubwaninina batamije, bakomeje ne kwendeleja kumeso paladisa ya ku mushipiditu. Lelo nobe ukwashanga ku kwingila uno mwingilo wa kutendelwa? Le ukwete na bulēme dyese dya kwingila na Yehova mwanda wa kumutumbija pano pa ntanda?

YEHOVA ULUMBULULANGA BININGE BULONGOLODI BWANDI

12. Le tuyukile namani’mba Isaya 60:17 i mufikidile? (Tala kifwatulo ku ngalwilo.)

12 Mupolofeto Isaya wālaile’mba kukekala kushinta kuvule ne bujadiki bwa kutendelwa mu kipindi kya pano pa ntanda kya bulongolodi bwa Leza. (Tanga Isaya 60:17.) Bene Kidishitu bankasampe nansha bapya bekalanga’tu batanga nansha kwivwana myanda itala kuno kushinta. Inoko kudi batutu ne bakaka bavule bekele na dyese dya kwimwena buno bujadiki bwa kutendelwa! Bano batōtyi ba kikōkeji bakulupile’mba Leza wingidijanga Yesu Mulopwe wetu mwanda wa kwendeja ne kuludika bulongolodi Bwandi! Kitatyi kyotuteja myanda yemwenine bano bene Kidishitu baswe, tukomejanga lwitabijo ne kikulupiji kyetu mudi Yehova.

13. Kukwatañana na Ñimbo 48:12-14, le i bika byotufwaninwe kulonga?

13 Bene Kidishitu bonso ba bine bafwaninwe kusapwila bakwabo myanda itala bulongolodi bwa Yehova. Bine i kingelengele mwanda nansha byotushikete mu ntanda imbi ya Satana, twikele mu bu bana na bana bwa ndoe ne bumo! Bine, tukasangela kusapwila “nkongo īkāyako” myanda itala bulongolodi bwa Yehova ne pa paladisa ya ku mushipiditu!—Tanga Ñimbo 48:12-14.

14, 15. Le i bujadiki’ka bwaikele’ko pa kupwa kwa 1970, ne bulongolodi bwamwenine’mo namani?

14 Banunu bavule mu bipwilo byetu bemwenine bujadiki bwalumbulwile bininge kipindi kya pano pa ntanda kya bulongolodi  bwa Yehova. Bavulukanga kitatyi kyadi bipwilo na mwingidi wa kipwilo pa kyaba kya kitango kya bakulumpe, kitatyi kyadi matanda na mwingidi wa musambo pa kyaba kya Komite wa Musambo, ne kitatyi kyadi kiletwa bulombodi na mwimaniji wa Sosiete Watch Tower pa kyaba kya Kitango Kyendeji kya Batumoni ba Yehova. Nansha bano batutu bonso byobadi na bantu ba kikōkeji bebakwasha, muntu umo kete ye wadi ukwata butyibi mu bipwilo, ku mabilo a misambo ne ku kité kikatampe kya ntanda yonso. Pa kupwa kwa 1970, kwaikala bujadiki bulombola’mba bisumpi bya bakulumpe bidi na kiselwa kya kukwata butyibi pa kyaba kya muntu umo.

15 Mwanda waka buno bujadiki bwaletele byabuyabuya mu bulongolodi? Mwanda bwadi bwimanine pa kwivwanija kuyampe kwa Bisonekwa. Pa kyaba kya kwikala muntu umo ukwata butyibi bonso, bulongolodi bwamwenine mu ngikadilo miyampe ya bakulumpe bonso, nansha “bantu bu byabuntu,” batūdilwe’ko na Yehova.—Efisesa 4:8; Nkindi 24:6.

Yehova upānga bantu ba ntanda yonso buludiki bobasakilwa mu būmi (Tala musango 16, 17)

16, 17. Le i bujadiki’ka bwa panopano bukusangeje, ne mwanda waka?

16 Tompa’po bidi kulangulukila pa bujadiki bwa panopano bwikele’ko mu mabuku etu. Tusangelanga kwabanya mabuku akwasha bantu ne ebasangaja mu mwingilo wetu wa busapudi. Kadi langulukila pa muswelo otwingidija bintu bya busendwe bya panopano mwanda wa kusapula myanda miyampe. Kimfwa, diteba dya jw.org i dikwashe bantu bavule basokole bukwashi bwine bobadi basakilwa. Mu buno bujadiki bonso, tumona’mo’mba Yehova utele bantu bininge mutyima ne wibasenswe.

17 Netu tutendelanga bujadiki bwaletelwe pa mwanda utala kupwila amba twikale’ko na kitatyi kya kulonga butōtyi bwa kisaka nansha kifundwa kya pa kasuku. Kadi tutendelanga kushinta kwikele’ko pa mwanda utala mpangiko ya bitango byetu. Ilumbulukilanga’ko mwaka ne mwaka! Kadi tufwijanga’ko  pa bufundiji botutambula ku masomo mavule a Bible. Mu buno bujadiki bonso, i kimweke patōka amba Yehova wendejanga bulongolodi bwandi ne amba wendelelanga na kulumbulula bininge paladisa ya ku mushipiditu!

MUSWELO OTUKWASHANGA KU KULUMBULULA BININGE PALADISA YA KU MUSHIPIDITU

18, 19. Le i muswelo’ka otubwanya kukwasha ku kulumbulula paladisa ya ku mushipiditu?

18 Yehova i mwitupe dyese dya kukwasha ku kulumbulula bininge paladisa yetu ya ku mushipiditu. Ino le i muswelo’ka otuloñanga kino? I na kusapula na bupyasakane myanda miyampe ya Bulopwe ne kulonga bana ba bwanga bavule. Kyaba kyonso kyotukwasha muntu kwikala mwingidi wa Leza, tukwashanga ku kutanta kwa paladisa ya ku mushipiditu.—Isaya 26:15; 54:2.

19 Kadi tukwashanga ku kulumbulula paladisa ya ku mushipiditu kitatyi kyotulonga bukomo bwa kulumbulula bumuntu bwetu bwa bwine Kidishitu. Kino kitukwashanga tulengeje paladisa ya ku mushipiditu ikoke bantu bakwabo. Divule dine, ke buyukipo’tu bwetu bwa mu Bible bukokanga dibajinji bantu mu bulongolodi ne kudi Yehova ne Yesu, ino bakokwanga dibajinji na mwiendelejo wetu utōka ne ndoe yetu.

Ubwanya kukwasha ku kutanta kwa paladisa ya ku mushipiditu (Tala musango 18, 19)

20. Kukwatañana na Nkindi 14:35, lelo tufwaninwe kusumininwa kulonga bika?

20 Ba Yehova ne Yesu basangalanga bininge pobamona paladisa yetu milumbuluke ya ku mushipiditu dyalelo. Nsangaji yotwivwana pano itamba ku kwiilumbulula bininge, i nsolweji’tu ya yoya yotukekala nayo mwenda mafuku potukengila mwanda wa kwalamuna ntanda ikale ke paladisa minemine. Tufwaninwe nyeke kuvuluka Nkindi 14:35, mwine unena mba: “Mulopwe utōkelwa pa mutyima mwingidi wa ñeni, (Dibuku Dijila).” Nanshi twikalei na tunangu potwingila bininge mwanda wa kulumbulula paladisa ya ku mushipiditu!