“Kwikala mu kipwano kya pabwipi na Leza kukakulengeja wiivwane bu udi na mutyima-ntenke, mukumbanye, kadi mwimanije. Kukakulengeja wimone amba Leza ukusakilanga nyeke biyampe.”—CHRISTOPHER, NSONGWALUME WA MU GHANA.

“Leza umonanga byamalwa byobe byonso, kadi ukusenswe ne kukuta mutyima bininge kutabuka ne molangilanga. —HANNAH WA MYAKA 13, WA MU ALASKA, MU ÉTATS-UNIS.

“Kuyuka amba udi mu kipwano kya pabwipi na Leza i kintu kitabukile bulēme kadi kitūkija mutyima!”—GINA, MWANA-MUKAJI WA MU JAMAIKE WA KINTU KYA MYAKA 40.

Ba Christopher, Hannah, ne Gina kebadipo bunka mu kunena namino. Bantu bavule kujokoloka ntanda yonso betabije’mba Leza wibamonanga bu balunda nandi. Lelo abe nobe? Lelo wiivwananga’mba udi pabwipi na Leza? Nansha usakanga kwikala pabwipi nandi? Padi wiipangulanga amba: Le bikokejika’tu muntu ekale mu kipwano kya pabwipi na Leza Mwine Bukomo Bonso? Shi bikokejika, namani?

BIKOKEJIKA KWIKALA PABWIPI NA LEZA

Kukwatañana na Bible, bikokejika muntu ekale mu kipwano kya pabwipi na Leza. Bible unena’mba Leza wāityile mukulutuba Muhebelu Abalahama amba, “mulunda nami.” (Isaya 41:8) Yuka kadi amba, kudi lwito lwa kyanga ludi mu Yakoba 4:8 lwa amba: “Fwenai kudi Leza, nandi ukemufwena.” Nanshi, i kimweke patōka amba bikokejika kusamba bulunda nansha kwikala mu kipwano kya pabwipi na Leza. Ino Leza byakamwekangapo, le ubwanya ‘kufwena’ kwadi ne kwikala mu kipwano kiyampe nandi namani?

Pa kulondolola kino kipangujo, tubandaulei mufikilanga bantu ku kupwana. Divule dine bantu babidi bashilulanga na kwiyuka majina. Kupwa, bashilula kwisamba kitatyi ne kitatyi, kwilombola milangwe ne miivwanino yabo, ebiya bulunda bwabo bwaninga. Kadi kitatyi kyobalonga bukomo bwa kwilongela bintu umo ku mukwabo, kijimba kya bulunda bwabo kikomejibwanga. Tubwanya kunena’mba bikalanga muswelo umo onka pa kwikala mu kipwano na Leza. Tutalei mobikadile.