Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Kiteba kya Mulami—Kya Kwifunda  |  Kweji 1 2016

 Mutwe Wa Mwanda Wa Pa Kibalu | Kamweno Kadi mu Kubulwa Budimbidimbi

Kamweno Kadi mu Kubulwa Budimbidimbi

Kamweno Kadi mu Kubulwa Budimbidimbi

“Tukulupile amba tudi na mutyima wa mundamunda wampikwa budimbidimbi, byotusaka kwiendeja kwampikwa budimbidimbi mu byonso.”—Bahebelu 13:18.

Mu Bible, kishima kibajinjibajinji kyalamwinwe bu “kubulwa budimbidimbi” kishintululanga kyaba kimo pa bute pa bute bu “kintu kiyampe.” Kadi kibwanya kwikala na buluji bwa kintu kilumbuluke kifwaninwe kulama mu mwikadilo.

Bene Kidishitu bakwatanga na kabango binenwa bya mutumibwa Polo bya ku bukomo bwa mushipiditu bya amba: “[Tusakanga] kwiendeja kwampikwa budimbidimbi mu byonso.” Le kino kilomba bika ne bika?

BILOMBA KULWA

Bantu bavule betalanga mu dikalashi lubanga lonso kumeso kwa kutambila ku bantu. Mwanda waka? Mwanda basakanga bantu bebamone biyampe. Inoko kudi kintu kya mvubu mpata kutabuka mondele wa nywene nansha ke mbwija ya katutu. Ino, bumuntu bwetu bubwanya kulumbulula nansha kōna mumwekelo wetu wa panja.

Kinenwa kya Leza kilombola patōkelela amba milangwe yetu ilēmenenwe na bubi. Ngalwilo 8:21 unena amba, “mwanda mifwatakanyo ya mutyima wa muntu i mibi’tu ne ku bwanuke bwandi kwine.” O mwanda pa kwikala wampikwa budimbidimbi, bitulomba kulwa na ngikadila yetu ya bubi ya kibutwila. Mutumibwa Polo ulombola patōkelela mwaālwidile na ngikadilo yandi ya bubi panena amba: “Ami na bubine ndoelelwe bijila bya Leza mwendele muntu udi munda mwami, ino namone mu ngitu yami kijila kikwabo kilwa divita na kijila kya mu ñeni yami ne kuntwala bu umpika ku kijila kya bubi kidi mu bya ku ngitu byami.”—Loma 7:22, 23.

Kimfwa, shi mutyima wetu ubetutonona kulonga bibi ne tubalēmenenwa bininge na milangwe ya budimbidimbi, ketufwaninwepo kwikala bapika ba bilokoloko bya mutyima wetu. Inoko tudi na bwanapabo mu uno mwanda. Shi tubapele milangwe mibi, tubwanya kushala nyeke bampikwa budimbidimbi nansha byotushikete na bantu ba budimbidimbi.

NEKENYA BULWI

Pa kwikala bampikwa budimbidimbi, tusakilwa misoñanya ya peulu ya mu mwikadilo. Inoko i kya bulanda, mwanda bantu bavule bapityijanga kitatyi kilampe mu kutonga ‘bya kuvwala’ abo bene kupita’ko kulangulukila pa misoñanya ya mu mwikadilo wabo. Mfulo mfulō, babingijanga budimbidimbi amba bubwanya kulumbulula ngikadilo yabo. Dibuku (Kubulwa budimbidimbi) Bubine Butala pa Budimbidimbi, dya mu Angele, dinena amba: “Divule dine tudimbañananga mu ludingo kampanda mwanda wa kumweka biyampe bu ketudipo na budimbidimbi.” Ino, le kudi musoñanya ukulupilwa ubwanya kwitukwasha tuyuke amba, i kutupu budimbidimbi nansha bumo bwitabijibwe? En-en musoñanya udi’ko.

Bantu midiyo ne midiyo pano pa ntanda i basokole amba mu Bible mo mutanwa uno musoñanya mufike’po. Mu Bible mudi musoñanya wa mu mwikadilo keudingakanibwapo. (Ñimbo 19:7) Witupanga bwendeji buyampe mu kisaka, mu kaji, mu mwikadilo, ne ku mushipiditu. Walāla myaka na myaka. Bijila ne misoñanya idi’mo italanga mizo yonso, misaka, bisaka, ne  bantu. Tubwanya kufundija mutyima wetu wikale wampikwa budimbidimbi ne moloke na kusantaula mu Bible, kulangulukila pa byanena ne kwingidija madingi adi’mo.

Pa kunekenya bulwi botulwa na budimbidimbi ketufwaninwepo kwimanina’nka pa buyuki bwa binebine bwa mu Bible. Pakwabo kadi, tuningilwanga na ino ntanda ya bubi yotwikele’mo twitabije misoñanya yayo mibole. O mwanda mwine tufwaninwe kulomba Leza etukwashe ne kwitukwatakanya. (Fidipai 4:6, 7, 13) Na kulonga uno muswelo, tukamona bukomo bwa kwimanija mu boloke ne kwikala bampikwa budimbidimbi mu bintu byonso.

MPALO IDI MU KUBULWA BUDIMBIDIMBI

Hitoshi, utelelwe mu kishinte kibajinji, wamwenine mu kuyukana bu mwingidi wampikwa budimbidimbi. Pano wingilanga na mukulu wandi wa kaji umutendela pa kubulwa budimbidimbi kwandi. Hitoshi unena amba “Nafwija’ko pa kutana kaji kanengeja ngikale na mutyima wa mundamunda utōka.”

Bantu bakwabo nabo balañanga uno muswelo. Tala bimfwa bimobimo bya bantu bamwenine mu kwingidija musoñanya wa mu Bible wa “kwiendeja kwampikwa budimbidimbi mu byonso.

  • Mutyima wa Mundamunda Utōka

    “Ponafikije myaka 13 nalekele masomo ke ñingila na ba ngivi. Ku mfulo mu lupeto lonso lonadi mona, lungi nadi nelumwena mu budimbidimbi. Kupwa nasongwa, ami ne mulumyami twashilula kwifunda Bible na Batumoni ba Yehova. Twefundile amba Yehova * Leza ushikilwe bilongwa bya budimbidimbi, o mwanda twakwete butyibi bwa kushinta mwiendelejo wetu. Mu 1990 twapēne būmi bwetu kudi Yehova ne kwikala Batumoni ba Yehova babatyijibwe.”—Nkindi 6:16-19.

    “Mafuku kunyuma, mu njibo yami mwadi muyule bintu bya bwivi, inoko pano kemukidipo kintu nansha kimo kya bwivi; kino i kinengeje ngikale na mutyima wa mundamunda utōka. Ponangulukilanga pa myaka ishele kunyuma yonadi ndimbañana, bine mfwijanga’ko Yehova pa mwanda wa lusa lwandi lukatampe. Kinsangajanga’po kashā poñenda ku kalāla difuku ne difuku ne kuyuka’mba pano nsangajanga mutyima wa Yehova.”—Cheryl, Irlande.

    “Kitatyi kyayukile mukulu wami wa kaji amba napelele majika-kanwa a mpotyi wetu mukulupilwe, waunena amba: ‘Leza obe wakulonga kodi muntu ukulupilwa! Na bubine i dyese kwingila nobe muno mu sosiete.’ Kwikala wampikwa budimbidimbi mu bintu byonso kwaunkweshe ngikale na mutyima wa mundamunda utōka kudi Yehova Leza. Ne kadi kino kyaunkweshe nkwashe kisaka kyami ne bantu bakwabo balonge namino.”—Sonny, Hong Kong.

  • Ndoe ya Mutyima

    “Ñingilanga bu mukwashi wa ku bilo ya banki itala ntanda yonso. Mu kano kaji, divule dine bamwene’mba kwikala wa budimbidimbi mwanda wa kupeta kutabukile’ko kubulwa budimbidimbi. ‘Le i kabubi’ka kadi mu budimbidimbi shi tuyukile amba bubwanya kwituletela byabupeta ne kwitukwasha mu myanda ya lupeto?’ Uno o mumweno wandabile ntanda yonso. Inoko kwikala wampikwa budimbidimbi kwaundetele ndoe ya mutyima. Pano ndi musumininwe nyeke kushala wampikwa budimbidimbi nansha shi natanwa mu ngikadilo’ka. Bakulu bami ba kaji bajingulwile amba nkikibepangapo nansha kwibabepela.”—Tom, États-Unis.

  • Kwilēmeka

    “Mwimaniji wami wa kaji wadi unsoñanya mbepe pa bintu byadi bijimina ku kaji, ino napela. Mukulu wa kaji wamfwijije’ko pa kwikala wampikwa budimbidimbi kitatyi kyakwetwe bangivi. Kwikala wampikwa budimbidimbi mu ino ntanda ya budimbidimbi kulomba kwielela’ko. Inoko kuketulengeja tukulupilwe ne kulēmekwa na bakwetu.”—Kaori, Jampani.

Mutyima wa mundamunda utōka, ndoe ya mutyima, ne kwilēmeka—ino yo mpalo na bubine ilupukanga ku kwikala wampikwa budimbidimbi. Lelo nobe witabije kino?

^ mus. 18 Yehova i dijina dya Leza monka modilombwedilwe mu Bible.