Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 BIPANGUJO BYA BATANGI . . .

I Bubine’ka Butala pa Noele?

I Bubine’ka Butala pa Noele?

Bantu bavule pano pa ntanda bafetanga Noele na bubinga palapala. Bamo basangelanga kupityija kitatyi pamo na babutule ne kisaka. Bakwabo balanguluka padi Leza ne kupityija kitatyi na kukwasha balanda ne bafudilwe. Shako mu bino bilongwa kemudipo kibi. Inoko, kyebyona i mine fetyi mulongelwa bilongwa’bya.

Kibajinji, bavule bafeta Noele bamwene amba bafetanga kubutulwa kwa Yesu. Ino, balembi ba mānga betabije amba difuku dya kubutulwa kwandi kediyukenepo. Dibuku dimo (The Christian Book of Why) dinena’mba, “bene Kidishitu babajinji bāpelele kutonga difuku dya pa bula dya kubutulwa kwa Yesu” mwanda bādi basaka “kwisansanya na bisela byonso bya bujentaila.” Kintu kitendelwa, i Bible mwine kalombwelepo nansha dimo amba Yesu mwine wādi ufeta difuku dya kubutulwa kwandi nansha kwa muntu mukwabo. Ino aye wāsoñenye balondi bandi bavuluke’ko lufu lwandi.—Luka 22:19.

Kya bubidi, befundi bavule banena’mba bisela bivule bya Noele i bitambe ku bibidiji bya bujentaila ke bya bwine Kidishitupo. Mu bino bisela mubadilwa Tata Noele, ne kwingidija mulundu kampanda wa mutyi ne mityi mikwabo ya Noele, kwishinta byabuntu, kusōka buji ne mityi ya Noele, kukobeka maluba ne ñimbo ya Noele. Pa kumona bino bisela byonso, dibuku dimo (The Externals of the Catholic Church) dyanene amba: “Kitatyi kyotutambula ne kupāna byabuntu bya Noele, ne kukobeka maluba mu mobo ne ku bipwilo byetu, le i banga motudi bayukile amba padi tulondanga bisela bya bajentaila?”

[Bushintuludi pa paje 11]

“Kitatyi kyotutambula ne kupāna byabuntu bya Noele, ne kukobeka maluba mu mobo ne ku bipwilo byetu, le i banga motudi bayukile amba padi tulondanga bisela bya bajentaila?” —The Externals of the Catholic Church

Padi ye uno wiipangula kibi kidi mu kulonda bino bisela bimweka bu byampikwa mwanda. Langulukila ne kumona uno mwanda wa busatu bu malondololo. Leza upelanga kulamika bisela bya bujentaila ku mutōtelo wandi utōka. Yehova Leza wāsapwidile batōtyi bandi ba mityima ibidi ba mu Isalela wa kala kupityila kudi mupolofeto wandi Amose amba: “Nashikwe nafutulula masobo enu . . . Fundula kondi lunwa lwa ñimbo yobe.”—Amose 5:21, 23.

Binenwa bilobo namino? En-en, tala byādi bilonga bantu ba mu bulopwe bwa kungala bwa Isalela. Yeloboame, mulopwe wabo umbajinji, wātūdile kyana kya ñombe mu kibundi kya Dani ne Betele kadi waongola bantu bekitōte pa kyaba kya kukatōta Yehova Leza mobifwaninwe ku tempelo yandi mu Yelusalema. Mulopwe wātūla’ko masomo ne kutonga babitobo amba bakwashe bantu mwa kusobela’o.—1 Balopwe 12:26-33.

Byālongele bene Isalela byādi bimweka bu biyampe. Ne kadi, mwene bādi balonga bino byonso amba i mwanda wa kutōta Leza ne kumusangaja? Binenwa bilobo bya Leza kudi Amose ne ku bapolofeto bakwabo bilombola patōka mwādi mumwena Leza bino bilongwa. Leza wānene kupityila kudi mupolofeto Malaki amba: “Amiwa Yehova nkyalamukangapo.” (Malaki 3:6) Le kino kekitudyumunapo pa mumwena Leza mafetyi onso atala pa Noele dyalelo?

Pa kupwa kubandaula ino myanda yonso, bantu bavule i baleke kufeta Noele. Ino, abo basangelanga kupityija kitatyi pamo na balunda ne kisaka na kukwasha balanda ne bafudilwe kitatyi kyonso kyobasaka mu bula bwa mwaka.