Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MUTWE WA MWANDA WA PA KIBALU | MWA KULWILA NA KUZUMBIJA MUTYIMA

Kuzumbija Mutyima Pangala pa Lupeto

Kuzumbija Mutyima Pangala pa Lupeto

Paul shabana wa bana babidi usekununa amba, “Pakandile bukidibukidi lupoto lwa bintu mu yetu ntanda, byakudya byakandile bei ne kusakana. Twadi twitūnga milongo mu bula bwa mansá mavule, ino divule dine byakudya byadi bipwa kumeso kwa kufika pa kitatyi kyetu kya kupota. Bantu banyene nzala, kadi bamo badi bapona’yo mu bipito. Lupoto lwa bintu bya kyalwilo lwakandile ke mamidiyo ne mamidiyala. Mfulo mfulō, lupeto lwa mu yetu ntanda lwatyepa bulēme. Najimije konte yami ya ku banki, makuta onadi mfuta mwanda wa mukanda wa kwikinga nao ku byaka ne a pansho.”

Paul

Paul wayukile amba, pa kusaka kisaka kyandi kimone bidibwa, wadi unenwe kwingidija “ñeni mituntulu.” (Nkindi 3:21) Unena amba, “Nadi ñingilanga mu myanda itala mudilo wa nshinga, ino naitabije mwingilo o-onso onadi nsokola, enka ne wa mfutwa mityetye. Ku twaji tumo badi bamfuta’ko byakudya nansha bintu bya mwinjibo. Shi bamfuta masabuni aná malamala, nadi ñingidija’ko abidi, makwabo nao napotoloja’o. Ku mfulo, napota twana twa banzolo 40. Ato pa kutama netupotoloja, kupwa napota tukwabo 300. Mwenda mafuku, nakashintyija banzolo 50 ku mifuko ibidi ya bukula ya makilo 50. Na ino mifuko, nadishishe kyami kisaka ne bisaka bikwabo bivule mu bula bwa kitatyi kilampe.”

Kadi Paul wajingulwile amba kintu kya mvubu kifwaninwe kulonga muntu yense i kukulupila mudi Leza. Shi tulonga byobya bitulomba Leza kulonga, nandi uketukwasha. Yesu wēsambīle pa kusokola bintu bya kamweno mu būmi amba: “Lekai kusela mutyima kūlu, mwanda . . . Shenu uyukile amba musakilwa bino bintu.”Luka 12:29-31.

Kya bulanda, mwanda walwana na Leza mukatampe, Satana, ongolanga ntanda yonso ielele bininge mu kukambakena bintu bya ku ngitu. Bantu bazumbijanga mutyima pa bisakibwa byabo, byendele’mo ne byampikwa kwendela’mo, ne kukimba kusokola bintu byokebasakilwapo. Bavule batwelanga mu mapu, ne kwimwena dishinda dibi dya bu “mwapudi i mupika wa mwapulwa.”Nkindi 22:7.

 Bantu bamo bakwatanga butyibi bubi. Paul unena amba, “Balodakani netu bavule bashile bisaka byabo ne balunda nabo mwanda wa kwenda kukakimba būmi buyampe mu ntanda ya bweni. Bamo baendele pampikwa ne mikanda mine ya kuviluka nayo, bakomenwa’nka ne kusokola kaji. Divule dine badi bafyama bampulushi ne kulāla mu bipito. Kebapelepo Leza mukenga wa kwibakwasha. Inoko batwe twasumininwe kulwa na ano makambakano a lupeto pamo mu kisaka, kupityila ku bukwashi bwa Leza.”

LONDA MADINGI A YESU

Paul wendelela na kunena amba: “Yesu wānene amba: ‘Kemwakikambakanyai mityima nansha dimo mwanda wa dya kesha, ke-pantu dya kesha dikekala na makambakano adyo. Difuku ne difuku didi na bibi byadyo.’ O mwanda milombelo yami ya difuku ne difuku yadi ya kulomba Leza ‘etupe bidibwa byetu bya dyalelo’ kutyina twakafwa. Bine, wetukweshe monka mwālaile’kyo Yesu. Ketwadipo kyaba kyonso tutana byotwadi tusaka. Difuku dimo, netūngile ku mulongo pampikwa kuyuka ne bine byobapoteja. Kitatyi kyami kibwana kya kupota, namona amba badi bapoteja mulobele wa majiba. Nkiusakengapo. Inoko, ye otwadile kine kyolwa’kya. Mfwija’ko Leza mwanda mu bula bwa kino kitatyi kyonso, kyami kisaka ke kyalēlepo na nzala difuku nansha dimo.” *

Leza ulaile amba: “Nkikakushiyepo nansha dimo kadi nkikakwelapo nansha dimo.”Bahebelu 13:5

“Pano’ko bidi, bintu bibetupelela mu mwanda utala misokwe. Inoko ku myanda yetutene twibaboile’ko ñeni ya amba kintu kya mvubu mpata kya kulwa nakyo na kuzumbija mutyima i kukulupila mudi Leza. Yehova * ukendelela nyeke kwitukwasha kitatyi kyonso kyotwendelela kukimba kulonga kiswa-mutyima kyandi. Twemwenine bubinebine bwa Ñimbo 34:8 inena amba: ‘Tompai mumone’mba Yehova i muyampe.’ Pano, ketutyinangapo kulwa monka na makambakano atala misokwe.

Leza ukwashanga bantu ba kikōkeji basokole ‘bidibwa byabo bya dyalelo’

“Pano tubaivwanija biyampe amba bintu bisakilwa bantu pa kwikala bōmi, ke kajipo nansha lupeto, ino i bidibwa. Tutengele na kipyupyu kitatyi kikafikidila mulao wa Leza wa amba: ‘Kukēkalanga bungibungi bwa mebele panopantanda.’ Pano’ko bidi, ‘shi tudi na bya kudya, bya kuvwala ne mwa kwikala, tuloelelwei bino bintu.’ Tukankamikwanga na bino binenwa bya mu Bible bya amba: ‘Mwikadilo wa būmi bwenu wikale wa kubulwa kusanswa lupeto, koku muloelelwa bintu byomudi nabyo pano. Mwanda aye wānenene amba: “Nkikakushiyepo nansha dimo kadi nkikakwelapo nansha dimo.” Amba twikale na bukankamane bukatampe ne kunena’mba: “Yehova i mukwashi wami; nkikakwatwapo moyo.”’” *

Bilomba lwitabijo lwa binebine pa ‘kunanga na Leza’ na mwalongele Paul ne kisaka kyandi. (Ngalwilo 6:9) Ekale pano tususukanga na makambakano a misokwe nansha ekale tukatanwa nao mu mafuku a kumeso, kimfwa kya Paul kya lwitabijo ne tunangu twandi twa bine bitupei bufundiji bwa kamweno.

Ino le bikekala namani shi tuzumbijanga mutyima pangala pa kisaka?

^ mus. 10 Yehova i dijina dya Leza, mo mokilombwedilwe mu Bible.