“Abe Yehova, ubamandaula ubangyūkidija.”—ÑIMBO 139:1.

“Meso obe amwene ngitu yami po yadi keyabwanininepo.” —ÑIMBO 139:16

KINE KITATENA BANTU BAMO: Bantu bavule balañanga’mba Leza umonanga bantu’nka bu bipya-mambo—bantu ba disubi ne bakafwaninwepo kuta mutyima. Kendra wadi ususuka na mutyima kupēpa, wadi witopeka bininge mwanda kadipo ubwanya kufikila ne pa mfulo pa misoñanya ya Leza. Mfulo mfulō wanene amba, “nalekele’byo kulombela.”

BYOBYA BIFUNDIJA KINENWA KYA LEZA: Yehova utalanga kulampe kupita pa kubulwa kubwaninina kobe, kadi uyukile mwine moikadile. Bible unena amba, “uyūkile ngitu yetu; witunena’mba, i luvumbi.” Ne kadi, ketulongelangapo bintu “mwendele mambo etu,” ino witulekelanga na lusa kitatyi kyotwisāsa.—Ñimbo 103:10, 14.

Tulangulukilei bidi pa kimfwa kya Davida, mulopwe mwine Isalela utelelwe mu kishinte kibajinji. Davida wālombele kudi Leza amba: “Meso obe amwene ngitu yami po yadi keyabwanininepo, kadi umukanda obe byonso byakungitu byami byasonekelwe . . . Mandaule, abe Leza, uyūkile mutyima wami.” (Ñimbo 139:16, 23) Bine, Davida wādi ukulupile amba nansha byaālongele bubi—kadi’nka ne bukatampe kyaba kimo—Yehova wādi ubwanya kujingulula mutyima wandi wa kwisāsa.

Yehova ukwivwanga biyampe kutabuka mukwivwaninanga bantu. Bible unena amba: “Muntu ubandila ponka paelele meso, ino Yehova ubandilanga pa mutyima.” (1 Samwele 16:7) Leza uyukile bikulengeja wiendeje wao muswelo—kibutwila kyobe, kitamina kyobe, kifuko kyoshikete’mo ne bumuntu bobe, bine bilombolanga moikadile. Umonanga ne kukwata na mvubu bu muntu bwine bokimba kwikala, nansha shi ubalonga bilubo.

Ino, lelo Leza wingidijanga namani bukomo bwandi bwa kuyuka ‘mwine moikadile’ mwanda wa kukusenga?