Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Lulekelo lupwijanga myanda pamo’nka na mubudilwanga lubimbi lwa mudilo

 KU BA MULUME NE MUKAJI

4: Kwilekela

4: Kwilekela

MOKUSHINTULWILA

Kulekela muntu kushintulula kuleka bitupu mwanda waakulubile ne kufundula kiji ku mutyima. Kulekela muntu ke kupēlekapo kilubo nansha kwikimona bu kekilongelwepo.

MUSOÑANYA WA MU BIBLE: “Endelelai kwitūkijija mityima banwe bene na bene ne kwilekela na mutyima umo nansha shi kudi udi na mwanda na mukwabo.”​—Kolose 3:13.

“Shi usenswe muntu, kukatepo mutyima’nka pa bilubo byandi bya pa kala, ino ukata’o ku bukomo bwalonga bwa kwilumbulula.”​—Aaron.

MWANDA WAKA KIDI NA MVUBU?

Shi ulama kiji, ukesanshija abe mwine ku ngitu ne mu ñeni​—kupityidila ubwanya kona busongi bwenu.

“Kyaba kimo wami mulume waunombele lusa pa kintu kyaunsense bininge ku mutyima. Byadi bikomo kumulekela. Mfulo mfulō namulekela, inoko nealakenye mwanda waka nkyamulekelepo bukidibukidi. Kino kyalengeje makambakano pa kipwano kyetu.”​—Julia.

BYA KULONGA

WIBANDAULE

Shi mwinē pobe wakusanshija mu binenwa nansha mu bilongwa, wiipangule amba:

  • ‘Le i binsanse bininge?’

  • ‘Le i kilubo kikatampe kyafwaninwe’nka kunomba lusa’ni nansha mbwanya’tu kwikileka bitupu?’

WISAMBE NA MWINĒ POBE

  • Le tupityijanga’po kitatyi kilampe namani pa kwilekela?

  • Le i bika byotubwanya kulonga pa kwilekela bukidibukidi?

MADINGI

  • Shi mwinē pobe wakulubila, kokanena’mba ye kyaadi kala ukunine.

  • Fwila mwinē pobe lusa na kuvuluka’mba “batwe bonso tukukalanga divule dine.”​—Yakoba 3:2.

“Bipēlanga kwilekela shi banwe bonso mudi mu kilubo, inoko i bikomo bininge shi umo ye ulubile. Bilombanga kwityepeja kwa binebine pa kwitabija kulombwa lusa ne kulekelañana.”​—Kimberly.

MUSOÑANYA WA MU BIBLE: “Pēlakana kupwija myanda.”​—Mateo 5:25.

Shi ulama kiji, ukesanshija abe mwine ku ngitu ne mu ñeni—kupityidila ubwanya kona busongi bwenu