Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MUTWE WA MWANDA WA PA KIBALU | YESU I MWITUKULE—KU BIKA?

Kine Kyotusakidilwa Kukūlwa

Kine Kyotusakidilwa Kukūlwa

“Muntu mubutulwe ne mwana-mukaji, i wa mafuku matyetye, muyule tusuwa. Utoyanga bwa buluba, ne kutyibwa ponka: Unyema bwa munjiñininya, ne kwendaenda mpika.”—Yoba 14:1, 2.

Tamba mu bitatyi bya kala, bantu balangilanga muswelo obyadi bya kwikala bilumbuluke shi twadi’nka bansongwa, ne na bukomo bwa ngitu buyampe bwa endaenda. Inoko, i kya bulanda mwanda bubine i buno amba: Batwe bonso tufwanga. Binenwa bya Yoba bidi kungala’bi, byānenenwe pano kepadi myaka tununu tusatu ne kupita, bikingila ne dyalelo.

Kusaka kwikala’ko nyeke i kuyampe kadi kusakibwanga na bantu bonso. Bible witusapwila’mba, Leza i mutūle mu mityima yetu kusaka kwikala’ko nyeke. (Musapudi 3:11) Shi bidi namino, le umona amba i kyendele’mo Leza wa buswe atūle kuno kusaka mu mityima yetu ino kukome kufikidila? Shi malondololo obe i mhm, nankyo udi na bubinga. Kinenwa kya Leza kitela lufu bu walwana kadi i kilaye’mba “lukajimankanibwa fututu.”—1 Kodinda 15:26.

Ketubwanyapo kutatana amba lufu i walwana. Kekudipo muntu nansha umo ubwanya kwilusaka. Kitatyi kifwena kyaka, twepukanga’kyo, twifyanga, nansha kunyema. Shi tubabela, tukimbanga muswelo wa kwiundapija. Tuloñanga byonso byotubwanya mwanda wa kwepuka kintu kyonso kibwanya kwitufikija ku lufu.

Le kudi bubinga bwa kukulupidila’mba uno walwana wa kala na kala ukajimankanibwa fututu? I amo, budi’ko. Yehova Leza, Umpangi kāpangilepo bantu amba bekale’ko’tu mafuku matyetye kupwa bafwe. Lufu lwa bantu kelwadipo mu mpango mibajinjibajinji ya Leza. Wādi usaka bantu bekale’ko nyeke pano pa ntanda, kadi kyonso kyalanga kulonga wikifikidijanga.—Isaya 55:11.

Penepo, i muswelo’ka ukajimankanibwa lufu? Mu bula bwa mānga, bantu bakimbile kupwa lufu, inoko kebabwenyepo. Mu kino kyetu kitatyi, lufu lukyendelela kwikala’ko. Befundi ba sianse i bavudije’ko byalembwa ne malawa mene atyepeje’ko misongo imo. Batele mutyima mu myanda ya nsange ya bipangwa byūmi. Mu bifuko bivule, mwayene wa bantu beja’ko bininge dyalelo baloñanga kintu kya myaka katwa. Nansha nankyo i bakomenwe kunekenya lufu. Enka munenena Bible amba, “bonso bālamuka ke luvumbi monka.”—Musapudi 3:20.

Mwanda muyampe i uno amba ketufwaninwepo kukulupila mu bukomo bwa bantu bwa kusaka kuvuija kino kikoleja kya kala na kala. Yehova Leza i mukwate’ko kala mpangiko ya kwitukūla nansha kwitunyongolola ku lufu, kadi i kupityila padi Yesu Kidishitu.