Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Bantu badi mu mitōtelo mikatampe bakulupile amba muya wa muntu keufungapo

 MUTWE WA MWANDA WA PA KIBALU | LELO I BIKA BINENA BIBLE PA BŪMI NE LUFU?

Kipangujo Kikutakane

Kipangujo Kikutakane

BANTU badi na milangwe mivule mishileshile pa mwanda utala būmi ne lufu. Bamo balañanga amba shi abafu, bakendelela na būmi bwa muswelo mukwabo mu kifuko kampanda. Bakwabo balañanga’mba bakabutulwa dipya mwanda wa kwikala’ko dikwabo. Kadi bangi nabo balañanga’tu amba lufu yo mfulo ya bintu byonso.

Padi nobe kudi byokulupile pa uno mwanda, kukwatañana na bitamina ne na bibidiji bya kwenu. Bantu byobadi na milangwe mishileshile pa mwikadilanga muntu shi wafu, le i kwepi nansha i kudi ani kotukatana malondololo akulupilwa kadi a bine ku kino kipangujo kikutakane?

Mu bula bwa myaka tutwa na tutwa, bendeji ba bipwilo bafundijanga lufundijo lwa amba muya wa muntu keufungapo. Bantu badi mu mitōtelo mikatampe​—boba betela bu bene Kidishitu, bene Hindu, Bayuda, Bamizilma, ne boba badi mu mitōtelo mikwabo​—bakulupile amba muya keufungapo, mwine obanenanga’mba wikalanga utamba’mo ne kwenda kukekala mu kīkalo kya mishipiditu shi umbidi wa muntu ubafu. Bene Buddha nabo, bakulupile amba muntu ubwanya kufikila mu ngikadilo ya nsangaji itwa bu Nirvana kupityila ku kubutulwabutulwa misunsa mivule, na bukomo bwa ngitu ne bwa mu ñeni.

Kukwatañana na ino mfundijo, bantu bavule ntanda yonso i bafule ku kukulupila amba lufu lo lushitulanga kibelo kitwala ku būmi mu ntanda mikwabo. Kadi bantu bavule bamonanga lufu bu ditabula dya mvubu mu būmi, ne amba kufwa i kiswa-mutyima kya Leza. Shi ke pano, i bika binena Bible pa uno mwanda? Nanshi tukulomba utange bidi kishinte kilonda’ko. Padi kilondololwa kikakutulumuja.