Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Kiteba kya Mulami  |  Kweji 7 2015

 MUTWE WA MWANDA WA PA KIBALU | MWA KULWILA NA KUZUMBIJA MUTYIMA

Kuzumbija Mutyima pa Mwanda wa Kisaka

Kuzumbija Mutyima pa Mwanda wa Kisaka

Janet usekununa amba, “Aye’tu tata ufwa papita mafuku matyetye, wami mulume wanombola amba wamone mukaji mukwabo. Kepejije, wakomba twandi tonso ne kunshiya na bana babidi pampikwa ne kwitudyumuna kwine nansha kwitulaya.” Janet wasokola kaji, inoko mfutwa yandi keyadipo ibwanya kuvuija bisakibwa bya ku njibo. Kadi kasusukilepo’tu enka na makambakano a lupeto, ino wadi ne na makambakano makwabo. Uvuluka amba, “Kuzumbija mutyima pa bino biselwa byonso byondwa nabyo bunka byadi bimpite mutwe. Nadi netopeka amba kivuijangapo senene bisakibwa bya bami bana na mulongela’byo bambutwile bakwabo. Enka ne pano pene, neipangulanga mwitumwena bantu bakwabo ami ne bami bana. Le beipangulanga shi nalongele bukomo bwami bonso bwa kulama bulubo bwami?

Janet

Milombelo yakweshe Janet atyepeje’ko milangwe yandi ne kutamija kipwano kyandi na Leza. “Bufuku bo bwine bonadi nsusuka bininge, pokwadi’tu kutalala nyā popene kuzumbija mutyima kwaningila’ko. Kulombela ne kutanga Bible kwaunkweshe mone tulo. Kisonekwa kyonadi nswele bininge i kya Fidipai 4:6, 7 kinena amba: ‘Kemwakikambakanyai mityima pa kintu nansha kimo, inoko umbyonso yukijai Leza byomulomba mu milombelo ne kwabija pamo ne kufwija’ko; kadi ndoe ya Leza itabukile milangwe yonso ikalama mityima yenu ne ñeni yenu.’ Divule dine nadi nombela bufuku bonso kadi nasengelwe na ndoe ya Yehova.”

Binenwa bisenga bya Yesu bitala pa milombelo bya mu Busapudi bwandi bwa ku Lūlu, bitala pa kuzumbija kwa mutyima ko-konso bya amba: “Shenu Leza uyukile bine byomusakilwa ne banwe bene kemwamulombele’byo.” (Mateo 6:8) Inoko netu tufwaninwe kumulomba. Milombelo kyo kintu kibajinji kibwanya ‘kwitufwenya kudi Leza.’ Le i bika bikalupuka mu kulonga namino? “Nandi ukemufwena.”Yakoba 4:8.

Bine, milombelo ituletelanga byabuyabuya bivule, ke enkapo’tu kwiivwana biyampe kutamba ku kulombola kuzumbija kwetu kwa mutyima. Kadi Yehova mwine “wivwananga kulombela,” ukalonga’po  kintu pangala pa boba bonso bamukimba na lwitabijo. (Ñimbo 65:2) O mwanda mwine Yesu wāfundije balondi bandi “kulombela nyeke ne kuleka’byo mpika.” (Luka 18:1) Tufwaninwe kulomba nyeke buludiki bwa Leza ne bukwashi bwandi, na kukulupila amba uketupala mpalo pangala pa lwitabijo lwetu. Ketufwaninwepo nansha dimo kutatana kusaka nansha bukomo bwandi bwa kulonga bintu. ‘Kulombela kitatyi kyonso’ namino kulombola amba tudi na lwitabijo lwa binebine.1 Tesalonika 5:17.

MUSHINTULWILA BINE KWIKALA NA LWITABIJO

Le lwitabijo lwine i bika? Mu lwitabijo mubadilwa ‘kuyuka Leza’ bu muntu udi’ko bine. (Yoano 17:3) Tuloñanga kino dibajinji na kwikala na milangwe ya Leza kupityila ku Bible. Tuyukile amba witumonanga batwe bonso ne kadi usakanga kwitukwasha. Kadi, lwitabijo lwa binebine lulomba bivule, ke enkapo’tu kuyuka myanda kampanda itala padi Leza. Bilomba ne kusamba nandi kipwano na bulēme. Monka musambilanga bantu bulunda, netu ketubwanyapo kusamba kino kipwano mu difuku dimo. Lwitabijo lwetu ‘lwendanga lutamina’ko’ potwenda tuyukila’ko bivule pa bimutala, kulonga “bimusangaja,” ne kwimwena bukwashi bwandi mu būmi. (2 Kodinda 10:15; Yoano 8:29) Lwitabijo lwa uno muswelo lo lwakweshe Janet alwe na kuzumbija mutyima.

“Janet unena amba, “Na bubine, kintu kyankweshe ntamije lwitabijo lwami i kumona bukwashi bwa Yehova mu būmi bwami. Kitatyi kivule twalwile na bukondame, bwine bwamwekele bu bukomo kūminina. Na kulombela kitatyi kyonso, Yehova wadi witushitwila dishinda dya kutambila’mo, dyonkyadipo nangila nansha dimo. Kitatyi kyomufwija’ko, kimvulujanga bintu bivule byaunongele. Wadi nyeke witukwasha pa kitatyi kifwaninwe, kadi’nka mu kitatyi kyotusakilwa bukwashi. Kadi waumpele balunda ba bine bene Kidishitu bana-balume ne bana-bakaji. Bekalanga nami nyeke kadi i bimfwa biyampe ku bami bana.” *

“Najingulula kine kinenena Yehova mu Malaki 2: 16 amba, ‘Nashikwe kupinga mukaji.’ I kulubila bininge mulume nansha mukaji wampikwa mwanda. Ke padi myaka mivule na panshile wami mulume, inoko kyaba kimo binkambakanyanga. Shi kebinkambakanya, noñanga bukomo bwa kulonga’ko kintu kampanda kya kukwasha muntu mukwabo, kadi divule dine kyankwasha ne ami mwine.” Janet pa kwingidija musoñanya wa mu Bible utala kwitolwela pa bunka, kino kyamukweshe atyepeje kuzumbija mutyima. *Nkindi 18:1.

Leza i ‘shandya bakubulwa bashabo ne . . . bakaji ba bafu.’Ñimbo 68:5

Janet unena amba, “Busengi bwami bukatampe, bwatambile ku kuyuka amba Leza i ‘shandya bakubulwa bashabo ne . . . bakaji ba bafu.’ Kaketushiyepo nansha dimo na mwetushidile wami mulume. (Ñimbo 68:5) Janet uyukile amba Leza ketutompangapo “na bintu bibi.” Ino, upānga tunangu “bonso na mutyima tō” ne “bukomo butabukile bwikalanga na bantu” mwanda wa kwitukwasha tunekenye kuzumbija kwetu kwa mutyima.Yakoba 1:5, 13; 2 Kodinda 4:7.

Ino le bikekala namani shi tuzumbijanga mutyima pa būmi bwetu budi mu kyaka?

^ mus. 9 Tala 1 Kodinda 10:13; Bahebelu 4:16.

^ mus. 10 Shi usaka kuyukila’ko myanda mikwabo ya mwa kulwila na kuzumbija mutyima, tala bishinte binena amba, “Lelo Ulamine Bobe Būmi?” mu Réveillez-vous! wa Kweji 7, 2015 udi pa diteba dya Entelenete dya www.jw.org.