Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Kiteba kya Mulami—Kya Kwifunda  |  Kweji 12 2014

Wadi ‘Uyukile Dishinda’

Wadi ‘Uyukile Dishinda’

TUTU Guy Hollis Pierce wa mu Kitango Kyendeji kya Batumoni ba Yehova, wafudije lwendo lwandi lwa pano panshi mu Dya Bubidi, mafuku 18 Kweji 3, 2014. Lukulupilo lwandi lwa kubadilwa mu banababo na Kidishitu basangulwe lwafikidile paadi na myaka 79.—Bah. 2:10-12; 1 Pe. 3:18.

Tutu Guy Pierce wabutwidilwe mu Auburn, California mu États-Unis, mu mafuku 6 Kweji 11, 1934, ne kubatyijibwa mu 1955. Wasongele mukena wandi Penny, mu 1977 kadi wadi na kisaka. Bwino bwandi bwa kwikala na kisaka bwamukweshe ekale bu shabana muyampe. Mu 1982 aye pamo ne Penny badi bengila bininge bu bapania, kadi mu 1986 bashilula myaka 11 ya mwingilo wa bu mutadi wa kipindi mu États-Unis.

Mu 1997, ba Tutu Guy ne Penny Pierce bashilwile kwingila bu ba mu kisaka kya Betele ya mu États-Unis. Tutu Pierce waingile mu Mwingilo Utala Myanda ya Busapudi, kufika mu 1998 watongwa kwikala mukwashi wa mu Komite Utala Bengidi wa Kitango Kyendeji. Kutongwa kwa Tutu Pierce kwa kwikala’ye bu wa mu Kitango Kyendeji kwaelelwe musapu mu mafuku 2 Kweji 10, 1999, ku lenyo ya pa mwaka ya Watch Tower Bible and Tract Society of Pennsylvania. Mu ino myaka ya panopano, wadi wingila mu Komite Utala Bengidi, Komite wa Balembi, Komite Ulupula Mabuku, ne mu Komite wa Bakwatakani.

Bantu ba bitamina ne bibidiji bishileshile badi bafwena Tutu Pierce mwanda wa mimungomungo yandi ya kyanga ne ngikadilo yandi ya kwela tubisela tuyampe. Inoko, nakampata ngikadilo yandi yadi ilengeja bantu bamufwene yadi i buswe, kwityepeja, kulēmeka kwandi kwa mbila ne misoñanya myoloke ne lwitabijo lwandi lwa binebine mudi Yehova. Ku mutamba wa Tutu Guy Pierce byadi bikokejika dyuba kuleka kutamba, ino milao ya Yehova ayo enka kufikidila, kadi wadi usaka kusapula buno bubine ntanda yonso.

Tutu Pierce wadi nkanka mu mwingilo wa Yehova, wadi ulanguka lubanga na futwi kadi divule dine wadi wingila’nka ne bufuku bininge. Wadi wenda ukankamika batutu ne bakaka bene Kidishitu ntanda yonso, kadi wadi upityija kitatyi na muntu ne muntu wa mu kisaka kya Betele ne boba badi bakimba kupwana nandi, bakimba madingi, ne bukwashi bwandi. Nansha ke papite myaka mivule, banababo mu lwitabijo bavulukanga kizaji kyandi, bulunda ne kwibakankamika kupityila mu Bisonekwa.

Tutu wetu kadi mulunda netu muswe wadi na mukaji ne bana basamba, bankana ne tunkanu. Wadi kadi ne na bana bavule ba ku mushipiditu. Dishikulu dya kuvuluka Tutu Pierce dyanenenwe mu Betele ya Brooklyn mu Dya Mposo, mu mafuku 22 Kweji 3, 2014, na Tutu Mark Sanderson, wa mu Kitango Kyendeji. Mu myanda yawanenene wesambile ne pa lukulupilo lwa mūlu lwa Tutu ­Pierce ne kutanga binenwa bya Yesu bya amba: “Mu njibo ya Tata mudi bīkalo bivule. . . . Shi naenda kukemulongolwela kifuko, nsa kwiya monka kadi nkemutambulanga kwami, amba kokwa kondi nenu mwikale konka. Ne kokwa koñenda banwe muyukile dishinda.”—Yoa. 14:2-4.

Bine, tula kudila bininge Tutu Pierce. Inoko, tudi na nsangaji ya kuyuka amba, wadi ‘uyukile dishinda’ dine ditwala ku ‘kīkalo’ kyandi kya lonso.