Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Kiteba kya Mulami  |  No. 6 2017

Lelo Na Bubine Yesu Wādi na Kilungi kya Muswelo’ka?

Lelo Na Bubine Yesu Wādi na Kilungi kya Muswelo’ka?

I kutupu muntu nansha umo udi na foto ya Yesu. Kāshilepo kyelekejo kyandi nansha monima. Inoko, basendwe bāshilwile kumufwatula ke mu bula bwa myaka tutwa na tutwa.

Na bubine, bano basendwe kebādipo bayukile senene mwine mwādi mwikadile mpala ya Yesu. Bibidiji bivule, nkulupilo ya bipwilo, ne boba batala mingilo ya busendwe, divule bo abo basoñanyanga basendwe mwa kufwatwila Yesu mungya mobasakila. Nansha nankyo, bifwatulo byabo bidi na lupusa pa bantu, enka ne kunyengakanya mumweno wabo padi Yesu ne pa bufundiji bwandi.

Basendwe bamo bafwatulanga Yesu bu muntu muzoze na nywene milampe ne myevu mityetye nansha kumumwekeja bu mufītwe. Mu bifwatulo bikwabo bamwekejanga Yesu bu kipangwa kya ku mushipiditu na kakijokoloja ka kitōkeji ku mutwe, nansha mwitolwele na bantu. Le na bubine bino bifwatulo bilombolanga senene mwādi mwikadile Yesu? Le tukajingulula namani mwine mwaādi wikadile? Muswelo umo bidi ubwanya kwitukwasha tujingulule padi mwine mwaādi wikadile i kubandaula byobya binena Bible. Kadi bibwanya kwitukwasha twikale na mumweno muyampe padi.

“WAUNONGOLWEDILE UMBIDI”

Padi bino byo binenwa byānenene Yesu mu milombelo kumeso kwa kubatyijibwa. (Bahebelu 10:5; Mateo 3:13-17) Le uno umbidi wādi wa muswelo’ka? Kintu kya myaka 30 kunyuma, mwikeulu Ngabudyele wāsapwidile Madia amba: “Usa kwimita dīmi kadi ukabutula mwana mwana-mulume, . . . Mwanā Leza.” (Luka 1:31, 35) Yesu wādi muntu mubwaninine’nka na mwādi mwikadile Adama paāpangilwe. (Luka 3:38; 1 Kodinda 15:45) Yesu wādi na bupunga buyampe kadi umweka bu wādi mwiifwane na inandi Muyuda, Madia.

Yesu wādi na myevu mungya kibidiji kya Bayuda kishile na kya bene Loma. Ino myevu kyādi kilomboji kya bulēme, kadi keyādipo milampe bininge nansha misalakane. Ne kutatana kwine mpika Yesu wādi ulongolola senene myevu ne nywene yandi. Enka bene Nazila kete bo kebādipo batendeja nywene yabo, pamo bwa Samishoni.​—Umbadilo 6:5; Batyibi 13:5.

Kumeso kwa kubwanya myaka 30, Yesu wāingile ne bu sendwe wa mbao, kadi kādipo wingidija bingidilwa biyampe bidi’ko dyalelo. (Mako 6:3) Nanshi, bimweka’mba kādipo muzoze. Ku ngalwilo kwa mwingilo wandi, aye bunka bwandi, “wapangila panja pa tempelo boba bonso badi na mikōko ne bañombe, kadi wamwanga ne bityele bya bashintula lupeto ne kukuvumika mameza abo.” (Yoano 2:14-17) Kulonga kino kwādi kulomba bukankamane ne bukomo. Yesu wāingidije umbidi wāmulongolwedile Leza mwanda wa kuvuya mwingilo waāmupele. Wānenene amba: “Mfwaninwe kusapula myanda miyampe ya Bulopwe bwa Leza ne mu bibundi bikwabo namo, mwanda kino’ki e kyonatumīnwe.” (Luka 4:43) Bine byādi bilomba bukomo ne bukankamane pa kwenda mu Paleshitina monso lwa nshi mwanda wa kusapula uno musapu.

“IYAI KONDI, . . . NAMI NKEMUTŪJA”

Yesu byaādi na nsangaji ne na mwikadilo muyampe na bantu, nanshi luno lwito ye luno lwākokele bininge  boba bādi “baputuma na mingilo ne balēmenenwe.” (Mateo 11:28-30) Nsangaji yandi ne kanye byākomeneje mvubu ya mulao wandi wa kutūja boba bonso bādi na mutyima wa kuteja bufundiji bwandi. Enka ne bankasampe bene bādi basangela kufwena Yesu, o mwanda Bible unena’mba: “Wasela bana mu maboko.”​—Mako 10:13-16.

Nansha Yesu byaāmweshibwe malwa bininge kumeso kwa kwipaibwa, ino aye’ko wādi muntu ulumbwa. Kimfwa, wākweshe ku masobo a butundaile a mu Kena na kwalamuna mema ke vinyu miyampe bininge. (Yoano 2:1-11) Kadi difuku dikwabo wāfundije bufundiji kebukedibwapo nansha dimo.​—Mateo 9:9-13; Yoano 12:1-8.

Ino kya mvubu nakampata, musapu wa Yesu wākweshe bantu bekale na lukulupilo lwa būmi bwa nyeke. (Yoano 11:25, 26; 17:3) Bana ba bwanga 70 pobāmusapwidile myanda yobēmwenine mu busapudi, penepo Yesu “wasangala bininge” ne kunena’mba: “Sangalai mwanda majina enu i malembwe mūlu.”​—Luka 10:20, 21.

“NANSHI BANWE KEMWAKIKALAI NANKYO”

Bendeji ba bipwilo ba mu mafuku a Yesu bādi bakimba miswelo ya kwimwekeja ku bantu ne kukomeneja lupusa lwabo. (Umbadilo 15:38-40; Mateo 23:5-7) Yesu wādi mwishile nabo, aye wāfundije batumibwa bandi baleke ‘kutādila’ bakwabo. (Luka 22:25, 26) Na bubine, Yesu webādyumwine amba: “Dyumukai basonekeji basakanga kunangakana mu minkukumba, basakanga kwimunwa mu mansoko.”​—Mako 12:38.

Kadi kitatyi kyēsobakenye Yesu mu kibumbo, bakomenwe kumujiula. (Yoano 7:10, 11) Nansha ke paādi na batumibwa bandi ba kikōkeji 11, kekwādipo wādi ubwanya kumujiula. Yudasa wāmwabile na kumufifya, ne kino kyādi “kiyukeno kyobeivwanikile” kala, mwanda wa kuyukanya Yesu ku kibumbo kya bantu ba kumwipaya.​—Mako 14:44, 45.

Nansha myanda mivule byokeiyukanikilepo, inoko na bubine Yesu kādipo na mobamufwatwilanga pa bifwatulo. Kya mvubu nakampata kupita mwine mwādi mwikadile kilungi kyandi, i motumumwena dyalelo.

“KUBASHALA KAKITATYI KATYETYE’TU INO NTANDA KEIKAMONEPO AMI MONKA”

Yesu wāipailwe ne kujīkwa enka mu difuku dyaānenene bino binenwa’bi. (Yoano 14:19) Wāpēne būmi bwandi bu “kinkūlwa kya kukūla bavule bene.” (Mateo 20:28) Mu difuku dya busatu Leza wāmusangwile na ngitu ya “mushipiditu” ne “kumumwekeja” ku bandi bana ba bwanga bamo. (1 Petelo 3:18; Bilongwa 10:40) Penepa le Yesu wādi na kilungi kya muswelo’ka paāmwekēle bandi bana ba bwanga? Bimweka bu kilungi kyandi kyāshintyile, mwanda enka ne bandi bana ba bwanga bākomenwe kumujingulula kiponka na ponka. Madia mwine Makadala wālangile amba i mudimi; bana ba bwanga babidi nabo bādi benda ku Emese bālanga’mba i mweni.​—Luka 24:13-18; Yoano 20:1, 14, 15.

Le tufwaninwe kumona namani Yesu dyalelo? Myaka 60 Yesu pa kupwa kufwa, Yoano, mutumibwa waādi usenswe bininge wāmwene Yesu mu bimonwa. Yoano kāmwenepo umbidi mufwe mupopwe ku musalaba. Inoko, wāmwene “Mulopwe wa balopwe ne Mfumwandya bamfumu,” Mulopwe wa Bulopwe bwa Leza, mwine usa kunekenya balwana na Leza panopano ponka, bandemona ne bantu bene, ne kuletela muzo wa muntu madyese a nyeke ne nyeke.​—Kusokwelwa 19:16; 21:3, 4.