Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MUTWE WA MWANDA WA PA KIBALU | LE KUDI MUNTU UBWANYA KUYUKA BYA KUMESO?

Bintu Bimo Byāfikidile, Bivule Byakomenwe

Bintu Bimo Byāfikidile, Bivule Byakomenwe

Le usakanga kuyuka būmi bobe bwa kumeso? Bino byobisakanga kuyuka bantu bavule. Kudi bavule balayanga binkumenkume biya kumeso, bilongeka mu miswelo palapala. Tala bimfwa bidi kunshi’ku:

  • BEFUNDI BA SIANSE bengidijanga bingidilwa bya busendwe bwa peulu ne lupeto luvule mwanda wakuyuka bintu palapala bīya kumeso pamo bwa, muswelo ubwanya konwa ntanda na luvula loneke ne kuyuka shi mvula usa kunoka kesha mu bipindi kampanda bya ntanda.

  • BABANDAUDI BA ÑENI balayanga kushinta kwa myanda ya busunga ne ya politike. Warren Buffett, umo wa mu bampeta bakatampe ntanda yonso, waityilwe bu mupolofeto mwanda wadi uvudile kulaya bintu bifikidila bitala myanda ya busunga. Nate Silver, mubandaudi mukwabo, wabandawile bintu byamukweshe kulaya myanda palapala ikalongeka mu politike ya États-Unis mu filime ya Hollywood.

  • BINTU BYA KALA byashintulwilwe bu bupolofeto. Bantu bamo bamonanga amba bilembwa bya kubulwa kushilakana bya (Nostradamus) bya mu myaka katwa ka 16 bifikidilanga mu ano etu mafuku. Kalandadiye katala kunshita kwa bintu ka Maya, kafudile mu mafuku 21 Kweji 12, 2012, kamwenwe na bantu bamo bu kintu kilombola binkumenkume bikatampe bisa kulongeka.

  • BENDEJI BA BIPWILO balayanga kyaba kimo bintu bibi bisakulongeka ntanda yonso, mwanda kudyumuna bantu ne kukongakanya balondi. Harold Camping mupolofeto wa mfulo ya ntanda, ne balondi bandi basapwile koku ne koku amba, ntanda isakonakanibwa mu 2011. I bikomo’nka ne mwa kunenena, ntanda ikidi’ko.

  • BANTU BA MAJENDE betelanga bu badi na bukomo bwa kulaya bintu bya kumeso. Edgar Cayce ne Jeane Dixon, abo bonso balaile binkumenkume bimo bya bine mu myaka katwa ka 20. Ino abo bonso bivule byobalaile kebyafikidilepo. Kimfwa, Dixon walaile amba mu 1958 mu kalongeka Divita dya III dya Ntanda Yonso. Kadi Cayce walaile amba kibundi kya New York kikalobela mu dijiba pa bukata bwa myaka ya 1970.

Le na bubine kekudipo dishinda dikulupilwa dya kuyuka bintu bya kumeso? Kino i kipangujo kiyampe kwipangula. Shi wadi ubwanya kuyuka bintu bya kumeso būmi bobe bwadi bwa kushinta.