Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Bipangujo bya Batangi

Bipangujo bya Batangi

Le i bika bibwanya kulongwa mwanda wa kukwasha batutu ne bakaka bakambakanibwa na mananshi?

Bantu bonso bakambakanibwa na mananshi balwanga na kikoleja kikatampe. Bimweka bu kebabwanyapo’tu kwepukididila mananshi mwanda batananga difuku ne difuku bantu betūtyile’o. Inoko, bamo badi bakimba shi bikokejika kulomba’mba batutu ne bakaka baleke kwitūta mananshi ku kupwila kwa bwine Kidishitu ne ku bitango.

Na bubine, kekudipo mwine Kidishitu nansha umo ukakimba kukoleja muntu mukwabo akomenwe kutanwa ku kubungakana kwa bwine Kidishitu kukusaka. Batwe bonso tusakilwa kukankamikwa kuletwa ku kupwila. (Bah. 10:24, 25) Nanshi, yewa ukambakanibwa bininge na mananshi, ke bimukoleja ne kutanwa ku kupwila ubwanya kusapwila’mo bakulumpe. Nansha byokebikwatañenepo na Bisonekwa ne kebyendele’mopo kukanda boba batanwa ku kupwila kwitūta mananshi, bakulumpe bakokeja kuteakanya’ko madingi a kukwasha ba mu kipwilo bevwanije mwanda ukambakanya bakwabo. Kukwatañana na ngikadilo yobadi’mo, bakulumpe babwanya kukwata’ko butyibi bwa kubandaula myanda ilupwilwe’ko kala itala pa uno mwanda mu kipindi kya bisakibwa bya penu ku Kupwila kwa Mingilo, nansha kupityija’ko musapu na bunwa utala pa uno mwanda. * Inoko, bakulumpe kebafwaninwepo kupityija kitatyi ne kitatyi misapu ya uno muswelo. Ku kupwila kwetu, kwiyanga nyeke bantu bakitamba mu kusangela musapu ne beni kebayukilepo uno mwanda, kadi tusaka bano bantu beivwane biyampe. Muntu nansha umo kafwaninwepo kwiivwana bibi pa mwanda wa kwitūta kwandi kufwaninwe kwa mananshi.

Kokwa kudi ano makambakano ne kadi shi bikokejika na ngikadilo ya kwenu, nankyo bikokejika kitango kya bakulumpe kikateakenye boba bakolelwa na mananshi bashikate pa kifuko kyabo mu Njibo ya Bulopwe. Kimfwa, kibwanya kwikala kyumba kikwabo mufika mawi a binanda mwine mobabwanya kushikata mwanda wa nabo bamwene mu kupwila. Shi kebibwanikapo kuvuija mwanda mu muswelo muyampe kadi bantu bakwabo bakyendelela na kukambakanibwa bininge, nankyo kipwilo kikalombwa kukwata mawi a kupwila mwanda wa boba bakolelwa nansha kukwata’ko mpangiko ya abo kulondela kupwila ku mobo abo, monka mokilongelwanga na boba bakomenwa kushetuka ku mobo abo.

Pa uno mwanda, tufwaninwe kadi kulombola kalēmo ku bakwetu kitatyi kyotwenda ku bitango bya ntanda. Pa kuyuka amba bitango bivule bilongelwanga mu bifuko bishite mwingidijibwanga bipepa luvula, kadi divule dine byokebikokejikapo kutūla’ko bifuko bya boba betūta mananshi ku bifuko bibungakenwa’po, kutyepeja mwitūtyilo wa mananshi makomo ku bino binkumenkume kukekala bu kilomboji kya buswe. Inoko, kino kekifwaninwepo kwikala bu ke kijila kya kwingidija ku kupwila kwa pa kipwilo, kadi kino kekifwaninwepo kumonwa uno muswelo.

Byotukidi mu ino ngikadilo ya bintu, batwe bonso tususukanga na bipa bitamba ku kubulwa kubwaninina kotupyene. Bine, tusangelanga bukomo bulonga bakwetu bwa kutyepeja’ko makambakano etu! Ku bamo bibwanya kwibalomba kwisuminwa kwitūta mananshi mwanda wa kupēleleja’ko banabetu batanwe ku kupwila kwa bwine Kidishitu. Nanshi, buswe bo abo bwitukwasha kulonga namino.

^ mus. 2 Shi usaka kutangila’ko myanda mikwabo, nankyo tala kipindi kinena’mba, “Aider les malades,” mu Réveillez-vous! wa mafuku 8 Kweji 8, 2000, paje 8-10.