Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Bepēne Abo Bene ne Mutyima Tō—mu Taiwane

Bepēne Abo Bene ne Mutyima Tō—mu Taiwane

PANO ke padi kintu kya myaka itano, ba Choong Keon ne Julie, ba mulume ne mukaji badi pano na myaka 30 ne musubu, baingile bu bapania ba lonso mu Sydney, mu Ostrali. Choong Keon unena’mba, “twadi na kaji ka kitatyi kityetye kadi na būmi buyampe. Twadi biyampe kotwadi tushikete kadi na būmi bwa muswelo muyampe. Twadi tusangedile kwikala pabwipi na kisaka kyetu ne balunda netu.” Inoko, ba Choong Keon ne Julie badi balangalanga. Mwanda waka? Mwanda badi bayukile’mba, badi mu ngikadilo ibalengeja balonge bivule mu mwingilo wa Yehova, ino beshisa kushinta kobadi basakilwa.

Ebiya, ku kitango kya mu 2009, baivwana dishikulu dyebatengele bininge. Muneni wesambīle pa boba babwanya kutandabula mwingilo wabo. Wanene amba: “Langai’po bidi: Shofele ubwanya kutonta motoka wandi ku lunkuso nansha ku lundyo enka shi motoka wenda. Mo monka ne Yesu nandi, ubwanya kwituludika tutandabule mwingilo wetu enka shi twendelela kumeso—shi tulonga bukomo bwa binebine bwa kufikila pa bitungo byetu.” * Bano ba mulume ne mukaji bamona’nka na muneni wibanena abo. Ku kino kitango kimo kyonka, kwaipangwilwe ba mulume ne mukaji bamishonele bengila mu Taiwane. Besambīle pa nsangaji yobatananga mu mwingilo ne kunena’mba kukisakilwa bukwashi buvule. Kadi ba Choong Keon ne Julie bamona’nka na abo bobanena.

Julie unena’mba, “pa kupwa kwa kino kitango, twalombele Yehova etupe bukankamane bwa kuvilukila ku Taiwane.” Ubweja’ko amba: “Inoko, twadi na moyo. Mwanda byadi pamo bwa batwe bakimba kukila kyumbu kiyule mema musunsa mubajinji.” Kisonekwa kyebakweshe ‘bakile’ mu muswelo wa kyelekejo i kisonekwa kya Musapudi 11:4 kinena amba: “Yewa utentekela luvula kakakunepo, kadi yewa utala makumbi kakangulapo.” Choong Keon unena amba: “Twaimikile milangwe yetu pa ‘kubandila ne kutala’ ne kushilula ‘kukuna ne kwangula.”  Balombele—ne kulombela monka—batanga nsekununi ya mu būmi ya bamishonele, kwitumina misapu mityetye ku Entelenete na boba bavilukile kala ku Taiwane, bapoteja yabo myotoka ne bintu, ne kufika mu Taiwane myeji isatu pa kupita’po.

KUSOKOLA NSANGAJI MU BUSAPUDI

Batutu ne bakaka 100 ne musubu batambile ku matanda a bweni, bengilanga pano mu Taiwane mu bifuko musakilwa basapudi ba Bulopwe bavule. Batambile mu Ostrali, Beletanye, Kanada, Franse, Jampani, Korea, Eshipanye ne mu États-Unis, kadi badi na myaka 21 kutūla ku 73. Mu bano bantu mudi bakaka bankungakaji 50 ne kupita. Lelo i bika byakweshe bano batutu ne bakaka bapyasakane bavuije mwingilo wabo mu ntanda ya bweni? Tutalei.

Laura

Laura, kaka nkungakaji wa mu Kanada, wingilanga bu pania kushika kwa Taiwane. Ino mu kintu kya myaka dikumi, kadipo usenswe mwingilo wa busapudi. Laura ushintulula’mba, “nadi ñenda mu busapudi enka nabya’wa’tu, nkyadipo nebusenswe.” Ebiya balunda nandi ba mu Kanada bamunena bende nandi ku Meksike kukasapula’ko kweji umo.” Unena’mba, “uno wadi musunsa wami mubajinji kupityija kitatyi kilampe mu mwingilo, kadi natulumuka pa kumona amba i mwingilo muyampe!”

Uno mwanda mumweke usangaja watonwene Laura avilukile mu kipwilo kya mu Kanada kya ludimi lweni. Weandikija ku masomo a kufunda ludimi lwa Kishinwa, kaingila pamo na kisumpi kya Kishinwa, ne kwitungila kitungo kya kuvilukila ku Taiwane, kine kyaafikile’po mu Kweji 9, 2008. Laura unena amba: “Byaunombele mwaka mutuntulu pa kwiivwana biyampe mu bino bifuko bipya, ino pano kilañangapo kujokela ku Kanada.” Lelo umwene mwingilo wa busapudi namani? Unena’mba, “nsangelanga’o bininge. Kekudipo kintu kisangaja bininge kitabukile kumona muswelo ushinta bifundwa bya Bible būmi bwabo kitatyi kyobayuka Yehova. Kwingila mu Taiwane i kumpe mukenga wa kwimwena ino nsangaji mikatampe mu bitatyi bivule.”

 KWIKONDA PA KUYUKA LUDIMI

Brian ne Michelle

Ba Brian ne Michelle, ba mulume ne mukaji ba myaka 30 ne musubu ba mu États-Unis bavilukile ku Taiwane pano kepadi kintu kya myaka mwanda. Dibajinji bamwene amba kebasapulangapo biyampe mu mwingilo. Ino mishonele umo wa bwino webasapwila amba: “Nansha shi mubwanya’tu kupa muntu trakte, mufwaninwe kuvuluka’mba bikekala pamo bwa uno muntu watambula musunsa mubajinji musapu utala padi Yehova. O mwanda kutambila komutambila mu mwingilo wa busapudi kudi na mvubu!” Bino binenwa bikankamika byakweshe ba Brian ne Michelle bininge baleke kuzoza. Tutu mukwabo webasapwidile amba: “Pa kuleka kutyumukwa mutyima, mwitompei kwendelela komwaendelela mu kwifunda Kishinwa, ke difuku ne difukupo, ino i ku kitango ne kitango.” Kadi na bubine, baendelele ne kwikala bapania bapa bipa biyampe dyalelo.

Lelo i bika bikokeja kukutonona wifunde ludimi lweni? Tompa bidi kukapempula ntanda yosaka kukengidila’ko. Enda ku kupwila, pwana na batutu ne bakaka ba mu kibundi, ne kwenda nabo mu mwingilo wa busapudi. Brian unena amba: “Shi ubapu kumona bantu bavule betabija biyampe musapu wa Bulopwe ne kwimwena buswe bwa binebine bwa batutu ne bakaka, ukatononwa ulwe na makambakano a kwingidila ku ntanda ya bweni.”

LELO TUNENA BIKA PA KAJI KA NTANDA?

Kristin ne Michelle

Bapania bavule bavilukile “kokwa kusakilwa bukwashi” mu Taiwane, babwenye kwikwatakanya abo bene na kufundija Angele. Kristin ne Michelle badi bapoteja bipa bya mu mema. Kristin unena’mba, “nadi kashā nkyaingile uno mwingilo, ino uno mwingilo wankweshe mbwanye kushikata mu ino ntanda.” Kyaba kimo, Kristin wasokwele bampotyi ba kyaba ne kyaba. Kano kaji ka kitatyi kityetye kamukweshe ekwatakanye aye ne wandi mukaji mu myanda itala lupeto, kadi kebashidile kyaba kifwaninwe kya kwingila mwingilo wabo mubajinji—mwingilo wa bupania, kiluwe wa bantu.

“SANGELA MWINGILO”

William ne Jennifer, ba mulume ne mukaji ba mu États-Unis, bafikile mu Taiwane pano ke padi kintu kya myaka isamba-ibidi. William unena’mba, “kwifunda ludimi, kwingila bu bapania, kukwatakanya kipwilo, ne kukimba lupeto lwa kwikwatakanya nalo, byadi bikoleja kitatyi kimo.” Lelo i bika byebakweshe banekenye ne kwikala nyeke na nsangaji? Betungile bitungo bifikile. Kimfwa byokebadipo bekulupile bininge kitatyi kyobadi befunda Kishinwa, kebatyumukilwepo mutyima bininge kitatyi kyokebadipo bendelela bininge.

William ne Jennifer

William uvuluka’mba, mutadi wendakana wamusapwidile difuku dimo’mba, “sangela mwingilo, ke’nkapo koukakutūla.” Mu muneneno mukwabo, pa kupwa kwitungila kitungo kya ku mushipiditu, tufwaninwe kusangela matabula a kutabula atwala ku kufikila pa kitungo. William unena’mba, kwingidija ano madingi kwetukweshe ami ne wami mukaji twikale na mutyima unekena, twivwane madingi a batutu ba mu kibundi badi na biselwa, ne kujadika muswelo wabo wa kulonga bintu amba babwanye kulupula bipa biyampe mu mwingilo wabo mu ntanda ya bweni. Ubweja’ko amba, “kadi kwetukweshe tuvuluke kwitūdila’ko kitatyi kimo kya kubandila buya bwa kipangila bwa kisanga kyotwakengidile’ko.”

Pamo bwa ba William ne Jennifer, Megan, kaka pania nkungakaji wa mu États-Unis ‘usangelanga mwingilo wandi’ palonga bukomo bwa kufikila pa kitungo kyandi kya kwisamba Kishinwa biyampe. Dya Mposo ne Dya Yenga dyonso usapulanga na kisumpi kya basapudi basapulanga mu mwaba upa bipa—nkula ya Kaohsiung, nkula mikatampe ya Taiwane. Megan wabwenye kusapula myanda miyampe ku kyombo ne kyombo ne kusapwila ba biluwe ba lui ba ku Bangaladeshi, India, Indonezi, Filipine, Tailande, ne Vanuatu. Unena’mba, “babiluwe byobekalanga mu nkula mu kitatyi kityetye’tu, tushilulanga kwifunda nabo Bible enka penepa. Pa kwimona na bonso, mvudile kwifunda na bantu baná nansha batano mu kitatyi kimo.” Ino le uloñanga namani pa kwifunda Kishinwa? Unena’mba, “nanga’mba mbwanya kwifunda lubilolubilo,  ino mvulukanga bintu byaunombwele tutu umo amba, ‘Abe longa bukomo, Yehova nandi ukakukwasha uvuije mwingilo obe.’”

Megan

BŪMI BWA MUTYIMA-TENKE, BUPĒLA NE BUSANGAJA

Cathy, wa mu Beletanye kumeso kwa kuvilukila ku ntanda ya bweni, wakimbile kuyuka mwingilo mwine wa ku ntanda ya bweni ukekala wa mutyima-ntenke kudi kaka nkungakaji. Watūdila Yehova uno mwanda mu milombelo ne kulembela mabilo mavule a misambo mikanda, wipangula byaka bibwanya kutanwa’mo bakaka bankungakaji. Kupwa, walangulukila na katentekeji pa malondololo a mikanda yandi ne kufula ku kunena’mba, Taiwane i ntanda miyampe yabwanya kutonga kwenda’ko.

Aye pa kubwanya myaka 31 mu 2004, Cathy wavilukila mu Taiwane, mwine mwashikete mu būmi bupēla. Unena amba: “Naipangwile batutu ne bakaka bifuko biyampe bya kupota’ko bipa ne bidibwa bya mani bya bei tyipi. Madingi abo mayampe aunkweshe ndame lwami lupeto.” Lelo i bika byamukweshe ekale nyeke na būmi bupēla? Cathy unena amba: “Nadi nombela nyeke kudi Yehova ankwashe nsangele bidibwa bipēla byondya ne bivwalwa bya butukanye byomvwala. Nanga’mba Yehova ulondololanga milombelo yami na nkufundija ndyuke bisakibwa byami ne na kunkwasha nsangele byondi nabyo.” Ubweja’ko amba: “Nsangedile būmi bwami bupēla mwanda bunkwashanga nte mutyima bininge ku bintu bya ku mushipiditu.”

Cathy

Inoko, būmi bwa Cathy kebupēlapo’tu bitupu, ino kadi i bwa nsangaji. Ushintulula kyobwikadile bwa nsangaji amba: “Mbwanya kusapula mu kifuko mwitabija bantu bavule myanda miyampe. Ino bine i nsangaji’po kashā!” Kitatyi kyaafikile mu Taiwane, mu kibundi mwine mwaashilwile kwingila bu pania mwadi bipwilo bibidi bya Kishinwa, ino pano ke mudi bipwilo bisamba-bibidi dyalelo. Cathy unena amba: “Kwimwena ami mwine kuno kutanta kutulumukwa ne kukwasha mu mwangulo, kulengejanga būmi bwami bwa difuku ne difuku bwikale bwa nsangaji mikatampe!”

“BADI BASAKILWA NE AMI!”

Lelo bintu byapityīle ba Choong Keon ne Julie botwatelanga ku ngalwilo namani? Ku ngalwilo Choong Keon wadi ulanga’mba, kubulwa kuyuka Kishinwa biyampe kukalengeja aleke kwingidijibwa bininge mu kipwilo. Ino batutu ba mu kibundi kebadipo balanga uno muswelo. Choong Keon unena amba: “Kipwilo kyetu pa kwabanibwa pabidi, baumpele biselwa bivule bya ntentekelo ami papo mwingidi wa mingilo.” Unena na nsangaji’mba, “mu kino kitatyi, nadi bine mwene’mba ñingilanga kokwa kusakilwa basapudi bavule. Kwadi kusakilwa bukwashi bininge, o mwanda badi basakilwa ne ami!” Wingilanga bu mukulumpe dyalelo. Julie ubweja’ko amba: “Twivwene mityima kufukata, kuloelelwa ne nsangaji yotwadi ketwaivwene kashā. Twaile kuno kukwasha, ino tubamone bu tubakwashibwa na ino myanda isangaja yotwemwena. Tufwijanga’ko Yehova pa kwitukwasha twingidile kuno!”

Mu matanda mavule, mukisakilwa bengidi bavule ba kwangula mwangulo wa ku mushipiditu. Lelo usa kupwa masomo koku wiipangula byosa kulonga mu būmi bobe? Lelo wi nkunga ne usaka kwingidijibwa bininge na bulongolodi bwa Yehova? Lelo usaka kupyanika kisaka kyobe kipyanwa kiyampe kya ku mushipiditu? Lelo watambwile pasho, kadi na myanda ya kamweno yowimwenine mu būmi ya kusapwila bantu bakwabo? Ubwanya kukulupila’mba madyese a binebine akutengēle shi ukwate na bantu bavule butyibi bwa kutandabula mwingilo obe na kwingila kokwa kusakibwa basapudi ba Bulopwe.

^ mus. 3 Tala dibuku ‘ Rends pleinement témoignage au sujet du Royaume de Dieu, ’ shapita 16, musango 5-6.