Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Lama Bupyasakane Bobe mu Busapudi

Lama Bupyasakane Bobe mu Busapudi

KUSAPULA myanda miyampe o mwingilo wa mvubu mpata wingilwa dyalelo pano pa ntanda. Byodi mwingidi wa Yehova, na bubine umwene amba i dyese kwingila uno mwingilo wa kulonga bana ba bwanga. Ino ne kutatana kwine mpika, uketabija’mba bapania ne basapudi kyaba kimo batanwanga na bikoleja pa kulama bupyasakane bwabo mu mwingilo.

Lelo i bika bikakukwasha ulame bupyasakane bobe mu busapudi?

Basapudi bamo bakolelwanga kutana bantu bakwisamba nabo mu busapudi bwa ku njibo ne njibo. Na bubine, bantu bavule ba mu mwaba wetu babwanya kuleka kwikala’ko ku mobo. Shi benē njibo kebasangedilepo, mwitabilo wabo ku musapu wa Bulopwe ubwanya kwikala wa mashikamashika nansha mubi. Basapudi bakwabo balemenenwanga mwanda badi na mwaba mukatampe wa kusapula’mo kadi ulupula bipa, ino batyina’mba kebakabwanyapo nansha dimo kwiuvuija. Kadi bantu bamo mu kipwilo ke basapule mu bula bwa myaka mivule—kitatyi kilampe kyokebadipo balangila—ebiya batyumukwa mutyima.

Le kuyuka’mba bantu ba Yehova bonso balwanga na makambakano mene abwanya kuzozeja bupyasakane bwabo mu mwingilo wa busapudi, kufwaninwe kwituzozeja? Mhm. Le kudi muntu mu bukata bwetu wadi ulanga’mba tukapēlelwa kusapula musapu wa bubinebine wa Leza upandija būmi mu ino ntanda iludikwa na “yewa umbi,” Satana Dyabola?—1 Yo. 5:19.

Ekale ulwanga na bikoleja’ka mu kusapula myanda miyampe, kulupila’mba Yehova ukokeja kukukwasha wibinekenye. Le i bika bikakukwasha ulame bupyasakane bobe mu mwingilo wa bwine Kidishitu? Tubandaulei’ko myanda imo.

KWASHA BA BWINO BUTYETYE

Mwaka ne mwaka, kubatyijibwanga tununu ne tununu twa bantu bu Batumoni ba Yehova bapya. Shi wepēne panopano kudi Yehova na kubatyijibwa ku mema, na bubine wi musangele byabuyabuya byowimwenine ku boba ke basapule myaka mivule kukupita. Kadi shi wi musapudi wa  Bulopwe pano kepadi myaka mivule, ubulwepo kusangela ne kumwena mu kufundija bapya?

Yesu wāyukile’mba bana bandi ba bwanga bādi basakilwa bulombodi mwanda wa kwikala basapudi balupula bipa, kadi wālombwele mwādi mufwaninwe kwingidilwa uno mwingilo. (Luka 8:1) Dyalelo nadyo, kusakilwa kufundija bantu bakwabo bekale basapudi balupula bipa.

Ketufwaninwepo kulanga’mba musapudi mupya ukekala na manwa a kufundija enka na kwenda mu busapudi kete. Ufwaninwe kufundijibwa na mufundiji wa kanye ne wa buswe. Mu buno bufundiji mubadilwa ne kulombola musapudi wa bwino butyetye muswelo wa (1) kuteakanya busapudi ne mwa kukasapwila, (2) kusapula ku njibo ne njibo nansha ku bapityeshinda, (3) kupāna mabuku, (4) kulondelela boba basangedile, ne (5) kushilula kifundwa kya Bible. Bine, kukalupuka bipa biyampe shi muntu ufundijibwa utala ne kwiula manwa engidijibwa mu busapudi na yewa umukwasha. (Luka 6:40) Na bubine musapudi mupya ukasangela kwikala na muntu umuteja ne umukwasha popa pasakilwa bukwashi. Kadi musapudi wa bwino butyetye ukamwena mu kufwijibwa’ko ne kupebwa milangwe imukwasha.—Mus. 4:9, 10.

WISAMBE NA YEMUSAPULA NANDI

Nansha byolonga bukomo bobe bonso bwa kwisamba na benē njibo, mafuku amo mīsambo miyampe ya mu busapudi i yoya yomwisamba na omusapula nandi. Vuluka’mba Yesu wātumine bana bandi ba bwanga bakasapule “babidi babidi.” (Luka 10:1) Byobādi basapwila pamo, bādi babwanya kwikankamika ne kwikomeja umo ku mukwabo. O mwanda kitatyi kyotupityija mu busapudi pamo na mwanetu mu lwitabijo kwitupanga mukenga muyampe wa ‘kwikankamika.’—Loma 1:12.

Le i myanda’ka yomubwanya kwisambila’po? Le kudi mwanda mumweke wa panopano ukankamika? Le kudi mwanda usangaja owatene mu kifundwa kyobe kya pa kasuku nansha mu kifundwa kyobe kya kisaka? Le kudi mwanda kampanda ukukankamikile owaivwene ku kupwila? Kyaba kimo, musapudi osapula nandi ubwanya kwikala muntu okusapulangapo nandi kyaba ne kyaba. Le uyukile muswelo waatwelele mu bubinebine? Lelo i bika byamukulupije’mba buno i bulongolodi bwa Yehova? Le i madyese’ka nansha myanda mimweke’ka yakadi mwimwene? Padi ubwanya kumulombola’ko nobe myanda imo yokodi mwimwene. Nansha shi bantu ba mu busapudi betabe muswelo’ka, kusapula na muntu mu busapudi kuletanga mukenga muyampe wa ‘kwitamija nyeke batwe bene na bene.’—1 Tes. 5:11.

LAMA KIBIDIJI KYOBE KIYAMPE KYA KWIFUNDA

Kintu kya mvubu pa kulama bupyasakane mu mwingilo i kutamija ne kulama kibidiji kiyampe  kya kwifunda. “Umpika mukōkele ne mudyumuke” ulupulanga myanda isambila pa bintu bivule. (Mat. 24:45) Nanshi myanda yobwanya kwifunda mwanda wa kudya byakudya bya ku mushipiditu idi na bintu bivule. Tubandaulei’ko bidi kimfwa kya mutwe wa mwanda muyampe wa mu kifundwa kya pa kasuku: Mwanda waka mwingilo wa kusapula Bulopwe i wa mvubu mikatampe? Kapango kadi mu kino kishinte ketulombola’ko bubinga bumo.

Kubandaula myanda ilombwelwe mu kapango kubwanya kukutonona wendelele kusapula na bupyasakane. Wabulwapo kwitūdila kitungo kya kwifunda’yo mwanda wa kujingulwila’ko bubinga bukwabo buvule? Kadi langulukila pa buno bubinga ne pa bisonekwa bibukwatakenye. Na bubine shi ulonge namino ukaningisha bupyasakane bobe mu mwingilo.

ITABIJA BULOMBODI BUKIDIBUKIDI

Divule dine bulongolodi bwa Yehova buletanga bulombodi bwa kwitukwasha tulumbulule mwingilo wetu. Kimfwa, kutentekela pa busapudi bwetu bwa ku njibo ne njibo, tubwanya ne kusapula kupityila ku mikanda, ku telefone, mu bipito nansha mu bifuko bya bantu bavule, ne kusapula myanda miyampe ku bantu bya kiponka na ponka ne mu bifuko bya busunga. Kadi tukokeja kwiteakanya mwanda wa kwenda kukasapula mu mwaba musapulwanga na dimodimo.

Lelo witabijanga buno bulombodi bukidibukidi? Le watompele kwingidija’ko bulombodi bumo? Bantu bavule balongele namino bamwenine’mo byabuyabuya. Tubandaulei’ko bimfwa bisatu.

Kimfwa kibajinji i kya mwanda umo wanenenwe mu kishinte kimo kya mu Mwingilo wa Bulopwe kyadi kisambila pa mwa kushilwila bifundwa bya  Bible. Kyakankamikile kaka umo witwa bu April ashilule kwifunda na bengidi-nandi basatu. Watulumukile ne kusangala pa kwibamona bonso basatu baitabija kwifunda ne kushilula kutanwa ku kupwila kwa pa kipwilo.

Kimfwa kya bubidi kitala pa kupāna kwa mapepala etu. Twakankamikilwe kukimba bantu basangela bishinte kampanda bipotoloke bya mu mapepala etu. Mutadi umo wa kipindi wa mu États-Unis walombwele kishinte kya mu Réveillez-vous ! kisambila pa matonto kudi bakatampe ba mangajini onso a matonto mu mwaba umo nenki. Aye pamo ne wandi mukaji bakapēne bishinte binena’mba “Kuteja Muñanga Obe” ku mabilo a bamuñanga 100 ne musubu a mu kipindi. Uno mutadi unena amba: “Buno bupempudi bwakweshe bininge mu kwiyukanya kobadi ne kwisambila pa mabuku. Pa kupwa kwisamba nabo bya bulunda ku bino bifuko, twavudije mikenga ya kwisamba nabo.”

Kimfwa kya busatu i kya kusapula ku telefone. Kaka umo witwa bu Judy wasonekele kité kya ntanda yonso mwanda wa kulombola kufwija’ko kwandi pa mwanda wa kukankamikwa kusapula ku telefone. Walombwele’mba inandi wa myaka 86, wadi ulwa na misongo, wadi usapula kitatyi ne kitatyi mu uno muswelo wa busapudi wa mwingilo ujila kadi wamwenine’mo nsangaji mivule idi mu kwendeja kifundwa kya Bible kya muntu wa myaka 92 ku telefone!

Bine bulombodi bwa mwa kusapwila botutambulanga mu mabuku etu bwikalanga bwa kamweno. Wibwingidije! Bubwanya kukukwasha ulame nsangaji ne bupyasakane bobe mu mwingilo.

WITUNGILE BITUNGO BYOBWANYA KUFIKILA’PO

Kubwanya kuvuija mwingilo wetu wa kusapula kekumwekelangapo dibajinji ku buvule bwa mabuku otupēne, ku buvule bwa bifundwa bya Bible byotwendeja nansha ku buvule bwa bantu botukweshe bekale ke bengidi ba Yehova. Lelo i bantu banga ba panja pa kisaka kya Noa baākweshe bekale batōtyi ba Yehova? Na bubine, wabwenye kuvuija mwingilo wandi bu musapudi. Kintu kya mvubu i kwingidila Yehova na kikōkeji.—1 Ko. 4:2.

Basapudi bavule ba Bulopwe i bamone amba pa kusaka’mba batamije bupyasakane bwabo mu mwingilo wa busapudi, bafwaninwe kwitungila bitungo byobabwanya kufikila’po. Le i pamo bwa bitungo’ka? Bitungo bityetye i bilombolwe mu kapango.

Na bukwashi bwa Yehova, kimba miswelo ya kulengeja mwingilo obe wikale muyampe kadi ulupula bipa. Kitatyi kyofikila pa bitungo byobe, ukekala na nsangaji itamba kukulonga kintu kiyampe ne maloa a kuyuka’mba wimulonge byonso byobwanya mwanda wa kusapula myanda miyampe.

Bine, kusapula myanda miyampe kubwanya kwikala na bikoleja. Inoko, kudi bintu byobwanya kulonga mwanda wa wikale musapudi wa Bulopwe mupyasakane. Mwena mu kwikankamika na muntu omusapula nandi, tamija ne kulama kibidiji kiyampe kya kwifunda, ingidija bulombodi bwa umpika mukōkele ne kwitungila bitungo byobwanya kufikila’po. Nakampata, vuluka amba Leza i mukupe dyese dikatampe dya kusapula myanda miyampe bu Kamoni wandi. (Isa. 43:10) Bine, ukekala na nsangaji mikatampe shi wendelele kulama bupyasakane bobe mu busapudi!