Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 IULAI LWITABIJO LWABO | YOSEFA

“Nemwisashila Ivwanai Bidi Kilotwa Kino’ki”

“Nemwisashila Ivwanai Bidi Kilotwa Kino’ki”

YOSEFA utala kutunduka koku ulengula meso, ulanga’mba ubwanya kushiya bendi-nandi ne kwibanyema. Kupita ino mikuna, kubwipi’tu ko kudi njibo yandi mu Hebelona. Shandi Yakoba wādi ushikete’mo ku kyolwa, pakubulwa kuyuka bifikīle wandi mwana wasenswe bininge. Ino Yosefa kādipo pano ubwanya kujokela kwadi, mwanda kintu kyādi kiyukile uno nkasampe i kino’mba, kādipo ubwanya kumona monka ino mpala ya mununu wasenswe. Bansunga bāmumwene paādi usomanya babo bangamedia mu lwendo lobādi benda mu dishinda dyenda kunshi. Bāikele nandi pano, kadi bādi basaka’nka kumumona. Kobadi, uno nkasampe wādi pamo bwa kintu kilēme ne bu māni—ko kunena’mba bya busunga bya mvubu byādi bikaselwa kulampe na Edipito.

Yosefa wādi padi na myaka 17. Mumone’po bidi mu ñeni walamuka utala meso sō ku makumbi a kutunduka, kwine kwādi dyuba kubwipi na kutamba kulampe kwa kalunga kakatampe, palonga bukomo bwa kwivwanija muswelo wādi wa kubipila’ko būmi bwandi. Byādi bikomo kwitabija’mba banababo bādi bakimba kumwipaya ne kumupotoloja bu umpika. Bine, Yosefa kalekelepo kusūmija impolo. Kābwenyepo kuyuka bintu byādi bimutengele kumeso.

Yosefa wājimije bwanapabo bwandi, ino ke lwitabijopo lwandi

Lelo Yosefa wādi wa kulonga namani mu ino ngikadilo mikomo? Ne i ñeni’ka yotubwanya kuboila ku lwitabijo lwa uno nkasampe wāsuswilwe ne kupelwa na bantu ba mu kisaka kyandi?

KISAKA KIKUTAKANE

Yosefa wādi mu kisaka kikatampe—ino kya kubulwa nsangaji ne bumo. Bible unena’mba kisaka kya Yakoba i kilomboji kya binebine kya lupusa lubi lwa kusonga bakaji bavule—ko kunena’mba kibidiji kyaādile miji kine kyātadile Leza bitupu mu bantu bandi kufika ne byaālwije wandi Mwana musoñanya umbajinjibajinji wa kusonga mukaji umo kete. (Mateo 19:4-6) Yakoba wādi na bana 14 baābutwile na bakaji baná—bandi bakaji babidi ba Lea ne Letyela, ne bengidi babo babidi ba Zipola ne Bila. Ku ngalwilo, Yakoba wādi usenswe Letyela wandi mukaji mupopoke. Kādipo ulamete Lea kakwa Letyela uno muswelo, mwine obamukutyile nkuku asonge. Pa bukata bwa bano bakaji babidi pādi mukao wa malwa, kadi uno mukao wāsambulukile ne ku bana ba mu yabo njibo.—Ngalwilo 29:16-35; 30:1, 8, 19, 20; 37:35.

Letyela wādi ñumba mu kitatyi kilampe, kadi paābutwile Yosefa, Yakoba wāmwene uno mwana  wa mu bununu bwandi bu wa pa bula. Kimfwa, kitatyi kyādi kyenda kisaka mu lwendo lwa kyaka lwāendele Yakoba kuketana na Esau mwanabo ntapani, Yakoba wālongele bukomo bwa kupa Letyela ne Yosefa wandi mwana kyepelo kya mutyima ntenke kunyuma kwa kisaka. Dino difuku dya kuvutakanibwa dyātulumwije Yosefa bininge. Langa’po bidi mwaēivwanine mu lwine lubanga’lwa paeipangula kashā upūtula meso bininge, kine kyenda kisunkutyila shandi mununu ino wa bukomo. Bine, wātulumukile pa kuyuka kine kyaādi usunkutyila amba: Shandi wālwile bufuku bonso na mwikeulu mukomo! Mwanda waka? Mwanda Yakoba wādi usaka Yehova Leza amwesele. Dyese dyātambwile Yakoba i dya kumushinta dijina ke Isalela. Muzo onso wādi wa kwityilwa pa dijina dyandi! (Ngalwilo 32:22-31) Kyaba kimo, Yosefa wāyukile’mba bana ba Isalela bādi ba kubutula bisaka bya uno muzo!

Mwenda mafuku, nkasampe Yosefa wemwena kinkumbulu kitatyi kyāmushile muntu wasenswe bininge aye ukidi mwanuke. Inandi wāfwile pa kubutula nkasandi Benjemani. Shandi wādi na bulanda bukatampe bwa kufwilwa. Mona’po bidi Yakoba mu ñeni upampula na kinyenye impolo mu meso a Yosefa, umusenga na lukulupilo lumo lonka na lwādi na Abalahama kambwa Yakoba. Bine, Yosefa wātengelwe pa kuyuka’mba Yehova ukalwija difuku dimo inandi ku būmi! Padi Yosefa wāikele na buswe bukatampe padi “Leza wa bōmi” wa buntu. (Luka 20:38; Bahebelu 11:17-19) Pa kupwa kufwilwa wandi mukaji, Yakoba wādi nyeke wivwanina bano bana babidi bana-balume lusa, bana baābutwile na Letyela.—Ngalwilo 35:18-20; 37:3; 44:27-29.

Bana bavule bāfityilwe pangala pa kuno kwibata mutyima kwa pa bula; ino Yosefa wāboile ñeni ku ngikadilo miyampe mivule ya bambutwile bandi, kadi wāikala na lwitabijo lukomo ne kuyuka kiyampe ne kibi. Pa kubwanya myaka 17, kāingila bu mukumbi, ukwasha batutu wandi bamo kitatyi kyaādi umona amba abalonga bibi. Lelo wādi utompa kutalaja myanda pa kusaka bamwitabije? Mu mwanda onso, wālongele byobya byoloke. Wādi ukalombola shandi myanda. (Ngalwilo 37:2) Padi kino kilongwa kya bukankamane kyo kyālengeje Yakoba asanswe uno mwana bininge. Bine, kino i kimfwa kiyampe kya kulangulukila’po bene Kidishitu bankasampe! Kitatyi kyotanwa pa ditompo dya kufya bubi bukatampe bwa muntu mukwabo—padi mubutule nansha mulunda—i biyampe kwiula Yosefa ne kukimba kuyuka shi boba badi na kyepelo kya kukwasha nonga-bibi i bayuke mwanda.—Levi 5:1.

Tubwanya kadi ne kuboila ñeni ku būmi bwa kisaka kya ba Yosefa. Nansha bene Kidishitu ba bine dyalelo byokebasoñengapo bakaji bavule, ino kudi kusobakana kwa bisaka mu bukata mwabo, na bambutwile balelele bana ba benē pabo, bana ba mulume nansha ba mukaji, ne bana ba munda mwa inabo. Bantu bonso babwanya kuboila ñeni ku kisaka kya Yakoba ya amba, ntondo ne  mboloji byonanga bumo mu kisaka. Bambutwile ba bisaka bisobakane baloñanga bukomo bwa kukulupija babo bana ne bana ba mulume nansha ba mukaji amba, yense i musanshibwe ne kupebwa byabuntu bya pa bula ne amba, yense ubwanya kutuntwila ku nsangaji ya kisaka.—Loma 2:11.

MUKAO UBAALA MIJI

Yakoba wādi usenswe Yosefa wandi mwana mwanda wādi na lwitabijo kadi moloke

Yakoba wāpele padi Yosefa bulēme mwanda wa kwimanina na bukankamane kwāimanine uno mwanuke byobya byoloke. Wālongēle wandi mwana mutwelo wa pa bula. (Ngolwilo 37:3) Wādi witwa divule bu mutwelo wa mingolojo nansha wa misombelo mivule, ino kudi’tu bukamoni butyetye bunenenwa namino. Yādi padi nkanzo milampe, miyampe, itamba ku makasa kufika ne ku maulu. Wādi padi mutwelo wa bukonge wādi uvwala muntu wa bulēme nansha mwana mulopwe.

Na bubine, Yakoba wādi umulangila, kadi Yosefa wātengelwe na kino kilomboji kya kumuta kwādi kumutele shandi mutyima ne kisanso. Inoko, uno mutwelo wāmuletele makambakano makatampe. Kintu kimo bidi, vuluka’mba uno nkasampe wādi wingila bu mukumbi. Kino kyādi kilomba kwingila mingilo mikomo ya makasa. Mona’po bidi mu ñeni nkasampe uvwele uno mutwelo wa bulopwe, upwasa mu biyombo bilampe, ukanda pa mabwe nansha kulonga bukomo bwa kukimba mukōko mujimine mu kimuna kya miba. Ino kibi kutabuka i kino, le kino kilomboji kya buntu bwa Yakoba bwa pa bula, kyāikele na lupusa’ka pa kipwano kya Yosefa na banababo?

Bible ulondolola amba: “Bāna babo pa kumona shabo byāmusanswa kupita ku bāna babo bonso ponkapo bamushikwa, ne kwisamba nandi biyampe mpikila.” * (Ngalwilo 37:4) Mukao wabo wādi padi mwendele’mo, inoko banababo na Yosefa babudilwe tunangu pa kwikala na ino milangwe ileta lufu. (Nkindi 14:30; 27:4) Lelo kashā kwaabile shi abate muntu mutyima nansha kumulēmeka pa kyaba kya kukuta’o abe? Vuluka banababo na Yosefa. Mukao wabo webātwele ku kulonga bintu byobeālakenye bininge mwenda mafuku. Kimfwa kyabo kivuluja bene Kidishitu amba i biyampe “[kusangala] na boba basangala.”—Loma 12:15.

Bine Yosefa wāmwene kantyokolo ka banababo. Penepa, le wāfile mutwelo wandi waādi usenswe kitatyi kyāmufwenene banababo? Wādi padi pa ditōmpo dya kulonga namino. Ino vuluka’mba Yakoba wādi usaka uno mutwelo wikale bu kilomboji kilombola’mba umuswele ne kumwitabija. Yosefa wādi usaka kwiendeja mungya kikulupiji kyādi kimukulupile shandi, o mwanda wādi uvwala nyeke uno mutwelo. Kimfwa kyandi kidi na kamweno kotudi. Nansha Tata wetu wa mūlu byakadipo na mboloji, utoñanga kyaba kimo bengidi bandi  ba kikōkeji ne kwibetabija. Pakwabo kadi, wibanenanga bekale basansane na ino ntanda mibi kadi myoneke. Pamo bwa mutwelo wa Yosefa wa pa bula, mwiendelejo wa bene Kidishitu ba bine wibashiyañanyanga na bantu bebajokolokele. Uno mwiendelejo ukolomonanga kyaba kimo mukao ne kantyokolo. (1 Petelo 4:4) Lelo mwine Kidishitu ufwaninwe kufya kayukeno kandi kene ka bu mwingidi wa Leza? Mhm—nansha ke Yosefa mwine kāfilepo mutwelo wandi.—Luka 11:33.

BILOTWA BYA YOSEFA

Kepāijijepo Yosefa wālota bilotwa bibidi bitulumukwa. Mu kilotwa kibajinji, Yosefa wēmwene aye mwine ne banababo, umo ne umo ukuta kīta kya miseke. Ino bīta bya banababo byajokoloka kīta kyandi ne kwikifukatyila pokimene bwimwa. Mu kilotwa kya bubidi, dyuba, kweji, ne ñenyenye 11 bivukwila kudi Yosefa. (Ngalwilo 37:6, 7, 9) Lelo Yosefa wādi ufwaninwe kulonga bika pa bino bimonwa byeni kadi byūmi?

Bino bimonwa byātambile kudi Yehova Leza. Byādi bimonwa bya bupolofeto, kadi Leza wāingidije Yosefa mwanda wa kupāna musapu wādi’mo. Mu buluji kampanda, Yosefa wādi ufwaninwe kulonga byonso byālongele bapolofeto mwenda mafuku kitatyi kyobādi basapula misapu ne butyibi bwa Leza ku bantu bandi ba byabulongelonge.

Yosefa wānene banababo na bunwa amba: “Nemwisashila ivwanai bidi kilotwa kino’ki kyo nalota.” Banababo bāivwena kilotwa, kadi kebāsangelepo nansha dimo. Bālondolola amba: “I binebine le uketubikadilanga abewa nanshi, a?” Nsekununi ibweja’ko amba: “Penepo baningisha kumushikwa byamwiko’tu mwanda wa bilotwa byandi.” Yosefa pa kusekunwina shandi ne banababo kilotwa kya bubidi, kebālongele’popo kintu kiyampe. Tutanga amba: “Shandi wamukanda kamunena’mba: Lelo kilotwa kine kyo walota i kilotwa ka? Lelo amiwa ne inobe ne bamwanenu bene, binebine tukāye kukwivukwila abewa, a?” Inoko, Yakoba wādi’nka ulangulukila pa uno mwanda. Lelo i Yehova wēsambile na uno nkasampe?—Ngalwilo 37:6, 8, 10, 11.

Yosefa kādipo mwingidi wa Yehova mubajinji nansha wa mfulo wānenwe kusapula musapu wa bupolofeto wāmwekele bu keuyukenepo kadi utwala ku kupangwapangwa. Yesu i muntu mukatakata wāsapwile musapu wa uno muswelo, kadi wāsapwidile balondi bandi amba: “Shi bampangilepangile amiwa, ne banwe bene bakemupangapanga.” (Yoano 15:20) Bene Kidishitu ba myaka yonso babwanya kuboila ñeni mivule ku lwitabijo ne bukankamane bwa nkasampe Yosefa.

MUSHIKWA UBANANE

Kitatyi kityetye pa kupita’po, Yakoba wātuma nkasampe Yosefa mu lwendo. Bana bakulu bākatwele luombe kungala kubwipi na Shekema, kwine kokebāijijepo kwikala balwana nandi bakatampe. Na bubine, Yakoba wādi utele bandi bana mutyima, o mwanda wātumine Yosefa akebatale shi badi biyampe. Le ulanga Yosefa wēivwene namani? Wādi uyukile’mba banababo bamushikilwe bininge! Lelo badi ba kwitabija āye kobadi bu musedi wa myanda ya shandi? Inoko, aye Yosefa wāendele na kikōkeji.—Ngalwilo 34:25-30; 37:12-14.

Lwādi lwendo lwa binebine—lwendo lwa kwenda padi mafuku aná nansha atano. Kibundi kya Shekema kidi ku makilometele 80 kungala kwa Hebelona. Ino Yosefa pa kufika ku Shekema, wāivwana’mba banababo abaenda ku Dotani, kibundi kidi ku makilometele makwabo 22 nansha kungala. Yosefa pa kufika kubwipi na Dotani, banababo bamumwena kulampe wiya. Enka penepa, mushikwa wabo wamweka patōkelela. Tutanga nsekununi amba: “Benena bene na bene’mba: Monapo bidi, mukelenge ulotanga’wa awa wiya. Twayai nanshi tumwipaye ne kumwela mu kina kimo, penepa tukanena’mba: I nyema mubi wamukokwete; ebiya tukamonanga mo bikekadila bilotwa byandi.” Inoko, Lubeni wānekenya banababo bele Yosefa mūmi mu kina, na kikulupiji kya amba ukapandija nkasampe mwenda mafuku.—Ngalwilo 37:19-22.

Aye kuyuka mpika, Yosefa wēbafwena na kikulupiji kya amba baketana mu ndoe. Ino banababo bamulwa! Na kimpuma kyonso, bamuvula mutwelo wandi wa pa bula, ne kumukokela mu kina mūmu mema ne kumutonwena’mo. Yosefa waponena’mo! Misanshi pa kumupwa, wetonona na maulu, ino kābwenyepo kutamba’mo aye mwine. Mawi a banababo pa kutyepa, wāmona’nka makumbi. Wēbela lubila, wēbesāshila, ino kashā  bamusūla. Na mutyima mūmu, bādya bidibwa kubwipi’tu. Lubeni byākadi’popo, kebakimbe monka kwipaya uno nkasampe, ino Yuda wēbanekenya bamupotoloje ku bampotyi bapityeshinda. Kibundi kya Dotani kyādi kubwipi na dishinda dya bya busunga dyenda ku Edipito, kadi kekwādipo kulampe na kwādi kupityila bene Ishemele ne bene Midyana. Kumeso kwa Lubeni kujoka, bamupotoloja. Bāpotoloja mwanabo bu umpika ku shekele 20. *Ngalwilo 37:23-28; 42:21.

Yosefa wālongele byoloke, ino banababo bāmushikwa

Nanshi tujokelei bidi ku ngalwilo kwa uno mwanda. Pobāselēle Yosefa kunshi mu dishinda dyenda ku Edipito, umweka bu wājimije bintu byonso. Wādi kulampe na kisaka! Kādipo uyukile kintu nansha kimo pa kisaka kyandi mu bula bwa myaka mivule—pa bulanda bwāivwene Lubeni paājokele ne kutana Yosefa ke mwende kala, pa njia yādi na Yakoba pobāmudimbile ñeni na kumukulupija’mba Yosefa muswe wandi wafu, padi Izake nkambo wandi mununu wādi ukidi mūmi, ne padi Benjemani nkasandi wasenswe mwine wādi umulanga difuku ne difuku. Ino, le Yosefa wāshele kwampikwa kintu?—Ngalwilo 37:29-35.

Yosefa wādi ukidi na kintu kekyādipo kibwanya banababo kumuyata: lwitabijo. Wādi uyukile bintu bivule padi Yehova Leza wandi, kadi kekudipo kintu nansha kimo kyādi kibwanya kumusompola buno buyuki—nansha ke kujimija njibo yandi, bupika busansa mu lwendo lwa ku Edipito nansha ke kufwijibwa bumvu bwa kupotolojibwa bu umpika kudi mpeta mwine Edipito witwa bu Potifela. (Ngalwilo 37:36) Lwitabijo lwa Yosefa ne kusumininwa kwaādi usumininwe kwikala nyeke pabwipi na Leza, byātamine’tu mu ano masusu. Mu bishinte bilonda’ko, tukamona lwitabijo lwa Yosefa molwāmulengejije ekale na kamweno kudi Yehova Leza wandi ne ku kisaka kyandi kya kavutakanya. Bine, i biyampe twiule lwitabijo lwa Yosefa!

^ mus. 15 Bakimbi bamo banene’mba, banababo na Yosefa bāmwene kyabuntu kyāpelwe Yosefa na shandi bu bukamoni bulombola’mba udi na mulangwe wa kupa uno nkasampe kyepelo kya mwana umbajinji. Bādi bayukile’mba Yosefa wādi mwana mubajinji wābutwile Yakoba na wandi mukaji wasenswe—mwine waādi usaka kusonga dibajinji. Kadi, Lubeni mwana mubajinji wa Yakoba wālele na mukaja shandi wa mutundu, wafwija shandi bumvu ne kujimija kyepelo kyandi kya kubutulwa.—Ngalwilo 35:22; 49:3, 4.

^ mus. 25 Nansha ke mu ino minite ibala inga, nsekununi ya mu Bible i ya binebine. Mikanda ya mu kine kitatyi’kya ilombola’mba, bapika ba mu Edipito bādi bapotwa ku ma shekele 20.