Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 Mutwe Wa Mwanda Wa Pa Kibalu | Kamweno Kadi mu Kubulwa Budimbidimbi

Bilupuka ku Budimbidimbi

Bilupuka ku Budimbidimbi

“Kwikalanga nyeke myanda mikomo ilomba kupwija’nka na kabudimbidimbi.”—Samantha, Afrika wa Kunshi.

Lelo nobe witabije uno mulangwe? Pamo bwa Samantha, batwe bonso tutanwanga na myanda mikomo mu bitatyi bishileshile. Muswelo otumonanga myanda itulengeja twikale ba budimbidimbi ubwanya kulomboja mvubu yotumwene nayo bakwetu. Kimfwa, shi tumona budimbidimbi bu kintu kya mvubu pa kupwija myanda nabya tubwanya kwibumona bu buyampe. Inoko, shi bubinebine bubayukana, divule dine budimbidimbi bubutulanga bipa bilula. Tala ino myanda ilonda’ko.

BUDIMBIDIMBI BONANGA KIKULUPIJI

Kipwano kishilukanga pa kikulupiji. Shi bantu babidi bekulupile, bemonanga bu badi na mutyima-ntenke. Ino kikulupiji kekiyangapo mu kitulumukila. Bantu baningijanga kikulupiji na kupityija kitatyi pamo, ne kwisamba pampikwa budimbidimbi ne kulonga bintu pampikwa kwisakila. Ino, kikulupiji kibwanya kujimina kupityila ku kakilongwa’tu kamo ka budimbidimbi. Kadi shi kikulupiji kibajimina, bikalanga bikomo pa kwikyaluja.

Le kashā kwatyumwinwe mutyima na muntu owadi umona bu mulunda wa pa mutyima? Shi i amo, le weivwene namani? Padi byakusense nansha kukufītyija mutyima. I bya bine padi nobe weivwene uno muswelo. Budimbidimbi bulengejanga kwikale kutatana kutyetye kwine kubwanya kōna kyalwilo kya kipwano kilumbuluke.

BUDIMBIDIMBI BUBUTULANGA BUDIMBIDIMBI

Robert Innes polofesele wa myanda ya lupeto wa ku Inivelesite ya mu Kaliforni, wanene mu bwifundi bwandi amba “budimbidimbi bwisambulwilwanga.” Nanshi budimbidimbi budi pamo bwa misongo isambuka—poendelela kwitana na muntu wa budimbidimbi, ne kyaka kya “kusambukilwa” na budimbidimbi nakyo kikabaila’ko.

Le i muswelo’ka obwanya kwepuka kupya mu dino dikinga dya budimbidimbi? Bible ubwanya kukukwasha. Shi ke pano tubakulombe ubandaule’ko misoñanya imoimo ya mu Bible.