Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MWISAMBO NA MULONDAKANI

Lelo Leza Utele Mutyima ku Masusu Etu?

Lelo Leza Utele Mutyima ku Masusu Etu?

Uno ulonda’ko’u i mwisambo ubwanya Kamoni wa Yehova kwisamba na mulondakani. Tufwatakanyei bidi Kamoni umo witwa bu Michelle waiya ku njibo ya mwana-mukaji witwa bu Sophia.

LE UBWANYA KULEKA KINO KILONGEKA NAMANI?

Michelle: Dyalelo ñendanga mpa muntu yense wa mu mukenza uno trakte. Udi na mutwe wa mwanda unena’mba Lelo Usaka Kuyuka Bubinebine? Obe nandi yeu.

Sophia: Le wisambilanga pa myanda ya Leza?

Michelle: En-en. Tala bipangujo bisamba bilembelwe pa kibalu. Le i kipangujo’ka—

Sophia: Nkutyampe’po bidi pa ludimi. Kwisamba nami i kwela kyobe kyaba.

Michelle: Mwanda waka ubanena nankyo?

Sophia: Bubine i buno, nkikulupilepo mudi Leza.

Michelle: Biyampe, nasangela kubulwa budimbidimbi kobe. Nkwipangule’po bidi, le kwitabijepo mudi Leza tamba kala ?

Sophia: Mhm, ponātamine nādi ñenda ku kipwilo. Ino pano kepadi mafuku kikyendanga’kopo.

Michelle: Uhm. Ino leka bidi netele. Dyami ne Michelle.

Sophia: Ami nami ne Sophia.

Michelle: Nasangala kwitana nobe, abe Sophia.

Sophia: Nami nasangala kwitana nobe.

Michelle: Nkiilepo kukuningila witabije nkulupilo yami abe Sophia. Ino kwipangule’po bidi. Le kudi kintu kampanda kyākulengeje utatane kwikala’ko kwa Leza?

Sophia: En-en. Mama wādi mu motoka wālongele akishida pano kepadi myaka 17.

Michelle: Yō, natengwa pa kwivwana wao mwanda. Lelo wātapilwe bilonda?

Sophia: Bine, i mutyumukile panshi tamba penepa.

Michelle: Bine, bidi bulanda. Bibwanya kukuvutakanya ñeni.

Sophia: I amo. Nkibwanyapo kumukwasha ino neipangulanga’mba, shi Leza udi’ko, le wālekele namani kino kilongeka? Mwanda waka Leza witulekele tususuka uno muswelo?

LE I BIBI KWIPANGULA KINE KYALEKELE’KO MASUSU?

Michelle: Milangwe yobe ne bipangujo byobe i byendele’mo. Kitatyi kyo tususuka, i byendele’mo kwiipangula kine kyotususukila. Bine, enka ne bana-balume ne bana-bakaji ba kikōkeji ba mu kitatyi kyāsonekelwe Bible, nabo bēipangwile pa uno mwanda!

Sophia: Bine?

Michelle: Bine kadi. Le umona’mba i biyampe nkulombole kimfwa kimo kya mu Bible?

Sophia: Bine nombole’kyo.

Michelle: Tala kipangujo kyāipangwile Habakuka mupolofeto wa kikōkeji kudi Leza, kisonekelwe mu Habakuka, shapita 1, vese 2 ne 3 kya amba: “A Yehova, i ku mwaka ka o nkakwabija, nobe kwivwana mpika, a? Nakwabija mwanda wa bingojila, ino abe kumpandijapo mpika. Lelo i mwanda ka o wandaija bukondame?” Lelo bino bipangujo bimweka bu biifwene na byokodi mwipangule?

Sophia: Bine biifwene.

Michelle: Leza kāfuninepo Abakuka pa kumwipangula bino bipangujo, nansha kunena Habakuka’mba usakilwa’tu lwitabijo luvule.

Sophia: Ō, bibasangaja’po kashā.

YEHOVA USHIKILWE MASUSU

Michelle: Bible ufundija’mba Leza umonanga masusu otususuka ne amba wiatele mutyima.

Sophia: Le ukimba kunena bika?

Michelle: Leka bidi nkulombole pano kimfwa kimo kidi mu Divilu 3:7. Le ubwanya kutanga uno vese?

 Sophia: Biyampe. Unena amba: “Kwivwana kudi Yehova amba: Binebine namone disusu dya bantu bami badi mu Edipito, kabidi naivwana madilo abo pa mwanda wa tulala twa mingilo ya kitungo kyabo, ino ngyukile misongo ya mityima yabo.”

Michelle: Wafwa’ko. Kukwatañana na kino kisonekwa, lelo Leza umonanga kitatyi kisusuka bantu bandi?

Sophia: Bine, bimweka bu umonanga.

Michelle: Kadi kayukilepo’tu enka bilongeka. Ino tala kipindi kya mfulo kya uno vese. Leza Unena amba: “Ngyukile misongo ya mityima yabo.” Le bino binenwa bivwanika bu binenwa bya Leza wa kalengwa?

Sophia: Mhm, nansha dimo.

Michelle: Na bubinebine, Leza kamonengapo’nka makambakano etu, ino wivwananga bulanda kitatyi kyotudi na makambakano.

Sophia: I amo.

Michelle: Na kino mu ñeni, tutange bidi mwanda mukwabo utala pa kitatyi kyāsusukile bantu ba Leza. I musonekwe mu Isaya 63:9. Kipindi kibajinji kya uno vese kinena amba: “Ebiyampe mu disusu dyabo dyonsololo aye wasusulwa.” Le penepa, ukanena’mba Leza wātengelwe na masusu a bantu bandi?

Sophia: Bine, bivwanikwa wao muswelo.

Michelle: Bubine i buno abe Sophia, Leza witutele mutyima bininge, kadi ushikilwe kumona masusu otususuka. Kitatyi kitusansa mutyima, wandi nao umusansanga.

MWANDA WAKA WILAIJE?

Michelle: Kumeso kwa ami kwenda, kudi mulangwe umo onsaka kwisamba nobe.

Sophia: Biyampe.

Michelle: Tala bitufundija Bible pa bukomo bwa Leza. Kisonekwa kyonavuluka i kya Yelemia 10:12. Le ubwanya kwikitanga?

Sophia: En-en. Kinena amba: “Aye walongele panopanshi ne bukomo bwandi, wakomeja panopantanda ne bwino bwandi, kadi pa kwivwanija kwandi wāla madiulu.”

Michelle: Wafwa’ko. Tulangulukile bidi bityetye pa kino kisonekwa. Mwene Leza wādi ufwaninwe kwikala na bukomo buvule pa kupanga diulu ne ntanda ne bintu byonso bidi’mo?

Sophia: I amo.

Michelle: Penepa, shi Leza udi na bukomo bwa kupanga bintu byonso bitujokolokele, lelo ketukakulupilapo amba udi ne na bukomo bwa kuludika bupangi bwandi?

Sophia: Bine udi nabo.

Michelle: Langulukila bidi monka padi inobe. Mwanda waka bikusansanga pa kumumona ususuka?

Sophia: Mwanda musenswe. I mama.

Michelle: Shi wadi na bukomo bwa kumundapa dyalelo, mwene wadi wa kumundapa?

Sophia: En-en.

Michelle: Langulukila pa mobishintulwila. Bible ufundijanga’mba Leza umwene masusu etu, uteñwanga pa mwanda wetu, kadi udi na bukomo bukatampe. Le kumwenepo amba, i kwīfula kwa Leza kulengeje aleke kupwa kiponka na ponka masusu otususuka?

Sophia: Kashā nkyalangile uno muswelo.

Michelle: Lelo udi na bubinga bwinebwine bwa kulekala kupwa kiponka na ponka makambakano etu? *

Sophia: Uhm, mona’mba ubwanya kwikala nabo

Michelle: Naivwananga telefone yobe idila, nanshi nsa kwiya kitatyi kikwabo, ebiya ketwiya kwisambila monka pa uno mwanda.

Sophia: Wafwa’ko. Nkasangala. *

Lelo udi na mwanda kampanda wa mu Bible owiipangulanga? Lelo ukimba kuyuka nkulupilo kampanda ya Batumoni ba Yehova ne bintu kampanda byobaloñanga? Shi i amo, kokeshisa kwipangula Kamoni wa Yehova. Ukasangela kwisambila nobe pa ino myanda.

^ mus. 61 Shi usaka kuyukila’ko bivule, tala shapita 11 wa dibuku Lelo I Bika Bine Bifundija Bible? dilupwilwe na Batumoni ba Yehova.

^ mus. 64 Kishinte kilonda’ko mu bino bishinte kikesambila pa kine kilekele’ko Leza masusu.