Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Kiteba kya Mulami  |  Kweji 12 2014

 MUTWE WA MWANDA WA PA KIBALU | UKOKEJA KWIKALA PABWIPI NA LEZA

Lelo Wisambanga na Leza?

Lelo Wisambanga na Leza?

Ekale mpala na mpala nansha ku telefone, ku musapu wa ku olodinatele, ku video nansha ku mukanda, balunda ba pabwipi besambanga kitatyi ne kitatyi kulondakana na ngikadilo yobadi’mo. Nanshi pa kusaka amba twikale pabwipi na Leza, tufwaninwe kwisamba nandi kitatyi ne kitatyi. Le tukesamba nandi muswelo’ka?

Tubwanya kwisamba na Yehova kupityila ku milombelo. Ino, kulombela Leza i kwishile na mīsambo yotwisambanga na bakwetu. Tufwaninwe kuyuka’mba kitatyi kyotulombela twisambanga na Umpangi, Mwine Mukatakata Mwine wa diulu ne ntanda. Kino kiketutonona tumulombe na bulēme ne kalēmo kakatampe. Shi tusaka’mba Leza evwane milombelo yetu, tunenwe kadi kuvuija bisakibwa kampanda. Tala bidi bino bisatu.

Kibajinji, tufwaninwe kulombela kudi Yehova Leza kete—ke kudipo Yesu, “basanto” nansha kyelekejo. (Divilu 20:4, 5) Bible unena patōka amba: “Umbyonso yukijai Leza byomulomba mu milombelo ne kwabija pamo ne kufwija’ko.” (Fidipai 4:6) Kya bubidi, tufwaninwe kulombela mu dijina dya Yesu Kidishitu, Mwanā Leza. Yesu aye mwine wānene amba: “I kutupu wiya kudi Tata poso upityila padi ami.” (Yoano 14:6) Kya busatu, milombelo yetu ifwaninwe kukwatañana na kiswa-mutyima kya Leza. Bible unena amba: “Wivwane tumulombe kintu kyonso, shi kika shi kika, mwendele kiswa-mutyima kyandi, witwivwananga.” *1 Yoano 5:14.

Balunda ba pabwipi basangelanga kwishinta milangwe kitatyi ne kitatyi

Na bubine, kipwano kya pabwipi kekikalādilapo shi kikambakenwa’nka na muntu umo. Monka musakilanga balunda kwishinta milangwe, netu tufwaninwe kuleka Leza esambe netu ne kumuteja kitatyi kyaesamba. Lelo uyukile Leza mwa esambilanga netu?

Dyalelo, Yehova Leza “wisambanga” netu kupityila ku Bible, Kinenwa kyandi. (2 Temote 3:16, 17) Mwanda waka tubanena namino? Tulete kimfwa: Langa’po bidi shi ubatambula mukanda utamba kudi mulunda nobe wa pabwipi. Pa kupwa kutanga’o, ubwanya kusapwila bantu bakwabo na nsangaji’mba, “Bine naivwana mulunda nami!” Inoko, mīsambo keyadipo ya ku diwi ino yadi ya ku mukanda. Muswelo umo onka, kitatyi kyotanga Bible, i Yehova wisamba nobe. Gina watelwanga mu kishinte kibajinji, unena amba, “Nanga’mba shi nsaka Leza amone bu mulunda nandi, mfwaninwe kutanga ‘mukanda’ waetutumine—ke Bible kadi.” Ubweja’ko amba, “Kutanga Bible difuku ne difuku i kumfwenye pabwipi na Leza.” Lelo ulekanga Leza esambe nobe difuku ne difuku na kutanga Bible Kinenwa kyandi difuku ne difuku? Kulonga namino kukakulengeja wimone’mba udi pabwipi na Leza.

^ mus. 5 Shi usaka kuyukila’ko myanda mivule ya mwa kufwenena kudi Leza mu milombelo, nankyo tala shapita 17 wa dibuku Lelo I Bika Bine Bifundija Bible? dilupwilwe na Batumoni ba Yehova.