Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Le Kipwano Kyobe na Yehova I kya Bine Namani?

Le Kipwano Kyobe na Yehova I kya Bine Namani?

“Fwenai kudi Leza, nandi ukemufwena.” —YAK. 4:8.

1. Mwanda waka tufwaninwe kukomeja kipwano kyetu na Yehova?

LELO wi Kamoni wa Yehova mwipāne, kadi mubatyijibwe? Shi i amo, nankyo udi na kintu kilēme—ke kipwano kyobe na Leza kadi. Inoko, kino kipwano kitambibwanga bulwi na ntanda ya Satana ne kubulwa kubwaninina kwetu. Bene Kidishitu bonso balwanga na ino myanda. Nanshi, kipwano kyetu na Yehova kifwaninwe kukomejibwa.

2. (a) Le kipwano i bika? (Tala kunshi kwa dyani.) (b) Le i muswelo’ka otukokeja kukomeja kipwano kyetu na Yehova?

2 Le kipwano kyobe na Yehova i kya bine namani? Le usaka kwikikomeja? Yakoba 4:8 ukulombola byofwaninwe kulonga amba: “Fwenai kudi Leza, nandi ukemufwena.” Yuka amba uno mwanda utala bantu babidi. * Shi tutabule matabula a kufwena Leza, nandi uketufwena. Kuno kwifwena kwa kyaba ne kyaba, kukakomeja kipwano kyetu na Yehova. Pa kino, kino kipwano kikekala kya bine kotudi. Tukatamija kikulupiji na kyokya kyādi  na Yesu paānene amba: “Yewa wantumine i wa bine . . . Ami muyukile.” (Yoa. 7:28, 29) Le penepo, i matabula’ka mapotoloke okokeja kutabula mwanda wa kufwena kudi Yehova?

Le ubwanya kwisamba na Leza namani? (Tala musango 3)

3. Lelo i bika bitukwasha twisambe na Yehova?

3 Kwisamba kyaba ne kyaba na Yehova i kintu kya mvubu pa kufwena kwadi. Le ukokeja kwisamba na Leza muswelo’ka? Le i muswelo’ka owisambanga na mulunda nobe udi kulampe? Na bubine, mwilembelanga mikanda ne kwisamba ku telefone kyaba ne kyaba. Wisambanga na Yehova kupityila ku milombelo ya kyaba ne kyaba. (Tanga Ñimbo 142:2.) Kadi ulekanga Yehova esambe nobe potanga kitatyi ne kitatyi Kinenwa kyandi kilembwe ne kulangulukila’po. (Tanga Isaya 30:20, 21.) Shi ke pano, tubandaulei uno muswelo wa kwisamba moukomejeja kipwano kyetu na Yehova, na kwikilengeja kikale kya bine.

KIFUNDWA KYA BIBLE —YEHOVA WISAMBA NOBE

4, 5. Lelo Yehova wisambanga nobe kupityila ku Kinenwa kyandi namani? Leta kimfwa.

4 Na bubine witabije amba mu Bible mudi musapu wa Leza ku bantu bonso. Ino le Bible ukulombolanga abe ne byofwaninwe kulonga pa kufwena kudi Yehova? Na bubine i amo. Muswelo’ka? Potanga Bible ne kwifunda’ye kitatyi ne kitatyi, bandaula muswelo oitaba ku byobya byanena ne kumona muswelo okokeja kwibingidija mungya ngikadilo yodi’mo; nabya ukaleka Yehova esambe nobe kupityila ku Kinenwa kyandi. Kino kikakukwasha wikale mu kipwano kya pabwipi nandi.—Bah. 4:12; Yak. 1:23-25.

5 Kimfwa tanga ne kulangulukila pa binenwa bya Yesu bya “[kuleka] kwibīkila byabulēme pano pa ntanda.” Shi ubamone’mba mu būmi bobe utūdile kala tumweno twa Bulopwe pa kifuko kibajinji, ukamona’mba Yehova ukutendelanga. Inoko, shi ubamone’mba ufwaninwe kupēleja būmi bobe ne kutangidija tumweno twa Bulopwe kumeso, nabya Yehova ukudyumunanga pantu pofwaninwe kwilemununa mwanda wa umufwene.—Mat. 6:19, 20.

6, 7. (a) Le kifundwa kya Bible kidi na lupusa pa buswe botuswele Yehova ne bwaetuswele batwe muswelo’ka? (b) Le i kitungo’ka kyotufwaninwe kwikala nakyo potwifunda pa kasuku?

6 Kwifunda Bisonekwa kekwitukwashangapo’tu enka kusokola popa potufwaninwe kwilumbulula ku mushipiditu. Kukomejanga ne mutyima wetu wa kufwija’ko pa buyampe bwa mashinda a Yehova, na kwitulengeja tumusanswe bininge. Kadi shi tubasanswa  Leza bininge, nandi uketusanswa bininge, namino kipwano kyetu nandi kikakomejibwa.—Tanga 1 Kodinda 8:3.

7 Inoko shi tusaka’mba tufwene kudi Yehova, i biyampe twifunde na kitungo kiyampe. Yoano 17:3 unena amba: “Bekale kukuyuka abe, Leza umo kete wa bine, ne yewa owatumine, Yesu Kidishitu.” Nanshi kitungo kyetu ke kya kwikalapo’tu na buyuki, ino i kya kufikila pa kuyuka Yehova senene bu Muntu udi’ko bine.—Tanga Divilu 33:13; Ñim. 25:4.

8. (a) Monka mokilombwedilwe mu 2 Balopwe 15:1-5, le i milangwe’ka yotufwaninwe kwikala nayo pa muswelo wāikele Yehova na Mulopwe Azadia? (b) Le buyuki bwetu padi Yehova buketutalula kutatana ko-konso pa bilongwa byandi namani?

8 Shi tubayuka Yehova bininge, ketukavutakanibwapo ñeni shi mānga imo ya mu Bible keishintulwilepo kine kyaālongele uno muswelo. Kimfwa, le ubwanya kumona namani muswelo wāikele Yehova na Azadia Mulopwe wa Yuda? (2 Ba. 15:1-5) Yuka’mba nansha shi “bantu badi bakitapa bitapwa ne kusōka ensense mu bitenta’bya ne popa pene,” aye Azadia “walonga kyokya kyoloke mu meso a Yehova.” Inoko, “Yehova wakupila mulopwe, enka nabya wādi ke wamakopo ne ku difuku dya lufu lwandi.” Mwanda waka? Nsekununi keinenepo’po kintu. Le kino kifwaninwe kwituvutakanya ñeni nansha kwitulengeja twiipangule kine Yehova kyaāpelele Azadia mfuto pampikwa bubinga? Bine, shi tuyukile mashinda a Yehova senene ketukeipangulapo bino bipangujo. Mu kulonga namino mubadilwa ne kuyuka amba Yehova udingilanga nyeke “mwendele buluji. (Yel. 30:11, Dibuku Dijila) Buno buyuki bwitukulupija’mba nansha shi ketwivwanijepo kine kyālongele Yehova kudi Azadia namino, tukokeja kukulupila’mba butyibi bwandi i boloke.

9. Le i myanda’ka itukwasha twivwanije kine Yehova kyaāponejeje Azadia makopo?

9 Inoko pa uno mwanda, kudi myanda mikwabo itusonekelwe mu Bible. Mulopwe Azadia wādi uyukene enka na mwādi muyukanine Mulopwe Uzia. (2 Ba. 15:7, 32) Mu nsekununi iifwene na ino idi mu 2 Bilongwa 26:3-5, 16-21, twifunda’mo amba nansha shi Uzia wālongele byoloke ku meso a Yehova mu kitatyi kampanda, inoko mwenda mafuku “mutyima wandi wazunzulwa.” Wāsakile na mitatulo kulonga mingilo ya bu kitobo yakādipo unenwe kulonga. Babitobo makumi mwānda bākamulondele ne kusaka kumulemununa. Lelo Uzia wāitabije namani buno bulemununi? Wēlombwele bu muntu wa mitatulo. ‘Wāfunina’ babitobo. Nanshi ke kya kutulumukapo shi Yehova wāmuponeneje makopo!

10. Mwanda waka ketufwaninwepo kukimba kushintulwilwa kanda ne kanda ka mu bilongwa bya Yehova, ne i muswelo’ka otubwanya kukomeja kikulupiji kyetu mu mashinda andi moloke?

10 Le i ñeni’ka yotuboila’ko? Le byadi bya kwikala namani shi mu Kinenwa kya Leza kebatelele’mopo kanda ne kanda katōkeja uno mwanda, pamo na mu mānga mikwabo ya mu Bible? Le wadi wa kutatana boloke bwa Leza? Nansha wadi wakwitabija’mba mu Bible mudi myanda mivule itukulupija’mba Yehova uloñanga nyeke byoloke ne uyukile kusansanya kiyampe ne kibi? (Kup. 32:4) Shi tuyuke Yehova biyampe bu Muntu udi’ko bine, buswe bwetu ne mutyima wetu wa kufwija’ko pa mashinda andi bikatamina’ko, kadi ketukasakepo kushintulwilwa kamo ne kamo ka byalonga. Kulupila’mba uno mutyima wa kufwija’ko ukatamina’ko kulondakana na bukomo bolonga bwa kwifunda ne kulangulukila pa milangwe ya Leza idi mu Kinenwa kyandi kilembwe. (Ñim. 77:12, 13) Kino kikakomeja kipwano kyobe  na Yehova, na kwikilengeja kikale kya bine kutabuka.

MILOMBELO —WISAMBA NA YEHOVA

11-13. Le uyukile namani amba Yehova wivwananga milombelo? (Tala kifwatulo kidi ku ngalwilo.)

11 Tufwenanga kudi Yehova mu milombelo. Tumutendelanga, tumufwijanga ne kukimba buludiki bwandi. (Ñim. 32:8) Ino shi usaka’mba kipwano kyobe na Yehova kikale kya bine, ufwaninwe kukulupila’mba wivwananga milombelo.

12 Bantu bamo bakulupile’mba milombelo ikwashanga’tu enka mu milangwe. Banenanga’mba shi ulanga’mba milombelo yobe i milondololwe, i pa mwanda’tu waelele milafwe mu binenwa, na kutela makambakano obe ne kutana mu ñeni yobe malondololo. Kutalula’mo bino byabuyabuya, le i muswelo’ka oyukile’mba milombelo yampikwa budimbidimbi ivwanwanga binebine na Yehova?

13 Tala uno mwanda: Yesu kumeso kwa kwiya’ye pano pa ntanda, wādi umona Yehova ulondolola ku milombelo ya bengidi bandi ba pano panshi. Ebiya, mu mwingilo wandi wa pano pa ntanda, Yesu wālombele milombelo mu muswelo wa kulombola milangwe yandi kudi Shandi wa mūlu. Lelo wādi wa kulonga namino—padi na kulombela bufuku butuntulu—na kulanga’mba Yehova kevwanangapo milombelo? (Luka 6:12; 22:40-46) Lelo wādi wa kufundija bana bandi ba bwanga kulombela shi wādi ulanga’mba milombelo i mwanda’tu utala mu milangwe kete? Na bubine, Yesu wādi uyukile’mba milombelo i kwisamba na Yehova. Difuku dimo, Yesu wānene amba: Tata, wafwa’ko ne kungivwana. Bine, ndyukile amba ungivwananga mafuku onso. Netu tubwanya kukulupila’mba Yehova i “wivwananga kulombela.”—Yoa. 11:41, 42; Ñim. 65:2.

14, 15. (a) Le tumwenanga namani mu kutela bine byotusaka mu milombelo yetu? (b) Le milombelo ya kaka umo yamukweshe akomeje kipwano kyandi na Yehova muswelo’ka?

14 Kitatyi kyotela byobya bine byosaka mu milombelo, ukevwanija senene malondololo a Yehova nansha shi i ya mundamunda. Malondololo ku milombelo yobe akalengeja umone Yehova bu Muntu udi’ko bine. Kadi, shi ulombola Yehova milangwe  ya mu nkulwe ya mutyima obe, nandi ukakufwena.

15 Tubandaulei myanda yemwenine Kathy. * Kadipo usenswe busapudi nansha byaadi usapula kyaba ne kyaba. Unena’mba: “Nkyadipo nsenswe mwingilo wa busapudi. Na bubine nadi neushikilwe. Ponalekele kami kaji, mukulumpe umo wanombwele’mba ukokeja kwingila bupania wa lonso; waumpa ne fomu. Nakwete butyibi bwa kwingila bupania, inoko nashilwile kadi kulombela difuku ne difuku amba Yehova ankwashe nsanswe mwingilo wa busapudi.” Le Yehova walondolwele milombelo yandi? Unena amba: “Pano kendi na myaka isatu mu mwingilo wa bupania. Byompityijanga kitatyi kivule mu busapudi ne kuboila ñeni ku bakaka bakwabo, nemulumbulule muswelo wami wa kusapula. Dyalelo, nkisenswepo’tu busapudi—ino nebufwa. Nakampata kipwano kyami na Yehova kibaningila’ko kupita mokyadi kikadile kala.” Na bubine, milombelo ya Kathy yamukweshe amone kipwano kyandi na Yehova bu kya bine.

TULONGEI BYOBYA BYOTUBWANYA

16, 17. (a) Lelo tufwaninwe kulonga bika pa kulama kipwano kyetu na Yehova ne kwikitamija? (b) Le i kikoleja’ka kya pa bula kisa kubandaulwa mu kishinte kilonda’ko?

16 Kutamija kipwano kya pabwipi na Yehova i mwanda wa mu būmi bwetu bonso. Tufwaninwe kutabula matabula a kufwena kudi Leza shi tusaka’mba nandi etufwene. Kutabukidila, twendelelei kwisamba nyeke na Leza wetu kupityila ku kifundwa kya Bible ne milombelo. Nabya, kipwano kyetu na Yehova kiketukwasha tunekenye matompo etu.

Kutamija kipwano kyetu na Yehova i mwanda wa mu būmi bwetu bonso (Tala musango 16, 17)

17 Inoko kubwanya kwikala kikoleja kya pa bula, shi tulombela kudi Yehova ino makambakano etu endelela’nka kumeso. Mu bitatyi bidi namino, kikulupiji kyetu mudi Yehova kibwanya kuzoza. Tukokeja kushilula kwiipangula shi bine Yehova wivwananga milombelo yetu nansha shi umonanga amba upwene netu. Le i muswelo’ka otubwanya kupwija ino myanda na kukulupila’mba kipwano kyetu na Yehova i kya bine? Kishinte kilonda’ko kisa kwisambila pa uno mwanda.

^ mus. 2 Kipwano kishintululwa bu muswelo wiivwana bantu babidi umo ku mukwabo. Bonso babidi bafwaninwe kulonga buninge bwa kulama kipwano kyabo kikale kikomo.

^ mus. 15 Dijina i dishintwe.