Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MUTWE WA MWANDA WA PA KIBALU | KIKOMENINWE BANTU BAVULE KUSANSWA LEZA

Bubela bwa Amba Leza Kadipo na Dijina

Bubela bwa Amba Leza Kadipo na Dijina

BYOBYA BIKULUPILE BAVULE

“Ketwadipo twiivwene shi Leza ubwanya kwikala na dijina, ne shi udi nadyo, le i dijina’ka.”—David Cunningham Polofesele wa Teoloji.

BUBINEBINE BWA MU BIBLE

Leza wānene amba: “Ami ne Yehova, dyo dyami dijina.” (Isaya 42:8) Yehova i dijina dya mu Kihebelu dishintulula’mba “Yewa Wikadija Ke.”Ngalwilo 2:4.

Yehova witusakilanga twingidije dijina dyandi. Bible unena’mba, “telai’dyo amba dijina dyandi; sapulai bilongwa byandi umbukata mwa bantu’ba, telai’dyo amba dijina dyandi i dizunzulwe.”Isaya 12:4.

Yesu wāingidije dijina dya Leza. Yesu wālombwele Yehova mu milombelo amba: “Nayukanya dijina dyobe kobadi [bana ba bwanga ba Yesu] kadi nkediyukanya.” Mwanda waka Yesu wāyukenye dijina dya Leza ku bandi bana ba bwanga? Wābwejeje’ko amba: “Amba buswe bowaunsenswe [Leza] bwikale mobadi kadi ami nami umbumo nabo.”Yoano 17:26.

MWANDA WAKA KIDI NA MVUBU?

Walter Lowrie mwifundi wa teoloji wasonekele’mba, “muntu kayukilepo dijina dya Leza kamuyukilepo bu muntu udi’ko binebine, kadi kabwanyapo kumusanswa shi umuyukile’tu’nka bu bukomo kampanda.”

Kufya nansha kupingakanya dijina dya Leza dya bunka kudi pamo bwa kwiditalula mu Bible

Muntu umo witwa bu Victor wadi wenda ku kipwilo kyabo yenga ne yenga, ino kadipo umwene’mba uyukile Leza bya binebine. Unena’mba “kitatyi kyonayukile amba dijina dya Leza i Yehova, nadi pamo bwa ami weyukanya kwadi. Neivwene pamo bwa ami wafula ku kwitana na Muntu onadi ngivwana yandi myanda. Nafudile ku kumumona bu Muntu udi’ko bine ne kutamija nandi kipwano.”

Yehova nandi, ufwenanga bantu bengidija dijina dyandi. Leza ulaile pangala pa boba “bafwatakanya pa dijina dyandi,” amba: “nkebapandija’nka bwa muntu upandija mwana wa aye mwine umwingidila.” (Malaki 3:16, 17) Kadi Leza upalanga mpalo boba beta pa dijina dyandi. Bible unena amba: “Ense wa kwita dijina dya Yehova ukapandanga.”Loma 10:13.