Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Kiteba kya Mulami  |  No. 4 2017

 MUTWE WA MWANDA WA PA KIBALU | LELO I BIKA BINENA BIBLE PA BŪMI NE LUFU?

Byobya Binena Bible pa Būmi ne Lufu

Byobya Binena Bible pa Būmi ne Lufu

Mungya myanda itala bupangi idi mu mukanda wa mu Bible wa Ngalwilo, twifunda’mo amba Leza wāsapwidile Adama, muntu mubajinji amba: “Ku mityi yonso ya budimi kudya udyako bitupu kekudipo mwanda. Nanshi ku mutyi wakuyukanya buya ne bubi, kokadyako i kijila; mwanda difuku dyokadyako mwiko, kufwa ukafwanga.” (Ngalwilo 2:16, 17) Bino binenwa bilombola’tu patōkelela amba shi Adama wākōkele kijila kya Leza, kādipo wa kufwa, ino wādi wa kwendelela na būmi mu budimi bwa Edena.

Ino i kya bulanda, pa kyaba kya kutonga kukōkela ne kwikala na būmi bwa nyeke, aye’ko Adama wātonga kujilula kijila kya Leza na kudya kipa kya ku mutyi mujidikwe kyāmupele wandi mukaji Eva. (Ngalwilo 3:1-6) Bibi byonso bilupukile ku kino kilongwa kya kubulwa kikōkeji, bikyendela ne dyalelo. Mutumibwa Polo ushintulula’kyo uno muswelo amba: “Monka mwātwelele bubi mu ino ntanda kupityila ku muntu umo ne lufu kupityila ku bubi, ne lufu nalo lwasambakana ku bantu bonso mwanda bonso balongele bubi.” (Loma 5:12) Na bubine uno “muntu umo” wādi Adama. Ino, le bubi bwādi bika, ne mwanda waka bwālupwile lufu?

Byobya byālongele Adama​—ko kunena’mba kupela kukōkela ku kusaka nansha kujilula kijila kya Leza​—ye bubi. (1 Yoano 3:4) Kadi mpalo ipala bubi i lufu enka na mobālombwedile’kyo Adama kudi Leza. Shi kwadi amba Adama​—ne lutundu lwandi​—bakōkele kijila kya Leza, kebadipo ba kulonga bubi nansha ke kufwa kwine. Leza kāpangilepo bantu amba bafwe, ino i mwanda wa bekale’ko nyeke ne nyeke.

 Nanshi i kutupu ne kya kutatena kine shi lufu ‘i lusambakane ku bantu bonso,’ enka na munene’kyo Bible. Ino, lelo kudi kintu kyendelelanga na būmi shi tubafu? Bamo babwanya kunena amba i amo, kidi’ko​—kyokya kitwa bu muya​—kekifungapo. Inoko, kino kibwanya kufikija bantu bavule ku kunena amba Leza wābepele Adama. Namani? Mwanda shi kudi kintu motudi kyendanga kukekala na būmi mu kīkalo kikwabo shi tubafu, nabya lufu ke mpalopo ya bubi, na mwānenene’kyo Leza. Inoko Bible unena’mba: ‘Leza kakokejapo kubepa.’ (Bahebelu 6:18) Na bubine, Satana ye wābepele paāsapwidile Eva amba: “Mhm, binebine kemukafupo.”​—Ngalwilo 3:4.

Kino i kilengeje kipangujo kya amba, lufundijo lwa amba muya keufungapo byoludi lwa bubela, penepo muntu wikalanga namani shi wafu?

BIBLE OLOLANGA BINTU SENENE

Mukanda wa Ngalwilo unena pa mwanda utala bupangi amba: “Ebiya Yehova Leza wapunga muntu ku biloba bya panshi, wamoila mu myulu yandi muya wa bumi; enka nankyo muntu waalamuka ke muya mumi.” Bishima “muya mumi” i byalamunwe ku kishima kya Kihebelu ne’phesh, * kine kishintulula’mba ‘kipangwa kifoma.’​—Ngalwilo 2:7.

Bible ulombola patōka amba bantu kebāpangilwepo na muya keufu. Inoko, muntu yense i “muya mumi.” O mwanda, nansha shi ukimbe mu Bible’ka kukatana’mopo bishima bya amba “muya keufungapo.”

Bible byakanenenepo amba bantu badi na muya keufu, penepa mwanda waka bipwilo bivule bifundijanga bitupe na byobya binena Bible? Pa kulondolola kino kipangujo tujokelei ku byobya byādi bilongeka pa kala mu Edipito.

 KUSAMBAKANA KWA BUFUNDIJI BWA BAJENTAILA

Helodote, mulembi umo wa mānga Mungidiki wāikele’ko mu myaka katwa ka butano Yesu Kaile, wānenene amba bene Edipito bo “bantu babajinji bādi babingija lufundijo lwa amba muya keufungapo.” Mu bibidiji bikwabo bya pa kala bya bene Babiloni namo, mwādi mutembaulwa mulangwe wa amba muya keufungapo. Mu kitatyi kyānekenye Alekizandele Mukatampe kipindi kya Pabukata bwa Kutunduka mu 332 Y.K, bafilozofe Bangidiki bāsambakenye luno lufundijo ku bantu, na pano kala lwāzambalala mu Umbikalo onso wa Ngidiki.

I kutupu mu Bible nansha umo mokatana bishima bya amba “muya keufungapo”

Mu myaka katwa kabajinji Yesu Ke Mwiye, kwādi bitango bibidi bitumbe bya Bayuda, bene Esene, ne Bafadiseo, bādi bafundija amba muya wendelelanga na būmi shi muntu wafu. Dibuku The Jewish Encyclopedia dinena’mba: “Lukulupilo lwa amba muya keufungapo lwāfikile ku Bayuda kupityila ku kwinangila na Bangidiki ne nakampata i kupityila kudi filozofe Platon.” Jozefu, mulembi wa mānga Muyuda wa mu myaka katwa kabajinji nandi wānenene amba luno lufundijo kelukwatañenepo na Bisonekwa Bijila, ino lukwatañene na “nkulupilo ya bene Ngidiki,” mine yaātelele bu ñano ne mfumo.

Bibidiji bya Ngidiki pa kuzambalala, boba betela bu bene Kidishitu nabo bāitabija luno lufundijo lwa bajentaila. Mungya Jona Lendering mulembi wa mānga, “mulangwe wa Platon wa amba muya wendanga bidi mu kīkalo kiyampe, kupwa kewenda kukekala mu ntanda ya baya-kalunga wālengeje filozofi ya Platon itwele mu bwine Kidishitu bwa dijina bitupu.” O mwanda lufundijo lwa bajentaila lwa amba muya keufungapo,  lwāitabijibwe mu bipwilo bītela bu bya “bwine Kidishitu” ne kubadilwa mu nkulupilo yabo mikatampe.

“BUBINE NABO BUKEMUPA BWANAPABO”

Mu myaka katwa kabajinji, mutumibwa Polo wāletele kino kidyumu kya amba: “Mushipiditu wa Leza unena patōka’mba mu bitatyi bya ku mfulo bamobamo bakapona mu lwitabijo, kebate mutyima ku binenwa bya kyongo bya mishipiditu ne ku mfundijo ya bandemona.” (1 Temote 4:1) Bino shabyo byo binenwa bya bine! Lufundijo lwa amba muya keufungapo i kimfwa kimo bidi kya mu “mfundijo ya bandemona.” Bible kelukwatakanyangapo, kadi i lutambe ku mitōtelo ya bajentaila ya kala ne ku filozofi.

Ino batwe tudi na dyese, mwanda Yesu wānenene amba: “Mukayuka bubine, bubine nabo bukemupa bwanapabo.” (Yoano 8:32) Kwikala na buyuki bwa bine bwa bubine bwa mu Bible, i kwitunyongolole ku mfundijo ifutulwija Leza ne ku bibidiji bivudile mu bipwilo bivule bya ino ntanda. Pakwabo kadi, bubine bwa mu Kinenwa kya Leza i bwitunyongolole mu bisela ne ku kabutyibutyi bikwatañene na bafu.​—Tala kapango “ Bafwe Badi Kwepi?

Mupangi wetu kāpangilepo’tu bantu bekale’ko mu bula bwa myaka 70 nansha 80 pano pa ntanda kupwa kaebatundulwila mu kīkalo kikwabo kyobakekala’mo nyeke. Mpango yandi imbajinjibajinji i ya amba bantu bekale’ko nyeke pano pa ntanda bu bandi bana ba kikōkeji. Ino mpango mikatampe i kilomboji kya buswe bwa Leza bwaswele muzo onsololo wa muntu, kadi keikakankalwapo kufikidila. (Malaki 3:6) Mulembi wa Ñimbo ya Mitōto wāpelwe mushipiditu, wālemba na kikulupiji kyonso amba: “Boloke bakapyananga ntanda, ne kwikala monka nyeke.”​—Ñimbo ya Mitōto 37:29.

 

^ mus. 9 Malamuni amo a Bible, kimfwa King James Version ne Catholic Douay Version, alamwine kishima ne’phesh bu “muya mūmi,” kadi kudi malamuni mavule a dyalelo alamuna kino kishima bu “kipangwa kyumi,” Dibuku Dijila; “kwikala mūmi,” New International Version ne The Jerusalem Bible; nansha’tu amba “kushilula kwikala’ko,” Today’s English Version.