Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 BALWILE NA BIKOLEJA

Nsekununi ya ba Ricardo ne Andres

Nsekununi ya ba Ricardo ne Andres

Bufundiji butamba mu Bible budi na bukomo bukatampe bwa kulumbulula būmi. Tulangulukilei bidi pa bano bantu babidi: Ricardo ne Andres.

RICARDO: Natwelele mu kisumpi kya bankasampe babipolapola nakidi’tu na myaka 15. Balunda nami bapya badi na lupusa lukatampe pondi. Na bubine, nadi na kitungo kya kulonga myaka dikumi mu buloko! Kino kimweka padi bu bulubi. Inoko mu mukenza wetu, boba badi bapityija kitatyi kilampe mu buloko badi batendelwa ne kulēmekwa. Kadi nami nadi nsaka kwikala pamo bwa abo.

Nadi nonga byonso byadi bilonga kisumpi kya bankasampe babipolapola, kimfwa kutoma bintu bikolwañana, kulonga busekese, ne kwikupila ñuma. Difuku dimo bufuku twakalwa ne na mata. Nadi nanga’mba basa kungipaya, ino najoka’ko mubwane. Ponka’po, nashilula kulangulukila bininge pa būmi ne bitungo byami, ebiya nakwata butyibi bwa kushinta. Namani? Le i kwepi konadi wa kutana bukwashi?

Babutule bami bavule kebadipo na nsangaji. Badi na bikoleja bivule mu būmi. Inoko kisaka kya muyomba wami umo kyadi na nsangaji. Nadi ndyukile amba i bantu bayampe, ne amba balondanga misoñanya ya mu Bible mu bwabo būmi. Na bubine, i kupityila kobadi konefundile musunsa mubajinji amba dijina dya Leza i Yehova. O mwanda pa kupwa’tu kukalwa na mata, nalombele kudi Yehova, namutela pa dyandi dijina ne kumulomba ankwashe. Na mu kitulumukila’tu, difuku dilonda’ko, Kamoni wa Yehova wakokola ku yami njibo! Ebiya washilula kumfundija Bible.

Kupwa natanwa na kikoleja kikatampe. Balunda nami ba pa kala badi bangita kyaba kyonso, banena tukapityije nabo kitatyi. Nadi mpela nansha byokebyadipo bipēla. Nadi musumininwe kwendelela na kwifunda Bible, kadi ne musangale pa kwifunda’ye! Būmi bwami i bulumbuluke bininge, kadi ngidi na nsangaji ya binebine.

Mvulukanga ponalombele kudi Leza amba nadi nsaka kupityija myaka dikumi mu buloko mwanda wa bandēmeke bu muntu wa mu kisumpi kya bankasampe babipolapola. Penepa namulomba ampe mukenga wa kumwingidila bu mwingidi wa kitatyi kyonso nansha’tu mu bula bwa myaka dikumi mwanda wa kukwasha bakwetu enka na mobaunkwashishe ami. Leza walondolwele milombelo yami, kendi mulonge myaka 17 mu mwingilo wa kitatyi kyonso! Kadi kebaunkutyilepo nansha dimo.

Inoko balunda nami bavule ba pa kala, ke balonge myaka mivule mu buloko. Bakwabo nabo ke bafwe. Pomvulukanga bya pa kala, mfwijanga’ko bininge babutule  bami Batumoni. Badi beshile na bantu bakwabo, kadi balonda madingi a mu Bible mu būmi bwabo. Nebalēmekele bininge kupita monadi ndēmekele muntu ye-yense mu kisumpi kya bankasampe babipolapola. Kutabukidila, mfwijanga’ko Leza pa kumfundija mwa kwikadila biyampe mu būmi.

ANDRES: Nabutwidilwe ne kutamina mu mukenza wa balanda mwadi muvudile bitomibwa bikolwañana, manyengenyenge, butapani, ne bundumba. Tata wadi mumunwe na mālwa ne bitomibwa bikolwañana. Aye ne mama badi betuka mutonko ne kwikupila nyeke.

Ponadi mwanuke, nashilula kutoma mālwa ne bintu bikolwañana. Kitatyi kivule nadi mpitakana mu bipito, ngiba ne kupoteja byongiba. Ino pa kutama, tata waumfwena mwanda wa kuñona, waumfundija mwa kutwejeja mu bufyafya mu yetu ntanda bintu bikolwañana ne bintu bikwabo bipelejibwe ne kwibipoteja. Nasokwele lupeto luvule kadi bukidibukidi. Difuku dimo bampulushi baiya ku yami njibo. Bankwata, bantyibila butyibi bwa kukutwa myaka itano amba nkimbanga kwipayañana.

Difuku dimo lubanga baela musapu mu buloko na lansevwa, baita bakutwa bakevwane mwisambo wa mu Bible walongelwe na Batumoni ba Yehova. Nami naenda’ko. Byonaivwene byadi na buluji, ebiya nashilula kwifunda Bible na Batumoni. Kebadipo banyengakanya Bisonekwa, ino banombwele misoñanya ya peulu ya Leza ya mwa kwikadila.

Ne kwija mpika najingulula’mba nkibwanyapo kushinta pa kubulwa wa kunkwasha, nakampata kitatyi kyadi kinzakaja bakutwa bakwabo bene kebadipo basangedile byonadi nefunda. Nalomba Yehova ampe bukomo ne tunangu, nandi wankwasha. Na bubine, nabwenye kunekenya, kenesambe ne na bakutwa bakwabo myanda ya mu Bible.

Pobankutulwile, nafītyilwe bininge, nkesake kushala mu kifungo! Ponadi tamba, bakutwa bavule baiya kunshadika. Bamo banena ne na buswe amba, “A pashitele enda’po.”

Ngikalanga na malangalanga kitatyi kyonangulukilanga pa mwadi mwa kwikadila bwami būmi shi Yehova kaumfudijepo. Mfwijanga’ko bininge pa kunsaswa kunsenswe Leza ne pa kuleka kumona bu muntu kabwanyapo kushinta. *

^ mus. 15 Bimfwa bivule bilombola’mba Bible udi na bukomo bwa kushinta bantu bidi pa jw.org. Twela mu BIBLE NE ABE > NDOE NE NSANGAJI.