Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Kwingidila pamo kudi pamo bwa muntu wendeja amviyo ne mukwashi wandi badi mu lwendo

 KU BA MULUME NE MUKAJI

2: Kwingidila Pamo

2: Kwingidila Pamo

MOKUSHINTULWILA

Shi ba mulume ne mukaji bengidila pamo mu busongi bwabo, badi pamo bwa muntu wendeja amviyo ne mukwashi wandi badi mu lwendo. Nansha shi kubalupuka makambakano, umo ne umo pa ba mulume ne mukaji ukalangulukila pa kishima “batwe” pa kyaba kya “ami.”

MUSOÑANYA WA MU BIBLE: “Kebakidipo babidi, aa, ino ke ngitu imo.”​—Mateo 19:6.

“Busongi ke kunenapo amba i kadi pako kabamba ñoma. Ba mulume ne mukaji bafwaninwe kwingidila pamo pa kwibulumbulula.”​—Christopher.

MWANDA WAKA KIDI NA MVUBU?

Shi kubalupuka makambakano, ba mulume ne mukaji kebengidilapo pamo bakanza kwitopeka pa kyaba kya kukimba muswelo wa kupwija makambakano’a. Mfulo mfulō mwanda wadi mutyetye wabaya.

“Kwingidila pamo i kintu kya mvubu mpata mu busongi. Shi ami ne wami mulume ketwadipo twingidila pamo, twadi ba kwikala bwa bekadi bitupu pa kyaba kya kwikala bantu besonge​—bantu babidi bashikete pamo inoko bakomenwa kukwata butyibi pamo mu myanda ya mvubu.”​—Alexandra.

BYA KULONGA

WIBANDAULE

  • Le monanga lupeto lonso lonsokola bu “lwami bunka”?

  • Pa kwipwija mukose, le neivwananga biyampe shi nkidipo na mwinē pami?

  • Lelo ndi mwisonsolole na babutule ba mwinē pami, nansha shi aye i mwibalamate?

WISAMBE NA MWINĒ POBE

  • Lelo i mu myanda’ka motwingidilanga senene pamo mu busongi bwetu?

  • Le i mu myanda’ka motufwaninwe kwilumbulula?

  • Le i matabula’ka otubwanya kutabula pa kutamija mutyima wa kwingidila pamo?

MADINGI

  • Langa’po bidi muta futu ya nteneshi yeu bobu bukila yeu nandi bukila bukwabo. Le i matabula’ka ofwaninwe kutabula pa kusaka’mba muketane na mwinē pobe mwanda wa mwikale mu ekipe imo?

  • Pa kyaba kya kulanga’mba, ‘Nsa kubwina namani?’ i biyampe kulanga’mba ‘Le tusa kubwina namani?’

“Kemukikimbai kuyuka muyampe i ani ne mubi i ani. Kino kikapalakanya ndoe ne bumo mu busongi bwenu.”​—Ethan.

MUSOÑANYA WA MU BIBLE: “Kemwakitai mutyima enka ku tumweno twa banwe bene, ino i ne ku tumweno twa bakwenu.”​—Fidipai 2:3, 4.