Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Lelo Ubwanya Kumona Leza Wampikwa Kumweka?

Lelo Ubwanya Kumona Leza Wampikwa Kumweka?

“LEZA i Mushipiditu,” keubwanyapo kumonwa na bantu. (Yoano 4:24) Inoko, Bible unena’mba bantu bamo bāmwene Leza mu buluji kampanda. (Bahebelu 11:27) Le kino kibwanika namani? Le bine ubwanya kumona “Leza wampikwa kumweka.”—Kolose 1:15.

Tudingakanyei bidi ngikadilo yotudi’mo na idi’mo mpofu wa kibutwila. Lelo bupofu bwandi bumulengejanga akomenwe kuyuka kifuko kyashikete’mo? Nansha dimo. Mpofu uyukanga myanda mu miswelo palapala mine imukwashanga ayuke bantu, bintu ne mingilo ingilwa kuntu kwashikete. Mpofu umo unena’mba, “kumona ke mesopo. I ñeni.”

Mu muswelo umo onka, nansha byokubwanyapo kwingidija meso obe mwanda wa kumona Leza, ubwanya kwingidija “meso a mutyima” obe mwanda wa kumumona. (Efisesa 1:18) Langulukila bidi pa miswelo isatu yokokeja kumumona.

“UMWEKELANGA BIYAMPE MU BUPANGI BWA PANO PA NTANDA”

Divule dine mpofu udi na byumvwanino bikomo bya kwivwana ne kutenga, bine byaingidijanga mwanda wa kuyuka bintu byakabwanyapo kumona. Mu muswelo umo onka, nobe ubwanya kwingidija byumvwanino byobe mwanda wa kubandaula bintu bikujokolokele ne kumona Leza wampikwa kumweka wēbipangile. “Ngikadila yandi yampikwa kumweka i mimweke patōka tamba ku kupangwa kwa ino ntanda, mwanda i mimwekelele mu bintu byalongele.”—Loma 1:20.

Kimfwa, langulukila bidi pa kīkalo kyetu. Ntanda yāpangilwe mu muswelo wa pa bula pa mwanda wetu, ke pa mwandapo wa kwikala’po bitupu ino kwikala’po na būmi bwa nsangaji. Kitatyi kyotwivwana kaluvula kayampe, kakyanga ka dyuba, kudya kipa kitobala, nansha kwivwana tōnyi tudila biyampe, tusangalanga bininge. Lelo bino byabuntu kebilombolapo tunangu twa Umpangi wetu, kinyenye ne buntu bwandi?

Le i bika byokokeja kwifundila kudi Leza kupityila ku bintu byomona mu umbuo wa diulu ne ntanda? Kintu kimo bidi, madiulu alombolanga bukomo bwa Leza. Bukamoni bwa sianse ya panopano bulombola’mba, umbuo wa diulu ne ntanda kewendangapo’nka ubaila’ko, ino kadi ubayanga lubilolubilo! Kitatyi kyotala mūlu bufuku, wiipangule amba: Le kwatambile buno bukomo bubaija umbuo wa ntanda lubilolubilo i kwepi? Bible witulombola’mba Umpangi udi na “bukomokomo.” (Isaya 40:26) Bupangi bwa Leza bwitulombola’mba i “Mwinebukomobonso”—i “mutabuke mu bukomokomo byamwiko’tu.”—Yoba 37:23.

“YE AYE WAMUSHINTULULA”

Inabana umo udi na bana babidi unena amba: “Kunena i kintu kimo kibadilwa mu bintu bya mvubu mpata pa kufundija bana. Wibalombole kintu kyo-kyonso kyomona ne kwivwana, [kadi] witeakanye kushintulula nyeke byobya byomona. Wi abo meso.” Mu muswelo umo onka, nansha byokudi “kutupu muntu ke mumone Leza nansha dimo,” Yesu Mwanā Leza “udi dya mu kyadi kya Tata ye aye Wamushintulula.” (Yoano 1:18) Byadi kipangwa kya Leza kibajinji, kadi Mwanā Leza mubutulwe bunka, Yesu i “meso” etu a kutala momwa mūlu. I nsulo milumbuluke ya myanda ya Leza wampikwa kumweka.

Tala’tu bintu bityetye byāshintulwile Yesu padi Leza, mwine wāpityije kitatyi kilampe na Shandi:

  • Leza wingilanga kwampikwa kukōka. “Tata wingilanga’nka kwingila kufika ne pano pene, ne ami nami ñingilanga’nka kwingila.”—Yoano 5:17.

  • Leza uyukile bintu byotusakilwa. “Shenu Leza uyukile bine byomusakilwa ne banwe bene kemwamulombele’byo.”—Mateo 6:8.

  •  Leza uvuijanga bisakibwa byetu na buntu. “Shenu udi mūlu, . . . aye utambijanga dyuba dyandi ku babi ne ku bayampe kadi unokejanga mvula ku boloke ne ku bakondame bene.”—Mateo 5:45.

  • Leza witumwene na mvubu umo ne umo. “Lelo kebapotejangapo misolwe ibidi ku kityele kimo kya mvubu mityetye’ni, a? Inoko, i kutupu nansha umo uponanga panshi pampikwa Shenu kuyuka. Ino, enka ne nywene mine ya ku mutwe wenu i mibalwe yonso. Nanshi kemwakityinai: Mudi na bulēme kutabuka misolwe mingi.”—Mateo 10:29-31.

MUNTU WĀMWEKEJE LEZA WAMPIKWA KUMWEKA

Bampofu bavudile kwivwanija bintu mu muswelo mwishile na bantu bamona. Mpofu ubwanya kuyuka kyemba, ke bu kifukopo kya mfindi kya kubulwa kitōkeji kya dyuba, ino bu kifuko kya kufyama’mo kyanga kya dyuba. Monka kemubwaninyapo mpofu kumona mwemba nansha kitōkeji kya dyuba, netu ketubwanyapo kwivwanija Yehova na bukomo bwetu. O mwanda Yehova wāletele muntu wāmwekeje mu muswelo mubwaninine ngikadilo ne bumuntu Bwandi.

Uno muntu i Yesu. (Fidipai 2:7) Yesu kēsambilepo’nka myanda ya Shandi, ino wētulombwele ne mwikadile Leza. Fidipa mwanā bwanga wa Yesu wāmwipangwile amba: “A Mfumwami, witulombole Shobe.” Yesu wāmulondolola amba: “Yewa umona ami wamone ne Tata mwine.” (Yoano 14:8, 9) Le i bika byobwanya “kumona” padi Tata kupityila ku bilongwa bya Yesu?

Yesu wādi musangamuke mashi, mwityepeje kadi ulumbwa. (Mateo 11:28-30) Ngikadilo yandi itūkija bantu mutyima yādi ibakokela kwadi. Yesu wādi wivwana misanshi yādi ivwana bakwabo, kadi wādi usangala nabo. (Luka 10:17, 21; Yoano 11:32-35) Kitatyi kyotanga nansha kwivwana nsekununi ya Yesu idi mu Bible, ingidija byumvwanino byobe ne kumona mu ñeni yobe ino myanda ilongeka. Shi ulangulukila pa muswelo wādi wikele Yesu na bantu, ukabwanya kumona biyampe bumuntu bwa Leza bwa kutendelwa ne kufwena Kwadi.

KULAMAKANYA BIPINDI PAMO

Mushiludi umo unena pa muswelo umwenanga mpofu mu ino ntanda amba: “Utambulanga myanda mityetye ne kipindi, kupityila ku masulo palapala (kutenga, kulula, kwivwana ne bikwabokwabo), kupwa wakongakanya ino myanda mwa kimo mu muswelo kampanda.” Mu muswelo umo onka, kitatyi kyobandila mingilo ya bupangi bwa Leza, kyotanga byobya byānene Yesu padi Shandi ne kyobandaula muswelo wālombwele Yesu ngikadilo ya Leza, ukamona Yehova mu ñeni senene. Ukamumona bu udi’ko binebine.

Yoba wāikele’ko mu kitatyi kya kala, wēmwenine uno mwanda. Wānene dibajinji ‘kyokya kyākadipo wivwanije.’ (Yoba 42:3) Ino pa kupwa kubandaula na katentekeji bupangi bwa Leza bwa kutendelwa, Yoba wāfudile ku kunena amba: “Nadi nkwivwana na kutwi bitupu; ino pano namino dīso dyami dibakumone.”—Yoba 42:5.

‘Shi umukimba Yehova, ukatanwa kōdi’

Kino nobe kibwanya kukufikila. “Shi umukimba [Yehova], ukatanwa kōdi.” (1 Bilongwa 28:9) Batumoni ba Yehova bakasangela kukukwasha ukimbe ne kutana Leza wampikwa kumweka.