Enda ku bidi'mo

Enda ku kifunka

Batumoni ba Yehova

Tonga Ludimi Kiluba

“Kulonga Namino o Muswelo Oloelelwe”

“Kulonga Namino o Muswelo Oloelelwe”

“Ubafi fyē bino bintu ku ba tunangu ne bafunde ino ubasokwela’byo twana tutyetye.”—LUKA 10:21.

1. Lelo i kika kyālengeje Yesu ‘asangale bininge mu mushipiditu’? (Tala kifwatulo kidi ku ngalwilo.)

LE UBWANYA kufwatakanya mokyādi kikadile kumona Yesu Kidishitu ‘usangala bininge mu mushipiditu’? Padi ubamone mpala ya Yesu miyule mimungomungo, meso andi mayule nsangaji. Lelo i kika kyāmulengeje asangale? Wādi ukitamba mu kutuma bandi bana ba bwanga 70 kukasapula myanda miyampe ya Bulopwe bwa Leza. Wāsangedile bininge pa muswelo obadi bakuvuija mwingilo wabo. Kwādi balwana bavule ba bukomo ba myanda miyampe, pamo bwa basonekeji ne Bafadiseo ba ñeni kadi bafunde masomo malampe. Bādi basoñanya bantu bavule bamone Yesu bu muntu wa panshi, sendwe’tu wa mbao ne kumona bandi bana ba bwanga bu “bantu bampikwa kufunda kadi ba bituputupu.” (Bil. 4:13; Mako 6:3) Nansha nankyo, bana ba bwanga bājokele mu mwingilo wabo na nsangaji mikatampe. Bine, nansha byokwādi kunkakajibwa bāsapwile, enka ne ku bandemona! I bika byēbakweshe bekale na nsangaji ne bupyasakane?—Tanga Luka 10:1, 17-21.

2. (a) Le bana ba bwanga ba Yesu bāikele bu bana batyetye muswelo’ka? (b) Lelo i bika byākweshe balondi ba Kidishitu bevwanije bubinebine bwa mushike bwa ku mushipiditu?

2 Tala byānene Yesu kudi Yehova: “Nakutendela ku meso a bonso,  a Tata, Mfumu wa diulu ne ntanda, mwanda ubafi bino bintu ku ba tunangu ne bafunde ino ubasokwela’byo twana tutyetye. Bine, abe Tata, mwanda kulonga namino o muswelo oloelelwe.” (Mat. 11:25, 26) Na bubine, Yesu kādipo usaka kunena pa bute pa bute amba bandi bana ba bwanga bādi bana batyetye. Inoko, wādi uyukile amba bādi bamweka bu bana batyetye na kwibadingakanya na bantu ba tunangu ne bafunde bininge mu mine ntanda’ya, bene bādi ba tunangu mu meso abo. Kya mvubu nakampata, Yesu wāfundije balondi bandi bekale pamo bwa bana batyetye, na kwikala nyeke betyepeje ne kwitabija kufundijibwa. (Mat. 18:1-4) Le i muswelo’ka obāmwenine mu kwityepeja? Kupityila ku mushipiditu ujila, Yehova wēbakweshe bevwanije bubinebine bwa mushike bwa ku mushipiditu, papo bantu ba tunangu ne bafunde, bene bādi bebafutulula, bāikala nyeke basabiwe meso na Satana ne na mitatulo yabo.

3. Le i bika byotusa kwisambila’po mu kino kishinte?

3 Kekyakutulumukapo shi Yesu wāsangele! Kyāmuletele nsangaji pa kumona muswelo wādi usokola Yehova bubinebine bwa mushike ku bantu betyepeje ba miswelo yonso, pampikwa kubanga masomo obafundile nansha tunangu twabo. Wāsangele pa kuyuka amba Shandi i muloelelwe uno muswelo wa kufundija. Le Yehova i mushinte, ne i muswelo’ka walombolanga kuloelelwa mu uno muswelo wa kufundija? Pano potubandaula malondololo, tukamona’mba i metupe nsangaji, na yādi nayo Yesu.

KWIVWANIJA BANTU BONSO BUBINEBINE BWA MUSHIKE

4. Le Kiteba kya Mulami kya muneneno upēla i kimweke bu kyabuntu kya buswe muswelo’ka?

4 Mu myaka ya panopano, bufundiji bwa ku mushipiditu buletwa na bulongolodi bwa Yehova bubaikala bupēla bininge ne bwivwanikwa. Tubandaulei’ko bidi bimfwa bisatu. Kibajinji, kulupulwanga Kiteba kya Mulami kya muneneno upēla. * Na bubine, kino Kiteba i kimweke patōka bu kyabuntu kya buswe ku boba bekalanga na makambakano a ludimi nansha bakolelwa kutanga. Mitwe ya bisaka yamwene amba babo bana nabo pano kebamwena bininge mu kifundwa kya dino dipepala, mukola mwine otudishibwanga’mo mu mpangiko ya ku mushipiditu. Bantu bavule balembele milangwe ya kufwija’ko itamba ku mutyima. Kaka umo walembele amba, pano kalondololanga ku kifundwa kya Kiteba kya Mulami. Unena’mba, “Nadi na bumvu.” Pano kebikidikopo monka! Aye pa kupwa kwingidija kino Kiteba kya muneneno upēla, walembele amba: “Pano nkenondololanga misunsa mivule, moyo ne kowaya jimejime! Nafwija’ko Yehova ne banwe.”

5. Lelo i kamweno’ka kadi mu uno Bible mupya wa Bisonekwa Bijila Bushintuludi bwa Ntanda Mipya?

5 Kya bubidi, kwalupwilwe Bible mupya wa Bisonekwa Bijila Bushintuludi bwa Ntanda Mipya, mu Angele ku lenyo ya pa mwaka ya mu mafuku 5 Kweji 10, 2013. * Bisonekwa bivule bidi na bishima bityetye, inoko shintululwilo i imo yonka kadi ipēla kwivwana. Kimfwa, Yoba 10:1 wadi na bishima 27, pano ke 19; Nkindi 8:6 wadi na bishima 20, pano ke 13. Ano mavese onso abidi apēla kwivwana mu uno Bible mupya. Bine, tutu umo mushingwe māni wa kikōkeji kadi na makumi a myaka mu mwingilo wanene amba: “Natangile’tu mukanda wa Yoba mu uno Bible mupya, naivwene bu o musunsa wami mubajinji kwiutanga!” Bantu bavule nabo banene’nka namino.

6. Lelo wiivwananga namani pa bujadiki bwa mwivwanino wa Mateo 24:45-47?

6 Kya busatu, tubandaulei’ko kujadikwa kwa panopano kwa mwivwanino wetu.  Kimfwa, mwivwanino wetu mujadikwe wa “umpika mukōkele ne mudyumuke,” walupwilwe mu Kiteba kya Mulami, kya mafuku 15 Kweji 7, 2013, wetusangeje. (Mat. 24:45-47) Kyashintulwilwe amba umpika mukōkele i Kitango Kyendeji, “bengidi . . . ba mu njibo” i boba bonso badishibwa ku mushipiditu, bekale bashingwe māni nansha “mikōko mikwabo.” (Yoa. 10:16) Bine, i kyasangajipo kashā pa kuyuka buno bubinebine ne kufundija’bo bapya! Le i mu miswelo’ka mikwabo mulombola amba Yehova uloelelwe bufundiji bupēla ne bwivwanikwa?

MUNENENO UPĒLA NE WIVWANIKWA WA MĀNGA YA MU BIBLE

7, 8. Le i bimfwa’ka bimo bya byelekejo bya bupolofeto bya ku bukomo bwa mushipiditu bidi mu Bible?

7 Shi wingidilanga Yehova pano ke padi makumi a myaka, wimumone kushinta kwikele’ko mu muswelo ushintulula mabuku etu mānga mivule ilembelwe mu Bible. Muswelo’ka? Divule dine mu mafuku kunyuma, mabuku etu adi esambila pa mānga ya mu Bisonekwa ya kala ne pa shintulwilo yayo mu mafuku a kumeso. Mānga ya mu Bible yadi imonwa bu ya kala, ebiya kufikidila konso kwa bupolofeto kwa mānga kwadi i shintulwilo yayo ya mu mafuku a kumeso. Le byelekejo bya bupolofeto bidi na kyalwilo mu Bisonekwa? I amo. Kimfwa, Yesu wēsambile pa “kiyukeno kya mupolofeto Yona.” (Tanga Mateo 12:39, 40.) Yesu wāshintulwile amba kwikala kwāikele Yona munda mwa mushipa—kyādi kishintulula kibundu kya Yona shi Yehova kāmulaminepo—bwādi i bupolofeto bwa kwikala kwa Yesu mu kibundu.

8 Mu Bible mudi byelekejo bikwabo bya bupolofeto bya ku bukomo bwa mushipiditu. Mutumibwa Polo wēsambile pa bino byelekejo bivule. Kimfwa, kipwano kya Abalahama na Hakala ne Sala kyādi na kyelekejo kya bupolofeto kya kipwano kya Yehova na muzo wa Isalela ne na kipindi kya momwa mūlu kya bulongolodi bwa Leza. (Ngo. 4:22-26) Mo monka ne tabenakulo ne tempelo, Difuku dya Kipwanyo, kitobo mukatampe ne myanda mikwabo ya mu Mukanda wa Bijila wa Mosesa byādi na “munjiñininya wa bintu bya kwiya.” (Bah. 9:23-25; 10:1) Kwifunda bino byelekejo bya bupolofeto i mwanda usangaja kadi ukomeja lwitabijo. Lelo tubwanya kufula ku kunena’mba, muntu ense, kinkumenkume ne myanda itelelwe mu Bible byādi mujiñininya wa muntu kampanda nansha kintu kamukaya?

9. Lelo mānga ya mu Bible ya Nabote yashintulwilwe namani mu mafuku kunyuma?

9 Divule dine mu mafuku kunyuma, mabuku etu adi ashintulula namino. Tala kimfwa, nsekununi ya Nabote, wāsuswilwe ne kwipaibwa na Mulopwe Mukaji mubi Yezebele mwanda wa wandi mulume, Ahaba, ayate budimi bwa mañanza bwa Nabote. (1 Ba. 21:1-16) Kunyuma mu 1932, ino nsekununi yāshintulwilwe bu yadi i bupolofeto. Kyanenenwe amba Ahaba ne Yezebele bādi belekeja Satana ne bulongolodi bwandi; Nabote welekeja Yesu; ebiya lufu lwa Nabote, lwadi lwelekeja bupolofeto bwa lufu lwa Yesu. Ino, makumi a myaka pa kupita’po, mu dibuku “Que ton nom soit sanctifié,” dyalupwilwe mu 1961, kyanenenwe amba Nabote wādi welekeja bashingwe māni, ne Yezebele bipwilo bya kine Kidishitu. Nanshi, kupangwapangwa kwa Nabote na Yezebele kwādi kwelekeja kupangwapangwa kwa bashingwe māni mu mafuku a mfulo. Mu bula bwa myaka mivule, bantu ba Leza bamwene uno mwivwanino wa mānga ya mu Bible bu ukomeja lwitabijo. Penepa, mwanda waka byashintyile?

10. (a) Le budyumuku butwalanga ku kukosoka bininge kitatyi kishintululwa mānga imo ya mu Bible muswelo’ka? (b) Le mabuku etu esambilanga bininge dyalelo pa bika?

10 Monka motukulupidile’kyo, mu bula bwa myaka mivule Yehova wakweshe  “umpika mukōkele ne mudyumuke” ekale mukosoke bininge. Budyumuku butwalanga ku kukosoka bininge mu mwanda utala kutela nsekununi ya mu Bible amba i bupolofeto, poso kwikale Kisonekwa kipotoloke pa kulonga namino. Kadi, kyamwenwe amba shintulwilo imo ya kala itala pa myanda ya kala ne shintulwilo yayo ya mu mafuku a kumeso i mikomo kwivwanikwa na bavule. Kamo ne kamo ka mu buno bufundiji—bwa i ani welekeja ani ne mwanda waka—bubwanya kwikala bukomo kuteleka bukidibukidi, kuvuluka ne kwingidija. Mwanda mukatampe kadi i uno amba, bufundiji bwa mu mwiendelejo ne bwa kamweno bwa mu mānga ya mu Bible yotubandaula bubwanya kwikala bukutakane nansha kujimija bubandaudi bwa mushike bwa kufikidila kwa mu mafuku a kumeso. O mwanda, tumonanga amba etu mabuku dyalelo emanine bininge pa bufundiji bupēla, bwa kamweno mu lwitabijo, kūminina, kwipāna kwa bwine Leza ne pa ngikadilo mikwabo ya kamweno yotubwanya kwifunda ku nsekununi ya mu Bible. *

Kimfwa kya Nabote kitupa bufundiji bukatampe (Tala musango 11)

11 Shi ke pano, i muswelo’ka otwivwanije nsekununi ya Nabote? Twi beivwanije mu binenwa bipēla kadi bivwanikwa. Uno muntu moloke wāfwile, ke pa mwandapo wādi i kyelekejo kya Yesu nansha kya bashingwe māni, ino i pa mwanda wālamine bululame bwandi. Wālamine Kijila kya Yehova kitatyi kyaālwile na kwingidija kobāingidije lupusa bibi pādi. (Umb. 36:7; 1 Ba. 21:3) Nanshi, kimfwa kyandi kisambila potudi mwanda muntu yense umbukata mwetu ubwanya kutanwa na kupangwapangwa na kuno. (Tanga 2 Temote 3:12.) Bantu ba tubila tonso babwanya kwivwanija, kuvuluka, ne kwingidija buno bufundiji bukomeja lwitabijo.

12. (a) Le i bika byoketufwaninwepo kufula ku kunena pa mānga idi mu Bible? (b) Mwanda waka tufikilanga pa kwikala na shintulwilo ivwanikwa nansha ke pa bintu bya mushike? (Tala kunshi kwa dyani.)

12 Le tufwaninwe kufula ku kunena’mba mānga ya mu Bible idi’nka na bufundiji bwa kamweno ne keidipo na shintulwilo  mikwabo? Mhm. Dyalelo mabuku etu afundijanga bininge bintu bituvuluja nansha bikwasha mwanda wa kwelekeja bintu bikwabo. Keakisambilangapo bininge na kulombola nsekununi mivule ya mu Bible amba imanine pa myanda ya kala ya bupolofeto ne kufikidila kwayo mu mafuku a kumeso. Kimfwa, tubwanya kunena amba bululame bwa Nabote mu kupangwapangwa ne lufu lwandi bituvuluja bululame bwa Yesu ne bashingwe māni bandi. Inoko, tukokeja kadi ne kuvuluka mwimanino wa kikōkeji wa “mikōko mikwabo” mivule ya Mfumwetu. Kuno kudingakanya kwivwanikwa ne kupēla i kayukeno ka bufundiji bwa Leza. *

MWIVWANINO UPĒLA WA BYELEKEJO BYA YESU

13. Le i bimfwa’ka bilombola amba pano tushintululanga byelekejo bya Yesu mu muswelo upēla ne wivwanikwa?

13 Yesu Kidishitu wādi mufundiji mukatampe wāikele’ko pano pa ntanda. Muswelo wandi umo muyampe wa kufundija i kwingidija byelekejo. (Mat. 13:34) Byelekejo byādi bilumbulula binenwa bya bimfwa bilanguluja ne bitenga mutyima. Lelo mabuku etu nao ashintululanga byelekejo bya Yesu mu muswelo upēla ne wivwanikwa mu bula bwa myaka mivule? Kilondololwa i amo! Mwene twasangele pa kutambula bujadiki bupotoloke bwa byelekejo bya Yesu bitala pa kiyujo, luze lwa mutade ne bukonde bwa nkokwa mu Kiteba kya Mulami kya difuku 1 Kweji 7, 2008? Pano twi bamone patōkelela amba bino byelekejo bisambila pa Bulopwe bwa Leza ne kunekenya kwabo kwa kutendelwa mu kukongakanya balondi ba bine ba Kidishitu mu ino ntanda mibi.

14. (a) Le i muswelo’ka otwadi tushintulula lukindi lwa mwine Samadia muyampe? (b) Le twivwanije lukindi lwa Yesu namani dyalelo?

14 Le tukanena bika pa mānga ne mānga, nansha nkindi yānene Yesu? Na bubine, imo i ya kyelekejo ne ya bupolofeto; mikwabo nayo iletanga bufundiji bwa kamweno. Ino, le tukayuka namani amba ino i mānga ya kyelekejo nansha amba ke ya kyelekejopo? Mu bula bwa myaka, malondololo endanga evwanikwa bityebitye. Kimfwa, tala muswelo otwadi tushintulula lukindi lwa Yesu lwa mwine Samadia muyampe. (Luka 10:30-37) Mu 1924, Kiteba kya Mulami kyanene amba mwine Samadia wādi welekeja Yesu; dishinda ditamba ku Yelusalema dyenda ku Yediko, dine dyādi dipulumuka, dyādi dyelekeja kutwela kwa bantu mu butomboki kushilwila mu Edena; bangivi mu dishinda bādi belekeja bakatampe ba masosiete ne bansunga ba lwiso; kadi kitobo ne mwine Levi byelekeja ngikadilo ya kine Ekeleja. Dyalelo, mabuku etu engidijanga kino kimfwa mwanda wa kuvuluja bene Kidishitu bonso amba ketufwaninwepo kwikala na mboloji mu kukwasha boba basakilwa bukwashi, nakampata ku mushipiditu. Le kino kekiletapo nsangaji kotudi pa kumona amba Yehova i mulengeje bufundiji bwandi bwikale bwivwanikwa kotudi?

15. Le i bika byotukabandaula mu kishinte kilonda’ko?

15 Mu kishinte kilonda’ko, tukabandaula’mo lukindi lukwabo lwa Yesu—lwa bajike dikumi. (Mat. 25:1-13) Le Yesu wādi usaka balondi bandi ba mu mafuku a mfulo bevwanije bino binenwa bya bukomo bya kyelekejo namani? Byoludi lukindi lwa bupolofeto ludi na shintulwilo ya kyelekejo, le lwingidijibwa pa muntu, kintu ne kinkumenkume kyonso? Nansha’ko, wādi usaka balondi bandi belwingidije bu bufundiji bwa kamweno bwa kwibaludika mu mafuku a mfulo? Tutalei.

^ mus. 4 Kiteba kya muneneno upēle kyalupwilwe dibajinji mu Angele mu Kweji 7, 2011. Kupwa, kyalupwilwe ne mu ndimi mikwabo mityetye.

^ mus. 5 Kula kulongwa bukomo bwa kutūla uno Bible mupya ne mu ndimi mikwabo.

^ mus. 10 Kimfwa, dibuku Iulai Lwitabijo Lwabo disambila bininge pa būmi bwa bantu beshileshile 14 ba mu Bible. Myanda idi’mo isambila pa muswelo mupotoloke wa kwibingidija, ke pa shintulwilopo ya kyelekejo nansha ya bupolofeto.

^ mus. 12 Bine, mu Kinenwa kya Leza mudi kadi bintu bibwanya kumonwa bu “bikomo kwivwana,” kubadila’mo ne myanda yāsonekele Polo. Inoko, balembi bonso ba Bible bāpungulwidilwe mushipidiji ujila. Buno bukomo bumo bonka bukwashanga bene Kidishitu ba bine dyalelo bevwanije bubinebine bwa Leza, bulengeja “enka ne mu bintu bya mushike bya Leza mwine” bikale bipēla bininge ne bivwanikwa na ñeni yetu mīpi.—2 Pe. 3:16, 17; 1 Ko. 2:10.