Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Bipangujo bya Batangi

Bipangujo bya Batangi

Lelo kusōka umbidi wa muntu mufwe i kuyampe ku bene Kidishitu?

Bisonekwa kebipelejepo kilongwa kya kusōka umbidi wa muntu mufwe.

Kudi nsekununi ya mu Bible ilombola’mba, imbidi nansha mikupa ya bantu bafwe yāsōkelwe. (Yos. 7:25; 2 Bi. 34:4, 5) Kino kyādi padi kilombola’mba, bano bantu kebādipo bamweka bu bafwaninwe kujīkwa. Inoko, kusōkwa kwādi kusōkwa imbidi mifwe kekwādipo kulombola nyeke amba keyādipo ifwaninwe kujīkwa.

Tukokeja kumona kino kupityila ku nsekununi ya lufu lwa Mulopwe Solo ne bandi bana basatu bana-balume. Abo bonso baná bāfwile mu divita dya na bene Fidishitia. Umo bidi mu bano bana i Yonafane mulunda muyampe wa Davida, kadi mukwatakani wandi wa binebine. Kitatyi kyāyukile bankanka bene Isalela bādi bekele mu Yabeshe-ngileade bintu byālongekele, bāsokwele imbidi ya bantu baná, beisōka ne kujīka mikupa yabo. Mwenda mafuku, Davida wātendela bano bene Isalela pa bilongwa byabo.—1 Sa. 31:2, 8-13; 2 Sa. 2:4-6.

Lukulupilo lwa mu Bisonekwa lwisambila pa bafwe i lwa lusangukilo—Lusangukilo lukasangwila Leza muntu ku būmi. Nansha shi umbidi wa muntu mufwe ubasōkwa nansha kusōkwa mpika, Yehova kakabulwepo kwalwija uno muntu ku būmi na umbidi mupya. Bahebelu basatu bobāsakile kwipaya mu nkelwa ya mudilo monka mwāsoñaninye’kyo Mulopwe Nebukaneza, kebādipo ne kya kutyinina kine’mba shi abatēma Leza kakokejapo kwibasangula. (Dan. 3:16-18) Byādi uno muswelo ne ku bengidi ba Yehova ba kikōkeji bāfwile ne kusōkwa mu makomponi a masusu a Nazi. Bengidi ba Leza bavule ba dikōkeji bāfwile ku mudilo nansha mu miswelo mikwabo pakubulwa ne kumweka kwine. Inoko, lusangukilo lwabo ludi’ko.—Kus. 20:13.

Yehova kanenwepo kukongakanya umbidi wa muntu wāfwile pa kumusangula. Kino i kimwekele ku kusangula kusangwilanga Leza bene Kidishitu bashingilwe māni momwa mūlu. Pamo bwa Yesu, mwine ‘wāsangwilwe mu mushipiditu,’ bene Kidishitu bashingwe māni basangulwanga’nka mobekadile, inoko na umbidi wa ku mushipiditu. Kebendangapo mūlu na kipindi nansha kimo kya ngitu ya bu muntu yobādi nayo kala.—1 Pe. 3:18; 1 Ko. 15:42-53; 1 Yo. 3:2.

Lukulupilo lwetu kelwimaninepo pa bintu biloñwanga na umbidi mufwe, ino i pa kwitabija’mba Leza udi na bukomo ne mutyima wa kufikidija milao yandi. (Bil. 24:15) Shako, ketubwanyapo padi kwivwanija ne pa mfulo muswelo wālongele Leza bingelengele bya kusangula bantu pa kala nansha muswelo wakebasangula mu mafuku a kumeso. Inoko, tukulupile mudi Yehova. I mwitupe “kikulupiji” na kusangula Yesu.—Bil. 17:31; Luka 24:2, 3.

I biyampe bene Kidishitu bate mutyima ku mbila itūdilwe’ko bantu, mwiivwanina ba mu kyabo kibundi, ne ku misoñanya ya Leta itala pa imbidi ya bantu bafwe. (2 Ko. 6:3, 4) Nanshi, kusōka umbidi wa muntu mufwe nansha kuleka kwiusōka i butyibi bwa muntu mwine nansha bwa kisaka.