Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Kiteba kya Mulami  |  No. 6 2017

 BIPANGUJO BYA BATANGI . . .

Lelo Bene Kidishitu Bafwaninwe Kufeta Noele?

Lelo Bene Kidishitu Bafwaninwe Kufeta Noele?

Bantu midiyo ne midiyo kujokoloka ntanda yonso bakulupile amba Noele i fetyi ya kuvuluka kubutulwa kwa Yesu Kidishitu. Ino, le kudi bubinga bulombola’mba bene Kidishitu ba mu myaka katwa kabajinji, bene bādi pabwipi na Yesu, bādi bafeta Noele? Ne lelo uyukile binena Bible pa mafuku a kubutulwa? Kutana malondololo ku bino bipangujo kuketukwasha tujingulule shi bene Kidishitu bafwaninwe kufeta Noele.

Dibajinji bidi, Bible kalombwelepo pantu nansha pamo pāsobelwe masobo a kubutulwa kwa Yesu nansha kwa mutōtyi mukwabo wa kikōkeji wa Leza. Inoko Bisonekwa bitela bantu babidi bāsobele masobo a kubutulwa kwabo. Abo bonso kebādipo batōtyi ba Yehova, Leza wa mu Bible, kadi ano masobo a kubutulwa kwabo āfudile kubi. (Ngalwilo 40:20; Mako 6:21) Mungya dibuku Encyclopædia Britannica, bene Kidishitu babajinji kebādipo bafeta mafetyi “a bajentaila a mafuku a kubutulwa.”

Lelo Yesu wābutwilwe difuku’ka?

Bible katelelepo kitatyi kine kyābutwilwe Yesu. Cyclopedia ya McClintock ne Strong inena’mba, “Difuku dyābutwilwe Yesu keditelelwepo mu [Kipwanino Kipya] nansha ke mu mabuku makwabo.” Na bubine, shi Yesu wādi usaka balondi bandi basobe masobo a kuvuluka kubutulwa kwandi, wādi wa kwibakwasha batentekele difuku dine dyaābutwilwe.

Dya bubidi, Bible kanenenepo nansha pamo amba Yesu nansha mwanā bwanga wandi ye-yense bāfetele Noele. Mungya New Catholic Encyclopedia, fetyi ya Noele yālembelwe dibajinji mu “Chronograph ya Philocalus, dibuku dya bene Loma dyālembelwe’mo bitatyi bya mvubu bya pa mwaka dyālupwilwe mu 336 [Yesu Ke Mwiye].” Na bubine, kino kyālongekele Bible ke mubwane yense mutuntulu, kadi pādi ke papite myaka tutwa na pādi Yesu pano pa ntanda. O mwanda, ba McClintock ne Strong bālembele amba “masobo a Noele keatūdilwe’kopo na Leza, kadi keatanwangapo nansha mu [Kipwanino Kipya] mwine.” *

Lelo Yesu wāsoñenye bandi bana ba bwanga bavuluke kinkumenkume’ka?

Yesu byaādi Mufundiji Mukatampe, o mwanda wāfundije balondi bandi bintu byaādi wibasakila balonge, kadi bino bintu i bilembwe ne mu Bible. Inoko kufeta Noele, kekubadilwangapo mu bino bintu. Enka na kemusakilangapo mwadimu bandi bana ba masomo batabuke mikalo ya byobya byaebafundije, mo monka ne Yesu nandi kasakangapo balondi bandi batabuke “byobya bilembelwe” mu Bisonekwa Bijila.​—1 Kodinda 4:6.

Inoko, kudi kinkumenkume kimo kya mvubu kyādi kivuluka bene Kidishitu babajinji​—ke Kivulukilo kya lufu lwa Yesu kadi. Yesu aye mwine wālombwele bandi bana ba bwanga kitatyi kya kuvuluka lufu lwandi ne mwa kwibilongela. Buno bulombodi bupotoloke, ne difuku dya lufu lwandi kukwatañana na kalandadiye ka dyalelo i bisonekwe mu Bible.​—Luka 22:19; 1 Kodinda 11:25.

Enka na motwekimwena, Noele i fetyi ya kubutulwa, inoko bene Kidishitu babajinji kebādipo bafeta ino fetyi ya bajentaila. Kadi, Bible kanenenepo amba Yesu nansha ke muntu mukwabo wāfetele Noele. Kukwatañana na ino myanda, bene Kidishitu bavule kujokoloka ntanda yonso i bafule ku kunena’mba kebafwaninwepo kufeta Noele.

^ mus. 6 Shi usaka kuyukila’ko bivule pa kwine kwāshilukile fetyi ya Noele, tala kishinte “Bipangujo bya Batangi . . . I bubine’ka butala pa Noele?” mu Kiteba kya Mulami kya 1 Kweji 12, 2014, kidi ne pa www.jw.org.