Alex wetūkija bininge kitatyi kya kandija kalato kakwabo mu motoka wa sosiete ikwasha bantu kuviluka kwine kwaingilanga. Wiipangula amba, ‘Le kyonepenenekele mu kano kaji kampikwa kamweno kavule i kika? Le nkekala biyampe kitatyi’ka? Bwami būmi bwadi bwa kwikala biyampe bininge shi nkyadipo ñingila!’

Pamo bwa Alex watelwa’u, bantu bavule dyalelo kebasakangapo kwingila bininge. Mulongolodi umo wa myotoka witwa bu Aaron unena amba: “Bantu bavule balañanga’mba kwingila mingilo ‘ya makasa’ i kwitūkija bulēme. Ngikadila yabo i ya: ‘Ñingilanga uno mwingilo’tu mwanda wakwilaijija’po.’”

Mwanda waka bantu bavule bamonanga’mba kebafwaninwepo kwingila mingilo mikomo? Padi batononwanga na byobya byobemvwana ku bisanji, bine bimwekejanga divule dine amba būmi “buyampe” i bobwa bwa katutu ne bwa ku makasa kufuke. Matthew wingilanga mingilo ya makasa, unena amba, “bantu balañanga’mba shi wingila bininge mwanda wa mwa kwikadila, popene ukakomenwa.” Nzamu umo witwa bu Shane nandi wamwene muswelo umo onka. Unena amba: “Kwingila difuku dituntulu ne kupebwa mfutwa mibwane ya difuku’dya i kintu kekisakangapo bantu kulonga.”

Ku mutamba mukwabo, bantu bavule banekenye, na bubine bengilanga bikomo. Mūbaki umo wa myaka 25 witwa bu Daniel unena amba, “Mona’mba kwingila bininge kuletanga mpalo mivule, nakampata shi ilongwa na bitungo bilumbuluke.” Andre wa myaka 23 witabija uno mwanda na kunena amba: “Nkulupile amba katōkwe ne nsangaji bitambanga ku kwingila. Kwingila bityetye kekukakufikijapo ku nsangaji ya kitatyi kilampe—kukakuletela’nka masusu a nyeke!”

Le bantu badi pamo bwa ba Daniel ne Andre batamije mumweno muyampe mu mwingilo mukomo muswelo’ka? Mu kīpi’tu, baingidije misoñanya ya mu Bible mu bwabo būmi. Pa kyaba kya kutyumuna mutyima pa mingilo mikomo, ino Bible ukankamika kwikala na kininga ne kūminina. Bible ketulombolangapo’tu’nka kwingila kete, ino witulombolanga bintu bivule. Witulombolanga kadi ne muswelo wa kusangela mwingilo wetu.

Le i misoñanya’ka ya mu Bible ibwanya kukukwasha usangele mwingilo obe? Tukulomba ubandaule’ko misoñanya imo isambilwe’po mu kishinte kilonda’ko.