Lelo kudi mulunda nobe wa pabwipi okuyukilepo dyandi dijina? Kebikokejikapo. Mwana-mukaji umo wa mu Bulgare witwa bu Irina wanene’mba, “Kubwanyapo kufwena Leza shi kuyukilepo dyandi dijina.” Monka mokilombwedilwe mu kishinte kibadikile, Leza usaka na nsangaji yonso amba tumufwene. O mwanda, witela aye mwine kodi kupityila ku Bible amba: “Ami ne Yehova, dyo dyami dijina.”—Isaya 42:8.

Leza witela aye mwine kodi kupityila ku Bible amba: “Ami ne Yehova, dyo dyami dijina.”—Isaya 42:8

Lelo ku mutamba wa Yehova kuyuka ne kwingidija dijina dyandi kudi na mvubu’ni nansha kekudipo na mvubu? Tala’po bidi: Dijina dya Leza, dyāsonekelwe na masomo aná a Kihebelu, ditanwa mu Bisonekwa bibajinjibajinji bya Kihebelu kubwipi kwa misunsa 7000. Ditanwa misunsa mivule mu Bible kutabuka majina makwabo. Na bubine buno i bubinga bulombola amba Yehova usakanga tuyuke ne kwingidija dijina dyandi. *

Divule dine bantu babidi bashilulanga kupwana na kwiyuka majina. Lelo uyukile dijina dya Leza?

Bantu bamo balañanga amba, Leza byadi i Ujila kadi Mwine Bukomo Bonso, kutela dyandi dijina i kubulwa bulēme. Shako na bubine, ke biyampepo kwingidija dijina dya Leza mu muswelo kewendele’mo, monka mokukokejejapo kupēlula dijina dya mulunda nobe wa pa mutyima. Inoko, kiswa-mutyima kya Leza i kya amba boba bamuswelo balēmeke dijina dyandi ne kwidiyuka. (Ñimbo 69:30, 31; 96:2, 8) Vuluka amba Yesu wāfundije balondi bandi balombele amba: “Tata wetu wa mūlu, dijina dyobe dipandulwe.” Tubwanya netu kulunga kuboko ku kupandulwa kwa dijina dya Leza na kwidiyukanya. Kulonga namino kuketufwenya pabwipi nandi.—Mateo 6:9.

Bible ulombola amba Leza utele mutyima nakampata boba “bafwatakanya pa dijina dyandi.” (Malaki 3:16) Yehova ulaile pangala pa muntu udi namino amba: “Nkamupudikanga kūlu, ke-muntu wayūka dijina dyami. Ukangitanga, nami nkamwitaba; Nkēkalanga nandi mu tusua.” (Ñimbo 91:14, 15) Kuyuka ne kwingidija dijina Yehova i kwa mvubu shi tusaka kwikala nandi mu kipwano kya pabwipi.

^ mus. 4 I kya bulanda, mwanda mu mashintuludi mavule kebatelele’mopo dijina dya Leza, nansha byoditanwa misunsa mivule mu Bisonekwa bya Kihebelu, biyukene bininge na bantu bu Kipwanino kya Kala. Inoko, ibapingakanye dijina dya Leza na majina a bitenta pamo bwa “Mfumwetu” nansha “Leza.” Shi usaka kuyukila’ko bivule pa uno mwanda, nankyo tala pa paje 195-197 wa dibuku Lelo I Bika Bine Bifundija Bible? dilupwilwe na Batumoni ba Yehova.