Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Mīsambo i kilalo kimulungila pamo na benu bana

 KU BAMBUTWILE

5: Kwisamba

5: Kwisamba

MOKUSHINTULWILA

Mīsambo milumbuluke i yoya yomwishinta milangwe na benu bana ne kwilombola mwiivwanino wenu.

MWANDA WAKA KIDI NA MVUBU?

Bibwanya kwikala bikomo kwisamba na bana shi abasongola. Padi bobe bana badi bakusapwilanga myanda yonso pobadi bakidi banuke. Ino pano pobasongola kebakulombola’tu mityetye, kokomenwa ne kuyuka milangwe ne mwiivwanino wabo. Kodi pamo bwa abe wimene bukila bwa munonga mukatampe abo nabo bukila bukwabo. Shi bidi namino, nabya longa bukomo bwa kwisamba bininge na bobe bana!

BYA KULONGA

Itabija kwisamba na obe mwana ponso pasaka kwisamba nobe. Longa namino nansha shi mīsambo yenu ilomba kupwa bufuku bininge.

“Ubwanya padi kunena’mba, ‘Ino nsá ye yokosake twisambe? Mwene twadi nobe dyuba dyonso!’ Ino le kyotutompwela i kika shi betu bana basaka kwitulombola myanda yobadi nayo ku mutyima? Mwene bino ye bisakanga mbutwile ye-yense?”​—Lisa.

“Ndēmekele tulo bininge, inoko kudi mīsambo milumbuluke yotwisambanga na bami bana bansongwa kupita ne pa bukata bwa bufuku.”​—Herbert.

MUSOÑANYA WA MU BIBLE: “Nanshi muntu ne muntu kakikimba kamweno ka aye mwine, ino akimbe nyeke kamweno ka mukwabo.”​—1 Kodinda 10:24.

Kokilabikwa. Shabana umo unena’mba: “Kitatyi kimo ndabikwanga na kulangulukila pa bintu bikwabo kitatyi kisamba nami bami bana. Kadi bajingululanga’mba ntele mutyima ku bintu bikwabo​—nkibatejengapo!”

Shi nobe ye molongelanga, nankyo bula televijo ne kufunga telefone. Ta mutyima ku bintu bisamba obe mwana, ne kwibimona na mvubu na kumuteja na katentekeji, nansha shi bimweka bu kebidipo na mvubu mikatampe.

“Tufwaninwe kukulupija betu bana’mba milangwe yabo i ya mvubu kotudi. Shi bamone amba ketutelepo mutyima ku milangwe yabo, nabya bakaleka kwitusapwila’yo, ino bakakimba bukwashi ku muntu mukwabo.”​—Maranda.

“Kokafuna, nansha shi milangwe ya obe mwana ke myendele’mopo.”​—Anthony.

MUSOÑANYA WA MU BIBLE: “Tai mutyima ku muswelo omwivwana.”​—Luka 8:18.

Itabija kwisamba bya kiponka na ponka. Kyaba kimo bana bapēlelwanga kwisamba shi bashikete kabavu na mbutwile.

“Twisambanga na bana kitatyi kyotwenda mu motoka. Kushikata kabavu pa kyaba kya kwitala mpala na mpala kulengejanga twisambe mīsambo miyampe.”​—Nicole.

Nsá ya kudya nayo i mukenga mukwabo wa kwisamba bya kiponka na ponka.

“Pa kudya, umo ne umo ulombolanga bintu biyampe nansha bibi byalongekanga mu difuku’dya. Kino kibidiji i kitulungile mu bumo kadi i kitulengeje batwe bonso tuyuke amba ketulwangapo na myanda bunka.”​—Robin.

MUSOÑANYA WA MU BIBLE: ‘Ikala na bukidi pa kwivwana ne kwija pa kwisamba.’​—Yakoba 1:19.