Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Malondololo ku Bipangujo Bimanine pa Bible

Malondololo ku Bipangujo Bimanine pa Bible

Mwanda waka tufwaninwe kuvuluka lufu lwa Yesu?

Le lufu lwa Yesu i lulengeje būmi bwa kumeso bwikale namani?—Isaya 25:8; 33:24

Lufu lwa Yesu lwādi i kinkumenkume kya mvubu mpata mu mānga—wāfwile mwanda wa kujokeja būmi bwa bantu bwikale mobwadi bufwaninwe kwikadila. Muntu kāpangilwepo na mutyima wa kulonga bintu bibi, kubela, nansha kufwa. (Ngalwilo 1:31) Inoko bubi bwātwelele mu ino ntanda kupityila kudi Adama muntu umbajinji. Yesu wāpēne būmi bwandi mwanda wa kwitukūla ku bubi ne ku lufu.—Tanga Mateo 20:28; Loma 6:23.

Leza walombwele buswe bukatampe pa kutuma wandi Mwana pano pa ntanda mwanda wa etufwile. (1 Yoano 4:9, 10) Yesu wāsapwidile balondi bandi bavuluke lufu lwandi na kwingidija mukate ne vinyu. Kulonga namino mwaka ne mwaka i muswelo wa kulombola mutyima wetu wa kufwija’ko pa buswe bwalombwele Leza ne Yesu.—Tanga Luka 22:19, 20.

Le i bāni bafwaninwe kudya ku mukate ne vinyu?

Pānene Yesu dibajinji bandi bana ba bwanga kuvuluka lufu lwandi, wēsambile pa kipwano nansha kumvwañana. (Mateo 26:26-28) Lufu lwandi lwebashidile abo ne bantu bakwabo bavule kyepelo kya kwikala bu balopwe ne babitobo pamo nandi momwa mūlu. Nansha bantu midiyo ne midiyo byobavulukanga lufu lwa Yesu, i enka badi mu kino kipwano bo badyanga ku mukate ne vinyu.—Tanga Kusokwelwa 5:10.

Pano kepadi kintu kya myaka 2000, Yehova utoñanga boba bakekala bu balopwe. (Luka 12:32) Shi twibadingakanye na boba bakekala pano pa ntanda, abo i batyetye.—Tanga Kusokwelwa 7:4, 9, 17.