Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Le Ukokeja Kukulupila Kipwilo mu Mwanda Utala Divita?

Le Ukokeja Kukulupila Kipwilo mu Mwanda Utala Divita?

Alberto wāingile mwingilo wa bu sola kintu kya myaka dikumi. Uvuluka amba: “Muntu wādi witulombelela wētwesele na kunena’mba, ‘Leza udi nenu.’ Ino neipangula amba, ‘ñendanga kukepayañana, aye Bible unana’mba, “kokepayañana.”’”

Ray wādi mu kyombo kya bulwi mu Divita II dya Ntanda. Waipangula muntu wādi wibalombelela amba: “Ubaikila mu kyombo kulombelela basola mwanda wa kukanekenya. Lelo balwana nabo kebebalombelelangapo?” Uno wādi wibalombelela wamulondolola’mba, mingilo ya Mfumwetu i kikata kifyame.

Shi ano malondololo keakusangejepo, kudipo bunka.

LE I BIKA BIFUNDIJA BIBLE?

Yesu wānene amba kijila kikatampe mu bijila bya Leza, i kusanswa “mukwenu na abe mwine.” (Mako 12:31) Le Yesu wātūdile mikalo pa kusanswa mukwetu kukwatañana na kwashikete nansha na muzo wandi? Mhm. Wāsapwidile bandi bana ba bwanga amba: “Po ponka po bakemuyūkila bu-bāna-bami-babwanga ponka pa kwisanswa mo mwikadile bānwe bene.” (Yoano 13:34, 35) Buswe bwa kwisanswa abo bene na bene bwādi bu kiyukeno kya kwibayukila’po. Bādi’nka ne bakufwila bakwabo pa kyaba kya kwibepaija.

Bene Kidishitu babajinji bādi beendeja mungya binenwa bya Yesu. Dibuku dimo (The Encyclopedia of Religion) dinena amba: “Bashandya kipwilo babajinji, kubadila’mo Tertullian ne Origen, bānene’mba bene Kidishitu bādi bajidikwe kwipaya muntu, kino kijila kyādi kibakankaja kutanwa mu bibumbo bya bashidika bene Loma.”

LE BATUMONI BA YEHOVA BALOÑANGA NAMANI?

Batumoni ba Yehova byobadi mu matanda mavule, bamo mubukata mwabo bashikatanga mu matanda elwa. Ino, abo baloñanga bukomo bwa kulama kiyukeno kyabo kya buswe.

Le bendeji ba bipwilo bafundijanga buswe bwa bine bwa bwine Kidishitu?

Kimfwa mu 1994, kitatyi kyadi kīlwa Bahutu ne Batusi mu Rwanda, Batumoni ba Yehova kebekujije’mopo. Batumoni ba kabila kamo, bakingile Batumoni ba kabila kakwabo, enka ne kutūla divule būmi bwabo mu kyaka kikatampe. Kitatyi kyobakwete Batumoni babidi Bahutu badi bafile banababo Batusi, kisumpi kya Bahutu bantomboki betwa bu ba Interahamwe banena amba, “mufwaninwe kufwa mwanda mwakweshe Batusi banyeme.” Ino i kya bulanda, mwanda Bahutu Batumoni bāipailwe bonso babidi.Yoano 15:13.

Le ulanga: bilongwa bya Batumoni ba Yehova bikwatañene na binenwa bya Yesu bitala pa buswe bwa kwipāna?