LE LWITABIJO I BIKA?

Kukwatañana na Bible, lwitabijo “i kusumininwa kwa mu bintu bikulupilwe kadi, ne kuyūkidila kwa mu byobya bintu byampikwa kumweka.” (Bahebelu 11:1) Muntu udi na lwitabijo mudi Leza ukulupile amba Ukafikidija milao Yandi yonso.

LE MOSESA WĀLOMBWELE LWITABIJO NAMANI?

Būmi bwa Mosesa bwādi bwimanine pa milao ya Leza. (Ngalwilo 22:15-18) Wādi na mukenga wa kwikala na būmi buyampe mu bya bupeta bya Edipito, ino wapela uno mukenga, “watongelako kumona malwa na bantu ba Leza’mba, e nabyako bidi; lelo kīkale na kuloelelwa mu bubi bwa mwaka umo onka.” (Bahebelu 11:25) Le buno bwādi butyibi bwa kansontomokela bwaādi wa kwialakanya mwenda mafuku? Mhm, mwanda Bible unena amba Mosesa “wakankamene ne kukankamana bwa wamona aye wakubulwa kumweka.” (Bahebelu 11:27) Mosesa kēalakenyepo nansha dimo pa butongi bwaātongele mu lwitabijo.

Mosesa wādi usaka kukomeja lwitabijo lwa bakwabo. Kimfwa, tala mwanda wālongekele kitatyi kyāmwekele amba bene Isalela abaponena mu dikinga, pa bukata bwa bibumbo bya Felo ne Kalunga Katyila. Pa kukwatwa moyo wa kimpengele kyāfwenene, bene Isalela baābije Yehova ne Mosesa. Le Mosesa wādi wakulonga’po namani?

Padi Mosesa kādipo uyukile amba Yehova wādi wa kukalañanya Kalunga Katyila na kushitwila bene Isalela dishinda dya kupandila’mo. Ino, Mosesa wādi ukulupile amba Leza wādi wa kulonga’po kintu kampanda mwanda wa kukinga bantu Bandi. Kadi Mosesa wādi usakila banababo bene Isalela bekale na kino kikulupiji. Tutanga amba: “Mosesa webanena’mba: Kemukyoyai moyo, imanai talala mumone bupandiji bwa Yehova bwakemulongela dyalelo dino’di.” (Divilu 14:13) Le Mosesa wābwenye kukomeja lwitabijo lwa banababo bene Isalela? I amo, mwanda Bible wisambila padi Mosesa ne pa bene Isalela bonso amba: ‘Kadi i ponka pa kwitabija po baābukile pa Kalunga Katyila enka bwa panshi patupu pōmu.’ (Bahebelu 11:29) Ke’nkapo Mosesa wāmwenine mu lwitabijo lwandi, ino i ne bantu bonso bāboile’ko ñeni.

LE I ÑENI’KA YOTUBOILA’KO?

Tubwanya kwiula Mosesa na kwimika būmi bwetu pa milao ya Leza. Kimfwa, Leza i mulaye kuvuija bisakibwa byetu bya ku ngitu shi tutangidije kumeso butōtyi bwa kumutōta mu būmi bwetu. (Mateo 6:33) Bine, kutūla bintu bya ku ngitu pa kifuko kibajinji byo kuzambalele dyalelo, tubwanya kukomenwa kwikwepuka. Ino tubwanya kukulupila amba, shi tulonge bukomo bwa kupēleja būmi bwetu ne kuta mutyima ku butōtyi bwetu, Yehova uketupa byonso byotusakilwa. Witukulupija amba: “Ami nkikakuzobololapo, nansha patyetye pene, nansha kukulekelela mpika.”Bahebelu 13:5.

Kadi tuloñanga bukomo bwa kukwasha bakwetu batame mu lwitabijo. Kimfwa, bambutwile batunangu bayukile mukenga mukatampe obadi nao wa kutamija lwitabijo mu babo bana. Kitatyi kyobatama, bana basakilwanga kuyuka amba Leza udi’ko ne amba i mwitupe misoñanya ya kuyuka biyampe ne bibi. Kadi, basakilwa kukulupila’mba kulonda misoñanya yandi i dishinda dilumbuluke dya būmi. (Isaya 48:17, 18) Bambutwile bapanga babo bana kyabuntu kilēme kitatyi kyobebakwasha betabije amba Leza upalanga “mpalo boba bamukimba ne mikeketo.”Bahebelu 11:6.