Lupuinga lwa kalabone kelumwekangapo kadi ludi na kyaka —ye mwikadile ne Satana

Kintu kyampikwa musombelo nansha kununka i kikomo kujingulula, kadi kibwanya kukwata muntu wampikwa kudyumuka. Padi kipindi kimo pa bibidi kya mu mfu yonso ifwile bantu ku bulembe kujokoloka ntanda, i kya bulembe bwa: lupuinga lwa kalabone (monoxyde de carbone). Inoko, kekudipo bubinga bwa kuzakela. Kudi miswelo ya kujiula luno lupuinga ne kwikinga’ko. Bantu bavule batūlanga tuñengele twa kudyumunañana ke bateje kidyumu kyo-kyonso.

Pamo bwa lupuinga lwa kalabone, Satana kamwekangapo, kapēlangapo kujingululwa na bantu, kadi uleta kyaka bininge. Inoko Leza ketulekelepo bitupu. Shi ulonde bino byabuntu byoketutela bitupēle Leza, kukatyinapo Satana.

Bukomo bwa kutonga. Yakoba 4:7 witusapwila’mba: “Lwai na Dyabola, nandi ukemunyema.” Nansha Satana byadi na bukomo, kabwanyapo kukutonona ulonge kintu kyokusakepo kulonga. I abe mwine wa kutonga. Petelo wa Kamo 5:9 unena’mba: “Mukomenei [Dyabola], mwimanije pototo mu lwitabijo.” Vuluka’mba Satana wāshile Yesu pa kumumona’mba wakomena matompo onso asatu. (Mateo 4:11) Nobe ukokeja kutonga kukomena bukomo bwa Satana.

Bulunda na Leza. Yakoba 4:8 witukankamika amba, “Fwenai kudi Leza.” Yehova mwine ukwita upwane nandi. Le ukapwana nandi namani? Muswelo muyampe i wa kushilula kwifunda myanda yandi idi mu Bible. (Yoano 17:3) Byobya byowifunda padi Yehova bikakutonona umusanswe, buno buswe nabo bukakulengeja ulonge kiswa-mutyima kyandi. (1 Yoano 5:3) Le i bika bikalongeka poenda usamba kipwano na Shobe wa mūlu? Yakoba amba, Leza ‘nandi ukakufwena.’

Yehova utūdile’ko mpangiko ya ku mushipiditu mwanda wa kukukinga

Mulao wa kukingwa. Tutanga mu Nkindi 18:10 amba: “Dijina dya Yehova i bu-kitēba kikomokomo: Moloke unyemenamo ne kupanda wapanda.” Shako, kino kekilombolapo amba dijina dya bunka dya Leza didi pamo bwa kijimba kampanda. Inoko, adyo dilombola’mba boba balēmekele binebine dijina dya Leza, bakokeja kumwita kitatyi kyonso amba ebakinge.

Kimfwa kya bine. Bilongwa 19:19 witusapwila mwanda umo utala bene Kidishitu bapya ba mu Efisesa amba: “Bine, bantu bavule badi balonga bya maleñanya baile na mabuku abo pamo basoka’o ku meso a bonso. Penepo babala lupoto  lwao batana’mba i bibese bya ndalama 50000.” * Bano bene Kidishitu basōkele bintu byonso bya majende, kwampikwa kubanga bei yabyo. Kino kimfwa kitukwasha bininge dyalelo. Ino ntanda ielele mu kabutyibutyi ne majende. Bintu ne bilongwa bimo bikwatañene na majende bimweka bu byampikwa mwanda bikokeja kwita bandemona. I kya mvubu kwela bino bintu, nansha shi bidi na lupoto’ka.—Kupituluka 18:10-12.

Rogelio, utelelwe mu kishinte kibajinji kya mu bino bishinte, mu bula bwa myaka yandi 50 mibajinji, kadipo ukulupile amba Dyabola udi’ko. Ino kupwa washintyile mumweno wandi. Mwanda waka? Rogelio uvuluka’mba, “Uno wadi musunsa wami umbajinji wa kwikala na Bible. Buyuki bwa mu Bisonekwa bwanekenye amba bine Dyabola udi’ko. Kadi buno buyuki bunkwashanga ne pano nkomene lupusa lwandi.”

“Buyuki bwa mu Bisonekwa bwanekenye amba bine Dyabola udi’ko. Kadi buno buyuki bunkwashanga ne pano nkomene lupusa lwandi”

Lelo usakanga kumona difuku dikafundulwa’ko Satana lonso? Ubwanya kukedimona. Bisonekwa bilaya amba kumeso’ku Dyabola, mwine ongolanga bantu bavule, ukelwa “mu dijiba dya mudilo ne bibidikityi.” (Kusokwelwa 20:10) Shako, mudilo ne kibidikityi kimwekelele kebibwanyapo usōka kipangwa kya ku mushipiditu. Penepo nanshi, dijiba dya mudilo difwaninwe kwelekeja bonakani bwa lonso. Satana kakikekala’kopo dikwabo kadi. Bine, kikekala kitatyi kya nsangaji mikatampe ku boba baswele Leza!

Pano’ko bidi, wifunde nyeke myanda itala padi Yehova ne pa mashinda andi. * Langa kwikala mu kitatyi kikanenwa amba, “Satana kakidi’kopo!”

^ mus. 8 Shi bino bibese bya ndalama yādi ndenadi ya bene Loma, nabya byonso pamo i mfutwa ya pa difuku ya kintu kya bengidi 50000—Leka, lupeto bungi!

^ mus. 11 Shi usaka kuyukila’ko bikwabo bitala padi Satana ne pa majende, tala dibuku Lelo I Bika Bine Bifundija Bible? mu shapita 10, lomba Kamoni wa Yehova akupe dino dibuku.