“Ami ne mulanda, ngidi makasa; ino [Yehova] umvulukanga.” *DAVIDA WA MU ISALELA, MU MYAKA KATWA KA 11 K.K.K.

“Mizo idi pamo’nka bwa dino dya mema mu mulondo.” —ISAYA 40:15

Lelo byādi byendele’mo Davida akimbe kutebwa mutyima na Leza? Lelo Leza ukutele mutyima? Bantu bavule bakomenwanga kwitabija amba, Leza mwine bukomo bonso wibatele mutyima. Mwanda waka?

Bubinga bumo i bwa amba, Leza i muntu wa peulu bininge kupita bantu bonso. Byamonwa bu udi pa kifuko kya peulu, mizo yonso “idi pamo’nka bwa dino dya mema mu mulondo, itēlwa’nka bwa kaluvumbi ka mu kitompekejo-kyabulēmi.” (Isaya 40:15) Mulembi umo wa lupata wa mu ano etu mafuku waendele kulampe ne kufula ku kunena amba, “kukulupila’mba kudi Leza utele mutyima na katentekeji ku bintu byolonga i kwitatula kukatampe.”

Pakwabo kadi, bantu bamo balañanga’mba mwiendelejo wabo wibalengejanga bekale bantu kebafwaninwepo kutebwa mutyima na Leza. Kimfwa, Jim muntu umo wa myaka mibwanine unena amba: “Nadi nombela kitatyi ne kitatyi ngikale muntu wa ndoe ne wifula, ino bukalabale kebwadipo bwija kunjokela nansha ke mwenda mafuku. Mfulo mfulō, nafula ku kunena’mba nadi mubi wa pa ludingo lukomenwa Leza kunkwasha.”

Lelo Leza udi kulampe bininge na bantu kwakomenwa kwibamona? Le bine wiivwananga namani pa bipangwa byandi byampikwa kubwaninina? Pa kubulwa kusokwelwa na Leza, kekudipo muntu ukokeja kwisamba biyampe myanda ya Leza ne kulondolola bino bipangujo. Inoko, Bible, musapu wa Leza wa ku bukomo bwa mushipiditu wapele muzo wa muntu, witukulupija’mba ke Lezapo udi kulampe katelepo bantu mutyima. Bible unena amba, kadipo “bine kulampe na batwe bonso.” (Bilongwa 17:27) Mu bishinte biná bilonda’ko, tukabandaula byobya bitulombola Leza pa kuta kwatele bantu mutyima ne pa muswelo waālombwele amba wādi utele bantu mutyima bya binebine pamo bwa abe.

^ mus. 3 Ñimbo 40:17; Yehova i dijina dya Leza monka modilombwedilwe mu Bible.