Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Kiteba kya Mulami  |  No. 5 2017

 MUTWE WA MWANDA WA PA KIBALU | BAMWIKEULU​—LELO BADI’KO BINE? KYOWIKADILE MWANDA WA MVUBU

Muswelo Ubwanya Kukukwasha Bamwikeulu

Muswelo Ubwanya Kukukwasha Bamwikeulu

Bamwikeulu ba kikōkeji batele mutyima bininge ku bilonga bantu kadi bengilanga bininge mwanda wa kufikidija kiswa-mutyima kya Yehova. Leza paāpangile ntanda, bamwikeulu ‘baimbile pamo, kadi ne bāna ba Leza bonso baela nsadi ya tusepo.’ (Yoba 38:4, 7) Mu bula bwa mānga, bamwikeulu basakanga bininge ‘kujingulula’ binenwa bya bupolofeto butala pa binkumenkume bya kumeso bikalongeka pano pa ntanda.​—1 Petelo 1:11, 12.

Bible ulombola’mba kitatyi kimo bamwikeulu bākingile batōtyi ba bine mu muswelo kampanda mwanda wa kufikidija kiswa-mutyima kya Leza. (Ñimbo ya Mitōto 34:7) Kimfwa:

  • Kitatyi kyāonakenye Yehova bibundi bibi bya Sodoma ne Ngomola, bamwikeulu bākweshe Lota muntu wa kikōkeji ne kisaka kyandi banyeme.​—Ngalwilo 19:1, 15-26.

  • Mu Babiloni wa kala namo, bankasampe basatu Bahebelu pobātyibīlwe butyibi bwa kwipaibwa mu nkelwa ya mudilo, Leza wātumine “mwikeulu wandi kunyongolola bengidi bandi.”​—Danyele 3:19-28.

  • Danyele muntu moloke nandi paālongele bufuku butuntulu mu muta wa bantambo ba nzala, ushintulula mwaāpandile amba, “Leza wami watume mwikeulu wandi wamumija byakanwa bya bantambo bano.”​—Danyele 6:16, 22.

Bamwikeulu i bakwashe bantu ba kikōkeji mu bula bwa mānga

BAMWIKEULU BĀKWESHE KIPWILO KIBAJINJI KYA BWINE KIDISHITU

Kitatyi kivule, bamwikeulu ba Leza basedi ba myanda bākweshe ku mingilo ya kipwilo kibajinji kya bwine Kidishitu mwanda wa kufikidija mpango ya Yehova. Kimfwa:

  • Mwikeulu wāshitwile bibelo bya kifungo ne kutambija batumibwa bādi bakutwe amba bendelele na kusapula mu tempelo.​—Bilongwa 5:17-21.

  • Mwikeulu wānenene musapudi Fidipa ende ku dishinda dya muntanda mutuputupu ditamba ku Yelusalema ditūkila ku Ngaza, akasapwile muntu umo mwine Efiopya wāendele kukatōta ku Yelusalema.​—Bilongwa 8:26-33.

  • Kitatyi kya Leza pokyābwene kya bantu bampikwa kwikala Bayuda bekale ke bene Kidishitu, mwikeulu umo wāmwekēle Konilusa, mudyavita wa basola mwine Loma mu kimonwa ne kumulombola ete mutumibwa Petelo ku yandi njibo.​—Bilongwa 10:3-5.

  • Mutumibwa Petelo paākutyilwe, mwikeulu umo wāmumwekēle ne kumutambija mu kifungo.​—Bilongwa 12:1-11.

 MUSWELO UBWANYA KUKUKWASHA BAMWIKEULU

Dyalelo, i kutupu bubinga bulombola’mba Leza wingidijanga bamwikeulu mwanda wa kukwasha bantu mu kingelengele na mobilombwedilwe mu nsekununi ya mu Bible. Inoko, Yesu wēsambīle pa ano etu mafuku amba: “Ino myanda miyampe ya Bulopwe ikasapulwa pa ntanda yonso ikelwe na bantu mwanda wa bukamoni ku mizo yonso, ebiya mfulo keiya shayo.” (Mateo 24:14) Lelo wadi uyukile amba bana ba bwanga ba Kidishitu bengilanga uno mwingilo na bukwashi bwa bamwikeulu?

Bamwikeulu bakwashanga ku busapudi bwa myanda miyampe isapulwa ntanda yonso

Mukanda wa Kusokwelwa witulombola’mba bamwikeulu bakwashanga na kininga bantu pano pa ntanda ponso befunde myanda ya Yehova Leza ne mpango yandi itala muzo onsololo wa muntu. Mutumibwa Yoano wālembele amba: “Namwene mwikeulu mukwabo wipapa umbukata mwa mūlu, wadi na myanda miyampe ya nyeke ya kusapwila boba bekele pano pa ntanda, mizo yonso ne bisaka ne ndimi ne bantu, kanena na diwi dikatampe amba: ‘Akamwai Leza, mutumbijei ntumbo, mwanda kitatyi kya butyibi bwandi kibafika, nanshi tōtai Yewa walongele diulu ne ntanda ne dijiba ne masulo a mema.’” (Kusokwelwa 14:6, 7) Myanda mimweke ilongeka dyalelo ibingija’mba bamwikeulu bakwatakanyanga mwingilo wa busapudi bwa Bulopwe wingilwa ntanda yonso. Kadi na bubine, shi kipya-mambo nansha’tu umo wesāsa ne kujokela kudi Yehova, “kwikalanga nsangaji mu bamwikeulu ba Leza.”​—Luka 15:10.

Le i bika bikalongeka shi mwingilo wa busapudi ubavuika? “Bibumbo bya mūlu” bya bamwikeulu bikakwatakanya Yesu Kidishitu, Mulopwe wa balopwe, mu bulwi bwa “divita dya difuku dikatampe dya Leza Mwinē Bukomo Bonso” pa Amakedona. (Kusokwelwa 16:14-16; 19:14-16) Bamwikeulu ba bukomo bakengila pa kufikidija butyibi bwa Leza pamo na Mfumwetu Yesu pakalubwila “kinongo boba . . . kebakōkelepo myanda miyampe ya Mfumwetu Yesu.”—2 Tesalonika 1:7, 8.

Shi ke pano, yuka’mba bamwikeulu bakutele mutyima. Basakilanga biyampe boba bonso badi na mutyima wa kwingidila Leza, kadi Yehova wēbengidije misunsa mivule mwanda wa kukomeja ne kukinga bengidi bandi ba kikōkeji ba pano pa ntanda.​—Bahebelu 1:14.

Batwe bonso tudi na butongi bwa mvubu mpata bwa kutonga. Lelo usakanga kuteja ne kukōkela myanda miyampe isapulwa pano pa ntanda ponso? Nabya Batumoni ba Yehova ba mu kyenu kibundi bakasangela kukukwasha umwene mu bukwashi bwa buswe bwa bamwikeulu ba bukomo ba Leza.