Enda ku bidi'mo

Enda ku kifunka

Batumoni ba Yehova

Tonga Ludimi Kiluba

‘Joka Ukakomeje Banabenu’

‘Joka Ukakomeje Banabenu’

PETELO pa kupwa kutuna’mba kayukilepo Yesu, wādidile bininge. Nansha byādi binenwe mutumibwa kulwa pa kwialuja ku mushipiditu, Yesu wāsakile kumwingidija akwashe bakwabo. O mwanda Yesu wāmulombwele amba: “Shi ubajoka, komeja banabenu.” (Luka 22:32, 54-62) Petelo wāikele nyeke bu kipanda kya mu bipanda bya mu kipwilo kya bwine Kidishitu kya mu myaka katwa kabajinji. (Ngt. 2:9) Mu muswelo umo onka, muntu waingile bu mukulumpe ubwanya monka kusela biselwa ne kutana nsangaji idi mu kukomeja banababo mu lwitabijo ku mushipiditu.

Bantu bamo baingile kyaba kimo bu batadi bayetwe madyese, ne kadi babwanya kufula ku kulanga amba abakomenwa. Julio, * waingile bu mukulumpe mu Amerika wa Kunshi mu bula bwa myaka 20 ne kupita wanene amba: “Kuteakanya mashikulu, kupempula banabetu, ne kukumba bantu ba mu kipwilo kwadi kubadilwa mu mingilo ya mu būmi bwami! Ino na mu kukopa kwa diso, byonso tukituki. Mu kīpi, kino kyadi kitatyi kya makambakano.” Julio wingilanga monka bu mukulumpe dyalelo.

“MONAI’BYO PAMO BWA NSANGAJI YA BINEBINE”

Mwanā bwanga Yakoba wāsonekele amba: “Monai’byo pamo bwa nsangaji ya binebine, banwe banabetu, pomutanwa na matompo palapala.” (Yak. 1:2) Yakoba wādi wisambila pa matompo atambanga ku kupangwapangwa ne ku kubulwa kubwaninina kwetu. Wātelele bya kusakasaka bya ngitu, ntondo ne bikwabokwabo. (Yak. 1:14; 2:1; 4:1, 2, 11) Kitatyi kitudingilanga Yehova, madingi abwanya padi kwitusansa. (Bah. 12:11) Inoko, ano matompo keafwaninwepo kwitujimijija nsangaji.

Nansha shi betuyete kiselwa kyotwadi nakyo mu kipwilo, tukidi na mukenga wa kubandaula mwikadile  lwitabijo lwetu ne kulombola buswe botuswele Yehova. Tukokeja kadi ne kulangulukila pa kine kyotwadi twingidila. Le twādi twingila mwanda wa kamweno ketu’ni, nansha twātonwenwe tubwanye bisakibwa bya kupebwa dino dyese mwanda wa buswe botwādi tuswele Leza ne kikulupiji kya amba, kipwilo i kyandi ne kifwaninwe kulelwa na lusa? (Bil. 20:28-30) Bakulumpe ba kala bendelela kwingila mwingilo ukola na nsangaji balombolanga ku bonso, kubadila’mo ne Satana amba, buswe bobaswele Yehova i bwa binebine.

Kitatyi kyobādingile Mulopwe Davida mwanda wa bubi bukatampe, wāitabije matope ne kulekelwa walekelwa. Davida wāimbile amba: “Keye wa katōkwe kandi, shandi! yewa wa lekelwa ku kujilula kwandi, ne bupya-mambo bwandi bubajimankanibwa. Keye wa katōkwe kandi, shandi! yewa wampikwa kujingululwa bubi kudi Yehova, wa mushipiditu wandi wa kubulwa ne bumbalwe.” (Ñim. 32:1, 2) Madingi ālumbulwile Davida ne kumwikadija bine bu mukumbi muyampe wa bantu ba Leza.

Divule dine, batutu bajokelanga kwingila bu bakulumpe bekalanga bakumbi bayampe kupita mobadi bekadile dibajinji. Muntu umo wajokēle bu mukulumpe unena amba: “Pano naivwanija biyampe muswelo wa kuta mutyima boba balonga bilubo.” Mukulumpe mukwabo wanene amba: “Pano nakwata na mvubu bininge dyese dyami dya kwingidila banabetu.”

LE UBWANYA KUJOKA?

Mulembi wa mitōto wālembele amba: “[Yehovah] katopekatopekangapo kyaba kyonso.” (Ñim. 103:9, Dibuku Dijila) Nanshi, ketufwaninwepo kulanga’mba Leza kakakulupilapo monka muntu ulongele kilubo kikatampe. Ricardo, wajimije madyese andi a bu mukulumpe pa kupwa kwibwingila myaka mivule unena amba: “Natyumwinwe mutyima bininge pa kukankalwa kwami. Milangwe yami mibi yadi ikankaja mu kitatyi kilampe ndeke kujokela bu mutadi mwanda wa kwingidila banabetu. Nabudilwe kikulupiji kya amba mbwanya monka kwilombola bu ukulupilwa. Ino byonadi nsangedile kukwasha bakwetu, nabwenye kwendeja bifundwa bya Bible, kukankamika banabetu ku Njibo ya Bulopwe ne kusapula nabo. Kino kyaunkweshe ngaluje kikulupiji kyami, kadi pano ñingilanga monka bu mukulumpe.”

Yehova wākweshe bantu bajokeje nsangaji ne mutyima wabo wa kwingila monka

 Kwikala na kiji kubwanya kulengeja tutu akomenwe kwingila bu mukulumpe. Bine, i biyampe kwikala pamo bwa Davida mwingidi wa Yehova, wādi unenwe kunyema Solo Mulopwe wa mukao! Davida wāpelele kwalwija Solo kinongo, nansha ke paādi umona mikenga ya kulonga namino. (1 Sa. 24:4-7; 26:8-12) Kitatyi kyāfwile Solo ku divita, Davida wāmudidile, ne kumutela aye ne wandi mwana Yonafane bu bantu “bapopoke ne kusanshibwa.” (2 Sa. 1:21-23) Davida kāikelepo na kiji.

Shi ubamone’mba kebakwivwenepo biyampe ne bakulongelanga bintu na bukondame, kokaleka kiji kitādile milangwe yobe. Kimfwa, kitatyi kyobayete William biselwa byandi bya bu mukulumpe pa kupwa kwingila mu kintu kya myaka 30 bu mukulumpe mu Beletanye, wālamīne bakulumpe bamo kiji. Lelo i bika byakweshe William ealuje? Wanene amba: “Kutanga mukanda wa Yoba kwaunkankamikile. Shi Yehova wākweshe Yoba alonge ndoe na balunda nandi basatu, mwene ukankwasha nonge ndoe na bakulumpe bene Kidishitu!”—Yoba 42:7-9.

LEZA WESELANGA BOBA BENGILANGA MONKA BU BAKUMBI

Shi washetukile mu kukumba luombe lwa Leza, i biyampe kulangulukila pa kine kyowashetukīle. Lelo wadi mulemenenwe na yobe myanda? Le kudi bintu bikwabo byaikele na mvubu mpata mu būmi bobe? Le watyumwinwe mutyima na kubulwa kubwaninina kwa bakwenu? Nansha shi byadi namani, vuluka’mba wadi ubwanya kukwasha bakwenu mu miswelo mivule kitatyi kyowadi wingila bu mukulumpe. Mashikulu obe adi ebakomeja, kimfwa kyobe kyadi kibakankamika ne bupempudi bobe bwa bukumbi nabo bwadi bwibakwasha bōminine matompo abo. Mwingilo obe wa bu mukulumpe wa kikōkeji wadi usangaja mutyima wa Yehova enka mowadi usangajija mutyima obe.—Nki. 27:11.

Lombola buswe boswele Yehova na kwingila mwingilo ukola na nsangaji

Yehova wākweshe bantu bajokeje nsangaji ne mutyima wabo wa kutangidila kipwilo. Shi washetukile mu mwingilo wa bu mukulumpe nansha kuyatwa madyese, ubwanya monka ‘kukimba kwikala mutadi.’ (1 Tm. 3:1) Polo ‘kālekelepo kulombelela’ pangala pa bene Kidishitu ba mu Kolose mwanda wa bayuke biyampe kiswa-mutyima kya Leza, “amba [banangile] mwa kufwaninwa Yehova mwa kumutōkejeja ku mutyima ne pa mfulo.” (Kol. 1:9, 10) Shi ubapebwa monka madyese a kwingila bu mukulumpe, lomba Yehova akupe bukomo, kitūkijetyima ne nsangaji. Mu ano mafuku a mfulo, bantu ba Leza basakilwa kukwatakanibwa ku mushipiditu na bakumbi ba buswe. Lelo ubwanya ne witabije kukomeja banabenu?

^ mus. 3 Majina amo i mashintwe.