Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Kiteba kya Mulami  |  Kweji 8 2014

 BIPANGUJO BYA BATANGI . . .

Lelo I Ani Wāpangile Leza?

Lelo I Ani Wāpangile Leza?

Mona’po bidi mu ñeni shabana wisamba na wandi mwana wa myaka isaba-ibidi. Wamunena’mba, “Kalā ka kunyuma, Leza wāpangile ntanda ne byonso bidi’po, kadi wāpangile dyuba, kweji ne ñenyenye.” Mwana walangulukila’po bityetye ne kumwipangula’mba, “Tata, lelo i ani wāpangile Leza?”

Shandi wamulondolola’mba, “kekudipo muntu wāpangile Leza.” “Aye udi’ko nyeke.” Mu kino kitatyi mwana wasangela bino binenwa bipēla. Ino aye pa kutama, kino kipangujo kibaendelela na kumukambakanya. Wakomenwa kwivwanija muswelo ubwanya muntu kwikala’ko kwakubulwa ngalwilo. Mwanda enka ne diulu ne ntanda bidi na ngalwilo. Kaeipangula’mba, ‘lelo Leza wātambile kwepi?’

Lelo Bible ulondolola namani? Na bubine, bidi muswelo umo onka na mwalongelanga shabana wa mu kimfwa kyetu. Mosesa wāsonekele amba: “Abe Mfumwetu, . . . padi ne ngulu mīne keyapangilwepo. Nansha nshi mīne ne panopantanda pene kupangwa kwine mpika, ku kala-ā ka kunyuma kutūla ne kala-ā ka ku meso abe wi Leza.” (Ñimbo 90:1, 2) Mo monka ne mupolofeto Isaya nandi wānene amba: “Lelo kuyukilepo’ni? Lelo kwaivwenepo, a? Yehova mupangi wa mafulo a panopanshi, i Leza mafuku onso nyeke”! (Isaya 40:28) Kadi mukanda wa Yude nao unena’mba Leza udi’ko “tamba kalakala kene.”—Yude 25.

Bino bisonekwa bitulombola’mba Leza i “Mulopwe wa nyeke ne nyekeke,” monka mumutelele mutumibwa Polo. (1 Temote 1:17) Kino kishintulula’mba Leza udi’ko nyeke, nansha shi twele meso kunyuma namani. Kadi ukekala’ko nyeke mu mafuku a kumeso. (Kusokwelwa 1:8) Nanshi, kwikala kwaikele’ko nyeke po pemanine ngikadilo yandi ya bu Mwine Bukomo Bonso.

Mwanda waka uno mulangwe i mukomo kwivwanija? Mwanda būmi bwetu bwīpi bwitupanga mumweno mwishile kulampe na wa Yehova pa mwanda utala kitatyi. Leza byadi’ko nyeke, myaka kanunu kwadi idi pamo bwa difuku dimo. (2 Petelo 3:8) Tulete kimfwa: Lelo tete mwine uloñanga mu bukulu bwandi kintu kya mafuku 50, ubwanya kuyuka bula bwa būmi bwetu bwa myaka 70 nansha 80? Nansha dimo! Inoko, Bible ushintulula’mba tudi pamo bwa batete shi twidingakanye na Umpangi wetu Mukatampe. Enka ne bukomo bwetu bwa kulanga budi na mikalo bininge shi twibudingakanye na bwandi. (Isaya 40:22; 55:8, 9) O mwanda ke kya kutulumukapo shi muntu ukomenwa kwivwanija ne pa mfulo mwikadile Yehova.

Nansha mulangwe wa amba Leza udi’ko nyeke byoubwanya kukoma kwivwanija, tukokeja kumona’mba udi na buluji. Shi kudi muntu mukwabo wāpangile Leza, nabya uno muntu wādi wa kwikala Umpangi. Ino, Bible ushintulula’mba, Yehova ye “wapangile bintu byonso.” (Kusokwelwa 4:11) Pakwabo kadi, tuyukile’mba diulu ne ntanda kebyādi’kopo kitatyi kimo. (Ngalwilo 1:1, 2) Le byātambile kwepi? Umpangi wabyo wāikele’ko dibajinji. Kadi wādi’ko kumeso kwa bipangwa bikwabo bya ñeni, kimfwa wandi Mwana mubutulwe bunka ne bamwikeulu. (Yoba 38:4, 7; Kolose 1:15) Nanshi, wādi’ko bine dibajinji bunka bwandi. Kāpangilwepo, kadi kekwādipo kintu nansha kimo kyādi kibwanya kumupanga.

Kwikala’ko kwetu ne kwa diulu ne ntanda kulombola kwikala’ko kwa Leza wa nyeke. Mwine wāshilwile umbuo wetu mukatampe wa diulu ne ntanda, mwine wātūdile bijila bya mu bupangi bya kwiukwatakanya, ufwaninwe kwikala’ko nyeke. Nanshi i enka aye wāoile umpuya wa būmi mu bintu bikwabo byonso.—Yoba 33:4.