Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MUTWE WA MWANDA WA PA KIBALU | LELO UKASAKA KWIFUNDA BIBLE?

Mwanda Waka Twifunde Bible?

Mwanda Waka Twifunde Bible?
  • Le būmi budi na kitungo’ka?

  • Mwanda waka bantu basusukanga ne kufwa?

  • Le i bika bitutengele kumeso?

  • Lelo Leza untele mutyima?

Lelo kashā kodi mwiipangule bipangujo pamo bwa bino? Shi i amo, kudipo bunka. Bantu ba ntanda yonso beipangulanga bino bipangujo bikatampe mu būmi. Lelo ubwanya kutana malondololo?

Bantu midiyo ne midiyo babwanya kunena’mba, “I amo!” Mwanda waka? Mwanda batene malondololo obadi bakimba ku bipangujo byabo mu Bible. Lelo usaka kuyuka byobya binena Bible? Nankyo ukokeja kwitabija mpangiko ya kifundwa kya Bible yendejibwanga na Batumoni ba Yehova. *

Bine, mu mwanda utala kukimba mu Bible, bantu bamo banenanga amba: “Ne muvudilwe bya kulonga.” “I bikomo bininge.” “Nekakanga kwitabija.” Inoko bakwabo badi na mumweno mwishile. Betabijanga kwifunda byobya bifundija Bible. Tutalei’ko bimfwa bimo:

  • “Nadi mpwilanga mu kipwilo kya Katolika ne mu Mishoni, mu tempelo ya Sikh, ne mu kuva ya bene Buddha kadi nafundile teoloji ku inivelesite. Nansha nabya, bipangujo byami bivule bya ku mushipiditu byadi kebyalondolwelwe. Ebiya Kamoni wa Yehova umo waiya ku yami njibo. Byonasangedile malondololo andi a mu Bible, naitabije kifundwa kya Bible.”—Gill, Angeletele.

  • “Nadi neipangulanga bipangujo bivule bitala pa būmi, inoko malondololo a pashitele wa kyetu kipwilo keadipo amfika. Inoko, Kamoni wa Yehova umo walondolwele ku bipangujo byami byonso na Bible kete. Paungipangwile shi nsaka kuyukila’ko bivule, naitabije na nsangaji yonso.”—Koffi, Bénin.

  • “Nadi nsakanga kuyuka ngikadilo idi’mo bafu. Nadi nkulupile amba bafu babwanya kususula bōmi, inoko nadi nsaka kuyuka munena’po Bible. Ebiya nashilula kwifunda Bible na mulunda nami wadi Kamoni.”—José, Brezile.

  • “Natompele kutanga Bible, inoko nkyadipo mwivwana. Kupwa Batumoni ba Yehova baiya kumpempula ne kunshintulwila bupolofeto buvule bwa mu Bible. Nasakile kuyukila’ko bikwabo byonadi wa kwifunda.”—Dennize, Meksike.

  • “Nadi neipangulanga shi bine Leza untele mutyima. Kupwa nakwata butyibi bwa kulombela kudi Leza wa mu Bible. Bukya lubanga Batumoni baiya ku yami njibo, nami naitabija kifundwa kya Bible.”—Anju, Nepale.

Ino myanda mimweke ituvuluja binenwa bya Yesu bya amba: “Ba katōkwe i boba bayukile amba bafwaninwe kwifunda myanda ya Leza.” (Mateo 5:3) Bine, bantu tamba kubutulwa kwabo basakanga kuyuka Leza. I enka Yehova kasuku kandi ye ubwanya kuvuija kino kisakibwa, kadi uvuijanga’kyo kupityila ku Bible, Kinenwa kyandi.

Penepa, kifundwa kya Bible kilomba bika ne bika? Le ubwanya kumwena’mo namani? Bino bipangujo bisa kulondololwa mu kishinte kilonda’ko.

^ mus. 8 Yehova dyo dijina dya Leza na mokilombwedilwe mu Bible.