Lelo bintu bibi bitambile kwepi?

Lelo i ani wātompele yesu alonge bintu bibi?—mateo 4:8-10

Na bubine, bantu basakanga kwikala mu ndoe, pampikwa budimbidimbi kadi ba ngikadilo miyampe. Penepo, mwanda waka tumonanga divule dine bukalabale, bukondame, ne butapani? Myanda ivwanwa dyalelo i enka mibi. Le kudi muntu kabidye utononanga bantu balonge bibi?Tanga 1 Yoano 5:19.

Lelo Leza wāpangile bantu na mutyima wa kulonga bibi? Aa, Yehova Leza wāpangile bantu mu kimfwa kyandi, kadi na mutyima wa kwiula buswe bwandi. (Ngalwilo 1:27; Yoba 34:10) Kadi Leza wāpangile bantu na bwanapabo bwa kwitongela. Kitatyi kyātongele bambutwile betu babajinji kulonga bibi, bafutulwile kimfwa kya Leza, ebiya baikala bampikwa kubwaninina. Twibapyane ngikadilo ya bubi kobadi.Tanga Kupituluka 32:4, 5.

Lelo tukekala nyeke tulonga bibi?

Leza usakanga tukomene ngikadilo yetu imbi. (Nkindi 27:11) O mwanda witufundijanga mwa kwepukila kulonga bibi ne mwa kutanina nsangaji ya bine. Pano’ko bidi, ketukokejapo kwiula buswe bwa Leza katwa pa katwa.Tanga Ñimbo 32:8.

Nansha pano byokudi bintu bibi bivule, Leza i mwibileke’ko mu kitatyi kityetye mwanda wa bantu bonso bamone bipa bibi bilupuka’ko. (2 Petelo 3:7-9) Inoko, panopano ponka ntanda ikayula bantu ba nsangaji bakōkele Leza.Tanga Ñimbo 37:9-11.