Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Kiteba kya Mulami  |  Kweji 10 2014

 BIBLE USHINTANGA BŪMI

Būmi Bwami Bwādi bwa Kwisakila

Būmi Bwami Bwādi bwa Kwisakila
  • MUBUTULWE MU 1951

  • NTANDA YABO ALEMANYE

  • PA KALA: MITATULO, MUSHIPIDITU WA BWANAPABO

BYONADI:

Mu myaka mityetye mibajinji ya būmi bwami, kyami kisaka kyadi kishikete kubwipi na Leipzig, Kutunduka kwa Alemanye, kubwipi na Czech ne na mikalo ya Polonye. Ponadi na myaka isamba, twaenda mu ntanda ya bweni mwanda wa kaji ka tata—dibajinji mu Brezile kupwa ke mu Ekwatere.

Ami pa kubwanya myaka 14, bauntuma kukafundila ku entelena mu Alemanye. Bambutwile bami byobadi kulampe mu Amerika wa Kunshi, nadi nenwe kwisasaketa ami mwine. Naikala na mushipiditu wa bwanapabo. Nkyadipo ntele mutyima bininge pa muswelo wadi na bilongwa byami na lupusa pa bakwetu.

Ami pa kubwanya myaka 17, bambutwile bami bajokela ku Alemanye. Dibajinji nadi nshikata mu yabo njibo. Ino mushipiditu wami wa bwanapabo waunengeja nkomenwe kwiivwana biyampe mu kisaka. Ami pa kubwanya myaka 18, nataluka ku njibo.

Pa kukimba kitungo kya būmi bwami, natunya kitatyi kya kukōkolokwa. Pa kupwa kumona būmi bwa bantu ne malongolodi a miswelo palapala, nayuka’mba kintu kiyampe kyonadi mbwanya kulonga na bwami būmi i kwibwingidija mwanda wa kunanga mu uno umbuo muyampe kumeso kwa bantu bwionakanya.

Natamba ku Alemanye, napota tukutuku kupwa naenda mu Afrika. Ino ne kwija mpika, najokela mu Bulaya mwanda wa kulongolweja tukutuku wami. Kitatyi kityetye pa kupita’po, naenda ku kyabu kya mu Portigale. Nakwata butyibi bwa kushiya tukutuku ne kwenda na kyombo.

Natwela mu kisumpi kya bansongwa badi beteakanya kwenda bukila bwa Kalunga ka Atalantike. Mu bukata mwabo namona’mo Laurie mukaji wa kusonga. Dibajinji twaenda pa bisanga bya Caribbean. Kupwa, pa kupwa kushikata bityetye mu Porto Riko, twajokela mu Bulaya. Twadi tukulupile kukasokola kyombo kyotubwanya kwalamuna bu kyombo kya kushikata’mo. Ino pa kupwa kukimba bityetye mu myeji’tu isatu, mwingilo wafula mu kitulumukila. Bauntweja mu busola bwa Alemanye.

Napityija myeji 15 mu byombo bya bulwi bya Alemanye. Mu bula bwa kino kitatyi, ami ne Laurie twesonga ne kwiteakanya  mwanda wa kwendelela na lwendo lwetu lwa mu būmi. Kitatyi kityetye kumeso kwa mwingilo wami wa busola, twapotele kyalo kya kyombo. Ponadi ñingila kaji ka bu sola, twaalamuna bityebitye kino kyalo ke kakyombo katyetye. Twadi na kitungo kya kushikata’mo ne kwendelela kunanga mu uno umbuo muyampe. I mu kino kitatyi—kupwa kwa kaji kami ka busola inoko kumeso kwa kupwa kakyombo—motwetene na Batumoni ba Yehova ne kushilula kwifunda Bible.

MUSWELO WASHINTYILE BIBLE BŪMI BWAMI:

Dibajinji, nkyadipo mwene kine kyonadi mfwaninwe kushintyila būmi bwami. Nasongele mukaji onadi nshikete nandi, kadi nkendi kala muleke kutoma mfwanka. (Efisesa 5:5) Byotwadi na mpango ya kunanga mu ntanda, nadi nanga’mba kupāna būmi bwetu mu kubandila bupangi bwa Leza bwa kutendelwa kwadi kulomba kulonga bukomo bwa binebine.

Inoko na bubine, nadi nsaka kushinta—nakampata bumuntu bwami. Byonadi muntu witatula kadi wikulupile bipitepite, nadi nkulupile bininge mu bwino bwami ne mu bintu byonadi nonga. Būmi bwami bwadi bwa kwisakila.

Difuku dimo, natanga Busapudi bwa Yesu butumbe bwa ku Lūlu. (Mateo, shapita 5-7) Dibajinji, navutakanibwe ñeni na byānene Yesu pa mwanda utala kwikala na nsangaji. Kimfwa, wānene amba boba banzala ne kyumwa badi na katōkwe. (Mateo 5:6) Nadi neipangula muswelo ubwanya muntu usakilwa bukwashi kwikala na katōkwe. Ami pa kwendelela kwifunda, najingulula’mba batwe bonso tusakilwa kwifunda myanda ya Leza, ino kadi amba tufwaninwe kuyuka na kwityepeja’mba bisakibwa byetu bibwanya kuvuijibwa. Bidi pamo bwa Yesu wānene amba: “Ba katōkwe i boba bayukile amba bafwaninwe kwifunda myanda ya Leza.”—Mateo 5:3.

Pa kupwa kushilula kifundwa kyetu kya Bible mu Alemanye, ami ne Laurie twavilukila mu Franse, kupwa ke mu Itadi mwenda mafuku. Konso kotwadi twenda, twadi tutana Batumoni ba Yehova. Nadi ntengwa bininge na buswe bwabo bwa binebine bobeswele abo bene na bene pamo ne bumo bwabo. Namwene amba Batumoni badi bine mu bu bana na bana bwa ntanda yonso. (Yoano 13:34, 35) Mwenda mafuku, ami ne Laurie twabatyijibwa ketudi Batumoni ba Yehova.

Pa kupwa kubatyijibwa, naendelela kushinta bumuntu bwami. Ami ne Laurie twakwata butyibi bwa kwenda ku mukunkujo wa Afrika ne kutyibulula Kalunga ka Atalantike, twaenda mu États-Unis. I pa kano kalunga—potwadi tulele batwe bubidi mu kakyombo katyetye ku tununu na tununu twa makilometele—ponayukile’mba Umpangi wetu wa ntumbo udi na mvubu kumpita. Byonadi na kitatyi kivule (kekwadipo bivule bya kulonga pa bukata bwa kalunga), nadi mpityija kitatyi kilampe mu kutanga Bible. Natengelwe nakampata na nsekununi ya būmi bwa Yesu bwa pano panshi. Wādi muntu mubwaninine wādi na bukomo butabukile kintu kyo-kyonso kyonadi nanga, ino kādipo wisakila. Būmi bwandi kebwādipo bwa kwisakila, ino bwādi bwimanine padi Shandi wa mūlu.

Namwene’mba nsakilwa kutūla Bulopwe bwa Leza pa kifuko kibajinji mu būmi bwami

Ami pa kulangulukila pa kimfwa kya Yesu, namona’mba nsakilwa kutūla Bulopwe bwa Leza pa kifuko kibajinji mu būmi bwami pa kyaba kya kutangidija bintu palapala byonadi nsaka kulonga. (Mateo 6:33) Ami ne Laurie pa kufika mu ntanda ya États-Unis, twakwata butyibi bwa kushikata’mo ne kuta mutyima ku butōtyi bwetu.

MUSWELO ONAMWENINE’MO:

Ponadi na būmi bwa kala bwa kwisakila, nadi nkomenwe kukwata butyibi. Inoko, pano natana nsulo ya tunangu tuyampe twa kundudika. (Isaya 48:17, 18) Kadi ngidi na kitungo mu būmi kyonkyadipo nakyo dibajinji—kya kutōta Leza ne kukwasha bakwetu befunde yandi myanda.

Ami ne Laurie twaningishe busongi bwetu na kwingidija misoñanya ya mu Bible. Kadi twibeselwe pa kubutula wetu mwana mwana-mukaji muyampe, mwine uyukile pano Yehova ne kumusanswa.

Ke kunenapo amba būmi bwetu budi pamo na būmi botwadi nabo potwadi twendakana. Inoko, na bukwashi bwa Yehova twi basumininwe kubulwa kuleka mwingilo wetu nansha kuleka kukulupila mwadi.—Nkindi 3:5, 6.